نامَه اوّل قُرِنتِنیا 2
2
پیغوم اَما مسیح مصلوبِ
1اَی کاکَیّا، ما وَختی تُنحَد اُندام، نِندام تا سِررِ خدائا وَ گات گاتِه حرف زادَ یا وَ حکمت تُنسِه اعلام بِکنام. 2اَسِی که تصمیم اُمگِرِتِستاد بین شما چِی وَغیر از عیسی مسیح نِدانام، مِ هم عیسی مسیح مصلوب. 3ما وَختی تُنحَد اُندام تِی ضعف و تِرس هادام و از تِرس بُری مَلَرزی، 4حرف و پیغوم ما خاد کلمَه‌ئِی کانِع کنندَه حکمت نِهاد، بلکه وَ آشکار بُدَئِه روح خدا و کُدرت هاد، 5تَ پایَه ایمون شما، لِی حکمت آدامی نِبِه، بلکه لِی کُدرت خدا بِه.
حکمت، از روح خدا
6با اِ حالا، اَما بین آدامِی بالغ حرفِی حِکمتا اَگائِم، با اِکِه اِ حکمتی نی که مال اِ دُورَه زَمونَه‌وا بِه یا مال حاکمِی اِ دُورَه زَمونَه‌وا بِه که نابود اَبِت. 7بلکه اَما از حکمت خدا حرف اَزنِم که یَک سِررِ و پِنهونِه، مِ حکمتی که خدا آنا کَبل از شروع دوران، اَسِی جلال اَما تعیین اُشکِه. 8هیچ‌یَک از حاکمِی اِ دُورَه زَمونَه‌وا اِ حِکمتا شُنِفَهمی، اَسِی که اَگَه شُفَهمِدِستاد، خداوند جلالا شُن صلیب ناکِه. 9ولی هَموناکِه تِی کتاب اِشعیای پیغامبر نوشتَه بُدِ:
«چِی که هیچ چَشی اُشنِدِدِ،
هیچ گاشی اُشنِشُنُفتِ،
و اُ فکر هیچ آدامی نِرَسِدِ،
خدا اَسِی کسِی که خاطرُش شُئِه آمادَه اُشکِردِ.»
10خدا اِ چِی‌یَه‌وا اُ واسطَهِ روحُش شُ اَما آشکار کِردِ، اَسِی که روح خدا مَچیا اَدَکاوِ، حتی سِررِی عمیق خدائا. 11اَسِی که کِی که از فکرِی یَک آدام باخبرِه، وَغیر از روح مِ آداما که تِی جونُشِه؟ پَ هَمینا هَم، وَغیر از روح خدا هِسکَه از فکرِی خدا باخبر نی. 12اَلَه اَما روح اِ دُنیَه‌وا مُنِگِرتِه، بلکه روحیا مُگِرِتِه که از طرف خدائِه تَ چِی‌یَی که خدا شُ اَما مُفتی دَدِ، بِفَهمِم. 13و از هَمِ حرف زَتائِم، ولی نِه وَ کلمَه‌ئِی که حکمت آدامی یاد اُشدَدِ، بلکه وَ کلمَه‌ئِی که روح خدا یاد اُشدَدِ؛ و اینایی حکیکتِی روحانیا اُ آدامِی روحانی اَگائِم. 14آدامی که نَفسانیه چِی‌یَی که از روح خدائِه کَبول ناکو، اَسِی که از نظر مِ آداما، نادونیه، و اُشناشابِه آنایائا بِفَهمِه، اَسِی که از طریق روحانیه که اَبِه تشخیصشو هاتِش. 15آدام روحانی دربارَهِ مَچی کضاوت اَکو، ولی هِسکَه اُشناشابِه اُ خوش کضاوت بِکو.
16«اَسِی که، کِی که فکر خداوندا اُشفَهمِدِسبِه
تَ راه و چاه شُ یاد هادَ؟»
ولی اَما فکر مسیحا مُهَه.
Currently Selected:
نامَه اوّل قُرِنتِنیا 2: LAB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
