نامَه اوّل قُرِنتِنیا 3

جدایی تِی کلیسا

1ولی اَی کاکَیّا، ما اُمنِشابو هَموناکِه خاد آدامِی روحانی حرف اَزنام تُنُمرَه حرف بِزنام، بلکه خاد شما طوری حرف اُمزاد که خاد آدامِی جسمانی و آنایایی که تِی ایمونشو اُ مسیح چُنِ بَچِی کینگِلِه هِت حرف اَزنام. 2ما اُ شما وَ شیر سیر ماکِه نِه وَ خوراک ساگی، اَسِی که آمادَه اِ نِهادی و حتی هَمِ آلَه هم هَنو آمادَه نِهی، 3اَسِی که شما هَنو جسمانی هی. وَختی بینتو حسودی و جَر و جِنجالِه، مَ اِ نِشو نِدَدا که شما جسمانی هی و چُنِ بَکیَه آدامیا رفتار اَکنی؟ 4اَسِی که وَختی یکی اَگِه: «ما مال پولُس هام،» و آن یِکِیدو اَگِه: «ما مال آپولُس هام،» مَ چُنِ بَکیَه آدامِی دنیا نِهی؟

5پَ آپولُس کِی؟ پولُس کِی؟ آنایا فَکَط نوکرِی هِت که خدا شُ هر یَکشو یَک وظیفَه‌ای دَ که شما اُ واسطَهِ آنایا ایمون تُئو. 6ما دونَه اُمکِشت و آپولُس شُ آنا هُو دَ، ولی خدا هاد که سَوزُش اُشکِه. 7مهم نی که کِه اَکَرِ یا کِه هُو اَدَ، مهم کَرِ خدائِه که باعث اَبِه رشد بِکو. 8آناکِه اَکَرِ و آناکِه هُو اَدَ، هر دوتاشو یکی هِت و هر یَکشو کَدِ زحمتی که اَکَشِت، مُزد اَگِرِت. 9اَسِی که اَما همکارِی خدا هم، شما زِمِن خدا هی، عمارت خدا هی.

10طِبک مِ فیضی که خدا شُ ما دَدِ، ما چُنِ یَک بَنّای ماهر، یَک شالدَه‌ای اُمنَه و یِکِیدو لِی مِ شالدَه‌وا، نَک اَکو. هرکَه باید هوشیار بِه که چینایی شُلو نَک اَکو. 11اَسِی که هِسکَه اُشناشابِه وَغیر از مِ شالدَه‌ای که نَدَ بُدِ، شالدَیدو هُنِسِه، مِ شالدَه‌وا عیسی مسیحِه. 12اَلَه اَگَه کسی لِی مِ شالدَه‌وا خاد طِلا یا نُکرَه یا سنگِی گِرو یا تَرکَه یا عَلاف یا کاه ساختمونی نَک بِکو، 13کَر هرکَه آشکار اَبِه، اَسِی که مِ ’رازا‘ مِئا آشکار اَکو، اَسِی که تَش اُ آنا معلوم اَکو و تَش امتحان اَکو که هر کَ چه نوع کَری اُشکِردِ. 14اَگَه کَری که یَک نفر لِی مِ شالدَه‌وا بَنا اُشکِردِ وامانِه، مِ آداما مُزد اَگِرِ. 15اَگَه کَرِ یَک نفر بِسُخِه، مِ آداما ضرر اَکو؛ با اِکِه آنا خوش نجات پیدا اَکو، ولی چُنِ کسی اَبِه که از وسط هَلَمَکِی تَش جون سالم شُ در بُردِ.

16مَ نادانی که شما معبد خدا هی و روح خدا تِی شما آمودِ؟ 17اَگَه کسی معبد خدائا نابود بِکو، خدا مِ آداما نابود شَکو؛ اَسِی که معبد خدا مکدّسِه و شما مِ معبدا هی.

18هِسکَه اُ خوش گول نِزاد. اَگَه کسی از بین شما گَمون اَکو که تِی اِ دُورَه زَمونَه‌وا آدام با حکمتیه، بِهِر مِ آداما نادون بِه، بلکه با حکمت بِه. 19اَسِی که حکمت اِ دُنیَه‌وا از نظر خدا نادونیه. هَموناکِه تِی کتاب ایوب نوشتَه بُدِ: «اُ آدامِی با حکمت گرفتار حُکَه بازِنِ خوشو اَکو.» 20و هَمینا هم تِی کتاب زَبور نوشتَه بُدِ: «خداوند از فکرِی آدامِی با حکمت باخبرِه و اَدو که پوکِه.» 21پَ هِسکَه اُ آدامیا افتخار نِکو. اَسِی که مَچی مال شمائِه، 22چه پولُس، چه آپولُس، چه کیفا، چه دنیا، چه زندگی، چه مرگ، چه هَمِ زَمونا و چه زَمون آیندَه، هَمَه و هَمَه مال شمائِه 23و شما مال مسیح هی و مسیح مال خدائِه.

Currently Selected:

نامَه اوّل قُرِنتِنیا 3: LAB

Highlight

Copy