نامَه اوّل تیموتائوس 1
1
1از طرف پولُس، که وَ حُکم نجاتدَهندَمو خدا و امیدمو مسیحْ عیسی، حَوارِنِ مسیح عیسائِه؛
2اُ تیموتائوس که تِی ایمون بَچِ حکیکیمِه:
از طرف خدای با، و خداوندمو مسیحْ عیسی فیض و رحمت و صلح و سلامتی بِه.
هشدار دربارَهِ معلمِی دارُوی
3هَموناکِه وَختی اُ منطکَهِ مقدونیَه اَچِدام مُ تو اصرار کِه، دَفَیدو هم از تو مَئِه که تِی شهر اَفِسُس وامانِش تا اُ مُشتی آدامیا فَرمو هاتِش که نِه تعلیمِیدو هاتِت 4و نِه اُ خوشو وَکف کِصَهیّا و شجرَهنامَهئِی که تَمومی شُنی بِکنِت، اَسِی که اِ چِییا وَ جَی اِکِه کَرِ خدائا که از رَه ایمونِه اُ جلو بِبَه، باعث جَر و مُرافِعَه اَبِه. 5هدف فَرمُنِ اَما، محبتِه، محبتی که از یَک دل پاک و یَک وجدان خَش و از یَک ایمون خالص اَدا. 6مُشتی از آدامیا از رَهِ اِ چِییا اُدَر چِستِت، و اُ طرف بحثِی اَلَکی چِستِت، 7شُئِه معلمِی شریعت بِبِت، بدون اِکِه بِدانِت چه گُتات، یا از چه چِییَی اینا مطمئن حرف زَتات.
8اَلَه اَما اَدانِم که شریعت خَشِه، اَگَه کسی آنا وَلم استفادَه بِکو. 9و اِئا هم اَدانِم که شریعت اَسِی آدامِی عادل نی، بلکه اَسِی آدامِی بَدکار و نافَرموئِه، اَسِی بیدینیا و گُنَهکاریائِه، اَسِی آنایایی که مکدّس نِهِت و اَسِی آنایایی که کُفر اَگائِت، اَسِی کسِی که اُ با و نَنَشو اَکشِت و اَسِی کاتِلیا، 10اَسِی بیعفتیا و مَردِی که اُمرَییَه اَخَتِت، اَسِی آدامِی که خرید و فروش بَردَه اَکنِت، و اَسِی آدامِی دروغگو و کسِی که کَسام دارُو اَدَخرِت، و هَمینا هم اَسِی هر چِیدو که وَ ضد تعلیم وَلمِه، 11مِ تعلیمی که، طِبک انجیل پُر جلال خدای مُتبارکِه، که اُ دست ما دَدَ بُدِ.
مسیح عیسی اَسِی نجات گُنَهکاریا اُمَ
12خداوندمو مسیح عیسیئا شکر اَکنام که شُ ما کُدرت دَدِ، اَسِی که اُ ما وفادار اُشدانِست و اُ ما اَسِی خدمت خوش تعیین اُشکِه. 13با اِکِه کَبلتَه کُفر مَگُت و آزار و اذیت مَکِه و زور مَگُت، ولی اُ ما رحم بو، اَسِی که تِی بیایمونی از لِی نادونی رفتار مَکِه. 14و فیض خداوندمو، خاد ایمون و محبتی که تِی مسیحْ عیسائِه، اَسِی ما لبریز بو.
15اَبِه اُ اِ حرفا اطمینان بِکنِش و حَکُشِه که کامل کَبول بِبِه، که مسیحْ عیسی اُ اِ دُنیَهوا اُمَ تا اُ گُنَهکاریا نجات هادَ، که بینشو ما از هَمَه گَپتَه هام. 16ولی وَخاطر هَمِ اُ ما رحم بو، تا عیسی مسیح، صبر ناتَمومُش اُ ما، که گَپتَه از هَمَهِ گُنَهکاریا هادام نِشو هادَ، تَ نَمونَهای بام اَسِی کسِی که بعدتَه اُ آنا ایمون اَدارِت و اُ زندگِنِ اَبَدی اَرَسِت. 17اُ مِ پادشاه دوران، اُ آناکِه غیرفانیه، و نابِه بِبِنِش، اُ مِ خدای یَکتا، تا اَبَدالآباد حرمت و جلال بِه؛ آمین!
18اَی بَچُم تیموتائوس، اِ حُکما طِبک نبوّتِی که کَبلتَه دربارَهِ تو بو، اُ تو اَتام تَ وَ کمک آنایا تِی جنگ خَش، بِجَنگِش. 19و اُ ایمون و یَک وجدان خَش بِنُخ. بعضیا وَ رَد کِردَهِ اِ چِییا، کَشتِنِ ایمونشو اُشکِئِستِ. 20هیمِنائوس و اسکندر از اِ دستَهوا هِت، که اُ آنایا مُ دست شیطون دَدِ تَ یاد بِگِرِت که کُفر نِگائِت.
Currently Selected:
نامَه اوّل تیموتائوس 1: LAB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
