نُومَه وِ کلیسای روم 13
13
مطیعِ قدرتیا حاکم
1هَر کَه مطیعِ قدرتیا حاکم با. سی یَکه هیچ قدرتی نی مَر دِ لا خدا، قدرتیائی هَم کِه هیسِن، خدا نِئاشُونَه. 2پس هَر کَه وِ تیشکِ قدرتی وِریسَه، وِ تیشکِ چیئی کِه خدا نِئایَه وِریسائَه، وَ وِنُو کِه چِنی میکَن، داوَری موئَن. 3سی یَکه وِنُونی کِه رَه راس مِیرَن دِ حاکمیا هِراسی نارَن، اما خِلافکاریا دِ وِنُو زَلَهشُو مِیرَه. میحای دِ صِحُو قدرت هِراسی نائاشتوئی؟ پس او چیئی کِه دُرِس اَ، بَک کِه تو نِه تحسین میکَه، 4سی یَکِه وَه پاکارِ خدا اَ سی خیرِ تو. اما اَر کارِ خِلاف بَکی، زَلَهت رُوئَه، سی یَکِه او بیخُودی شِمشیر سَرِ قِی نَوَستَه. سی یَکِه او پاکارِ خدا اَ، کَسی اَ کِه سی خدا تقاص مِئیرَه وَ غَضُوِ خدا نِه میارَه وِ ری خِلافکاریا. 5پس آیِم بایِس مطیع با، نَه تَنیا سی دیری دِ غَضُوِ خدا، بَلکِم وِ سُنَه وِجدان هَم.
6سی یَکِه وِ ایی سُنَه هَم، شِما مالیات مِئیت، سی یَکِه صِحُویا قدرتیا پیشکاریا خدا اَن، وَ ویردارِ هِه ایی چیا هیسِن. 7حَقِ هَر کَه نِه وِش بِئیت: اَر خَراج اَ، خَراج بِئیت، اَر مالیات اَ، مالیات بِئیت، اَر عزت اَ، عزتِشُو نِه داشتوئیت، وَ اَر قُرپ اَ، قُرپشُو نِه داشتوئیت.
وِ جا اُوِردِهنِ شریعت دِ رَه محبت
8زیرِ دِینِ هیچ کَه نوئیت، غیرِ یَکِه یَکتِری نِه دوس داشتوئیت، سی یَکِه هَر کَه یَکی هَنی نِه دوس داشتوئَه شریعتِ نِه وِ جا اُوِردَه. 9سی یَکِه هُدیا "زِنا نَکُو، قتل نَکُو، دُوزی نَکُو، طمع نَکُو"، وَ هَر هُدی هَنی کِه هی، خلاصَه موئَه دِ ایی کلُوم کِه:«هُمساتِه هِه چی خُوت دوس داشتو.» 10محبت، وِ هُمساش گَنی نِمیکَه؛ پس محبت، شریعتِ نِه تمُومِکمال وِ اَنجُوم میرَسُونَه.
11عِلاوَه بَر یَه شِما دُونیت کِه دِ چِه زِمُونی وِ سَر مُوریت، کِه ایمدال ساعتِش رَسِسَه کِه دِ خُو وِریسیت. سی یَکِه ایسِه دِ قیاس وا زِمُونی کِه ایمُو اُوِردیم، نجات وِ مُو نِزیکتِر بییَه. 12شُو اُومایَه وِ سَر؛ روز نِزیک اَ. پس بیایت کاریا گَنِ تاریکی نِه بُونیم دیر وَ زِرِهِ نیرِ نِه بَکیم دِ وَر. 13بیایت چِنُو دُرِس رفتار بَکیم کِه مَرِس هایم دِ روشنائی روز، نَه دِ عیاشی وَ مَسی، نَه دِ بیعفتی وَ هَوَسبازی، نَه دِ قیمِرافَه وَ حَسیدی. 14بَلکِم عیسی مسیح خداوندِ نِه بَکیت دِ وَر، وَ سی هَوَسیا جسم تیارِک نِئینیت تا حاسَهیا جسمِ نِه بیاریت وِجا.
Currently Selected:
نُومَه وِ کلیسای روم 13: NLB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company