نامَه اوّل قُرِنتِنیا 4

خدمت حَوارِنیا

1پَ هرکَه باید، اُ اَما وَ اِ دیدَه‌وا که اَما نوکرِی مسیح و مباشرِی هِم که سِررِی خدا اُ آنایا اُ امانت دَدَ بُدِ چَش بِکو. 2علاوَه بَر اِ، از مباشر اِ انتظارا هَه که امانتدار بِه. 3ولی اَسِی ما بُری مهم نی که شما یا هر مَحکَمَه‌ای که دست آدامیائِه اُشبِئِه اُ ما کضاوت بِکو. راستیَتُش حتی ما خوم هم اُ خوم کضاوت ناکنام. 4اَسِی که ما تخصیری تِی خوم نابِنام، ولی اِ اُ ما تبرئَه ناکو. کسی که اُ ما کضاوت اَکو خداوندِه. 5پَ زودتَه از وَختُش کضاوت مَکنی، کَبل از اِکِه خداوند بیاد. مِ خداوندی که چِی‌یَی که آلَه تِی تاریکی پِنهونِه، اُ تِی روشنایی اَدارِ و نیّتِی دِلا آشکار اَکو. مِ موکَوا هرکَه تعریف و تمجید خوش، از خدا اَگِرِ.

6اَی کاکَیّا، ما هَمَهِ اِ چِی‌یَه‌وا دربارَهِ خوم و آپولُس وَخاطر شما اُمگُتِه تَ شما از اَما اِئا یاد بِگِری که، از مِ حَدّی که نوشتَه بُدِ، جلوتَه نِچی. تَ هیچ‌یَک از شما جلووِ آن یکی اُ یِکِیدو نِنازِه. 7اَسِی که، کِ یَک فرقی تِی تو دِدا؟ چه اُتَه که اُ تو دَدَ نِبُدِ؟ پَ اَگَه اُ تو دَدَ بُدِ، اَسِی چه اینا اُ خوت افتخار اَکنِش که اُنگار اُ تو دَدَ نِبُدِ؟

8شما هَمِ آلَه هم هرچی تُئِه، تُهَه! شما هَمِ آلَه هم پولدار بُستی! بدون اَما پادشاهیا بُستی! گاشکَه هم واکعاً پادشاهی تواَکِه تَ اَما هم خاد شما پادشاهی مواَکِه! 9اَسِی که ما اینا فکر اَکنام که خدا اُ اَما حَوارِنیا آخر از هَمَه اُ تماشا اُشنَدِ، چُنِ آدامِی که اُ مرگ محکومِت، اَسِی که اَما جلووِ چَشِ دنیا و فرشتَه‌یّا و آدامیا اُ نمایش نَدَ بُستِم. 10اَما وَخاطر مسیح نادونِم، ولی شما تِی مسیح عاکل هی! اَما ضعیفِم، ولی شما کَوی هی! شما عزیز هی، ولی اَما خوار و ذلیل هِم! 11تا هَمِ ساعتا اَما گُشنَه و تشنَه هِم، جُمَه مُنبار نی و کُتَک خَردَ و لِی‌لام هِم. 12اَما کارگری اَکنِم و وَ دستیامو کَر اَکنِم. وَختی دُشمومو اَتِت، شُنسِه دعای خیر اَکنِم؛ وَختی آزار و اذیتمو اَکنِت، طاکَت اَدارِم؛ 13وَختی اُ اَما تهمت اَزنِت، وَ لوی خَش جواب اَتِم. اَما تُلفَلَئِه دنیا بُدِستِم و اَشغال مَچی بُدِستِم که هَنو هَم هَمینا هِم.

14اِ چِی‌یَه‌وا نانِوِسام تا شرمندَتو بِکنام، بلکه اَنِوِسام تَ چُنِ اولادِی عزیزُم نصیحتتو بِکنام. 15اَسِی که حتی اَگَه تِی مسیح هزاران معلم تُبِه، ولی بابَئِی زیادی تُنی، اَسِی که ما اُ واسطَهِ انجیل تِی مسیح عیسی بای شما بُدام. 16پَ از شما خواهش اَکنام از ما اُلگو بِگِری. 17وَخاطر هَمِئِه که ما تیموتائوسا مُحَدِ شما فِرِستَ، تیموتائوس که تِی خداوند بَچِ عزیز و امانتدار مائِه، تا رَهِی ما تِی عیسی مسیح تُن یاد بیارِ، هَموناکِه آنایائا مَجا تِی هَمَهِ کلیسائیا یاد اَتام.

18مُشتی وَگَمون اِکِه ما دِگَه تُنحَد نِدیام، اُ خوشو اَنازِت. 19ولی اَگَه خدا اُشبِئِه وَ هَمِ زودِنیا تُنحَد دِیام، و نِه فَکَط از حرف اِ آدامِی که اُ خوشو اَنازِت، بلکه از کُدرتشو هم سِرَ دَر دارام. 20اَسِی که پادشاهِنِ خدا وَ حرف نی، بلکه اُ کُدرتِه. 21چه یَکا تُئِه؟ وَ دار تُنحَد بِلگام یا وَ محبت و خاد یَک روح آروم؟

Currently Selected:

نامَه اوّل قُرِنتِنیا 4: LAB

Highlight

Copy