نامَه اوّل قُرِنتِنیا 12
12
عطائِی روحانی
1اَلَه اَی کاکَیّا، دربارَهِ عطائِی روحانی، اُمنائِه بی خبر بی. 2اَدانی وَختی که بُتپرست هادی، اُ طرف بُتِی گُگ، از رَه اُدَر اَچِدی، اَلَه وَ هر طوری که اَبو. 3پَ مَئِه اِئا بِفَهمی که، کسی که اُ واسطَهِ روح خدا حرف اَزاد، هِسوَخت ناگِه: «عیسی لعنت بُدَئِه!» و هِسکَه وَغیر از اُ واسطَهِ روح کدّوس خدا اُشناشابِه بِگِه: «عیسی خداوندِه.»
4اَلَه، عطائیا مَ رَکَم هِت، ولی روح، هَم مِ روحائِه؛ 5و خدمتیا مَ رَکَم هِت، ولی خداوند مِ خداوندائِه؛ 6و کَریا مَ رَکَم هِت، ولی خدا هَم مِ خدا وائِه که کُوّت هَمَهِ اِ کَریَهوا اُ هَمَه اَدَ.
7آشکار بُدَئِه روح خدا اُ هرکَه اَسِی منفعت هَمَه دَدَ بُدِ. 8اَسِی که اُ واسطَهِ روح خدا اُ یکی کلوم حکمت دَدَ اَبِه و اُ یِکِیدو اُ واسطَهِ مِ روحا، کلوم آگاهی دَدَ اَبِه 9و اُ کَسِیدو اُ واسطَهِ مِ روحا، ایمون دَدَ اَبِه و اُ یِکِیدو اُ واسطَهِ مِ روحا، عطائِی شفا دَدَ، دَدَ اَبِه. 10اُ یَک نفرِیدو کُدرت اَنجوم معجزهیّا دَدَ اَبِه، اُ یِکِیدو نبوّت کِردَ، اُ یِکِیدو کُدرت تشخیص روحیا دَدَ اَبِه. اُ یَک نفرِیدو حرف زادَ وَ زابُنِی مَ رَکَمی و اُ یِکِیدو ترجمه مِ زابُنیَهوا دَدَ اَبِه. 11هَمَهِ اِیا اُ واسطَهِ یَک روح و مِ روحا کُوّت دَدَ اَبِه، مِ روحی که طِبک خواستَهِ خوش اُ آنایا تکسیم اَکو، و اُ هرکَه یَک و یَک اَدَ.
یَک بَدن خاد عضوِی زیاد
12اَسِی که هَموناکِه بَدن یکیه، و عضوِی زیادی اُشَه؛ و هَمَهِ عضوِی بَدن، با اِکِه بُری هِت، یکی هِت. در مورد مسیح هم اینائِه. 13اَسِی که هَمَهِ اَما، تِی یَک روح غُسل تعمید مُگِرِت تا یَک بَدن بِبِم؛ و اُ هَمَمو از یَک روح دَدَ بو تا واخرِم، چه یهودی و چه یونانی، چه غُلوم و چه آزاد. 14اَسِی که بَدن نِه از یَک عضو، بلکه از عضوِی زیادی تشکیل بُدِ. 15اَگَه پا بِگِه، «اَسِی که ما دست نِهام، مال بَدن نِهام،» اِ دلیل نابِه که آنا دِگَه یَک کِسمت از بَدن نِبِه. 16و اَگَه گاش بِگِه، «اَسِی که ما چَش نِهام، مال بَدن نِهام،» اِ دلیل نابِه که آنا دِگَه یَک کِسمت از بَدن نِبِه. 17اَگَه کُل بَدن چَش هاد، چینا اَبو بِشناوِش؟ و اَگَه کُل بَدن گاش هاد، چینا اَبو بو بِکَشِش؟ 18ولی اوناکِه هَه، خدا هَموناکِه شَئِستِه عضویَهوا یَک وَ یَک، تِی بَدن کَرار اُشدَ. 19اَگَه هَمَهِ اِ عضویَهوا یَک عضو هاد، بَدن کُ هاد؟ 20ولی هَموناکِه هَه عضویا بُری هِت، با اِ حالا بَدن یکیه. 21چَش اُشناشابِه اُ دست بِگِه، «نیازی مُ تو نی!» و سِرَ هم اُشناشابِه اُ پَییا بِگِه، «نیازی مُ شما نی!» 22بَرعکس، مِ عضوِی از بَدن که ضعیفتَه اُ نظر دِئِت، واجبتَه هِت. 23و مِ عضوِی از بَدن که گَمون اَکنِم حرمتشو کامتَئِه، بِشتَه حرمتشو اَکنِم، و اُ عضوِی از بَدن که جوهو نِهِت بِشتَه اَرَسِم؛ 24در حالی که عضوِی جوهوتَئِه بَدن اَما نیازی شُنی که اینا اُ آنایا بِرَسِم. ولی خدا بَدنا طوری مرتب نَک اُشکِردِ که اُ عضوِی که حرمتشو کامتَئِه، بِشتَه حرمتشو بِکنِم، 25تَ جدایی تِی بَدن نِفتِه، بلکه عضویا وَ یَک اندازَه مواظب یَکُدو بِت. 26اَگَه یَک عضوی درد اَکَشِه، هَمَهِ عضویا اُمرَییَه درد اَکَشِت؛ و اَگَه اُ یَک عضوی حرمت هُنِسِت، هَمَه عضویا اُمرَییَه خارامی اَکنِت.
27اَلَه، شما بَدن مسیح هی و هر یَکتو یَک وَ یَک عضویاش هی. 28خدا تِی کلیسا، اوّل حَوارِنیا، دوّم کسِی که نبوّت اَکنِت، سوّم معلمیا؛ بعد کُدرت معجزهیّا، بعد از آنا عطائِی شفا دَدَ، کمک کِردَ، مدیریت و حرف زادَ وَ زابُنِی مَ رَکَمی کَرار اُشدَدِ. 29مَ هَمَه حَواری هِت؟ مَ هَمَه نبوّت اَکنِت؟ مَ هَمَه معلمِت؟ مَ هَمَه کُدرت معجزه کِردَ شُهَه؟ 30مَ هَمَه عطائِی شفا دَدَ شُهَه؟ مَ هَمَه وَ زابُنِی غیر حرف اَزنِت؟ مَ هَمَه ترجمه اَکنِت؟
31ولی شما وَ غیرت عطائِی بَراتَئی تُبِئِه. و ما یَک رَهی تُن نِشو اَتام که عالیتَرینِه.
Currently Selected:
نامَه اوّل قُرِنتِنیا 12: LAB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
