نُومَه وِ کلیسای روم 14
14
یَکتِری نِه قضاوت نَکیت
1کسی نِه کِه ایمُونِش ضعیف اَ، دِ مینِ خُوتُو رَه بِئیت، اما نَه یَکِه دِ سَرِ عقیدَهیا دَمرِگَه بَکیت. 2یَکی عقیدَه دارَه هَر چیئی نِه بُحُورَه، دِ حالیکِه وَه کِه ضعیف اَ تَنیا بَلگِواش مُوحُورَه. 3وَه کِه همَه چی مُوحُورَه نَبایِس وَه نِه کِه نِمُوحُورَه خوار بَکَه، وَ وَه کِه هَر چیئی نِمُوحُورَه، نَبایِس وَه نِه کِه همَه چی مُوحُورَه قضاوت بَکَه، سی یَکه خدا او نِه قبول کِردَه. 4تو کیئی کِه پاکارِ یَکی هَنی نِه قضاوت میکی؟ یَکه او دِ ایمُونِش بِفتَه یا بَمُونَه وِ اربابِش مربوط اَ. وَ او پایار موئَه، سی یَکِه خداوند تُونَه او نِه پایار بَکَه.
5یَکی یِه روزِ نِه دِ روزِ هَنی بیتِر دُونَه، دِ حالیکِه یَکی هَنی گِردِ روزیا نِه هِه چی یَک دُونَه. هَر کَه بایِس دِ فکرِ خُوش دِ بارَه عقیدَهش خاطرجمع با. 6وَه کِه قُرپِ یِه روزِ خاصِ نِه نِئَه میارَه، سی قُرپِ خداوند چِنی میکَه. وَه کِه مُوحُورَه، سی قُرپِ خداوند مُوحُورَه، سی یَکه خدا نِه شکر میکَه، دِ حالیکِه وَه کِه نِمُوحُورَه، سی قُرپِ خداوند نِمُوحُورَه وَ خدا نِه شکر میکَه. 7سی یَکه هیچ کُوم دِ اِیما سی خُوش زِنِهئی نِمیکَه وَ هیچ کُوم دِ اِیما سی خُوش نِمیمیرَه. 8سی یَکِه اَر زِنِهئی بَکیم سی خداوند زِنِهئی میکیم، وَ اَر بَمیریم، سی خداوند میمیریم. پس چِه زِنِهئی بَکیم، چِه بَمیریم، هینِ خداوندیم. 9سی یَکه مسیح هِه وِ ایی سُنَه مُرد وَ دِ سَر زِنَه بی، تا خداوندِ هَم مُردَهیا وَ هَم زِنَهیا با. 10تو سی چی بِرارِتِه قضاوت میکی؟ یا تو، سی چی بِرارِتِه خوار میکی؟ سی یَکه گِردِ اِیما دِ بِرُووَرِ تختِ داوَری خدا مِسیم. 11سی یَکه دِ کِتُوِ اِشعَیا نبی نیسَنَه بییَه:
«خداوند مُوئَه: وِ حیاتِ خُوم قِسَم کِه
هَر زُونیای دِ بِرُووَرِ مِه نِم موئَه،
وَ هَر زِوُونی وِ خدا اِقرار میکَه.»
12پس هَر کُوم دِ اِیما حِسُو خُوشِه وِ خدا پس مِیئَه.
13پس بیایت دِ ایسِه وادِما یَکتِری نِه قضاوت نَکیم، بَلکِم قَصت بَکیت کِه هرگز بَردی کِه باعثِ کُفتِسِه وِ زِمی موئَه یا سَدی دِ وَرِ رَه بِرارِ خُوتُو نِئیلیت. 14مِه دِ عیسی خداوند دُونِم وَ قانِع بیمَه کِه هیچ چی خود وِ خود نِجِس نی، اما سی کسی کِه وَه نِه نِجِس دُونَه، نِجِس اَ. 15سی یَکِه اَر وا چیئی کِه مُوحُوری بِرارِت اذیت موئَه، دَ تو وا محبت رفتار نَکِردیَه. وا چیئی کِه مُوحُوری، کَسی نِه کِه مسیح سیش مُرد، هِلاک نَکُو. 16پس نِئیلیت وِ او چیئی کِه شِما خو دُونیت، گَن بُوئَن. 17سی یَکه پاتشائی خدا حَردِه وَ وِراشَنِه نی، بلکِم صالحبییِه وَ صُولوُسِلامتی وَ شایی دِ روحالقدس اَ. 18هَر کَه مسیحِ نِه چِنی خدمت بَکَه، خدا قبولِش دارَه وَ مردِم هَم تصدیقِش میکَن.
19پس بیایت دِ دُمِ او چیئی بایم کِه باعثِ برقِراری صُولوُسِلامتی وَ تقویتِ ایمُونِ یَکتِری موئَه. 20سی حَردِهنِ خُوراک، کارِ خدا نِه خِرُو نَک! وِ راسی همَه چی پاک اَ، اما سی وَه کِه وا حَردِهنِ چیئی باعثِ اُفتایِهنِ یَکی موئَه، کارِ دُرِسی نی. 21خو اَ کِه گوشت نُحُوری یا شِرُو وِرنَراشُونی یا کاری نَکی کِه باعثِ اُفتایِهنِ بِرارِت با. 22ایمُونِتِه دِ بارَه ایی چیا، مابِینِ خُوت وَ خدا نِئَهدار. خُشالِ وَه کِه سی او چیئی کِه تصدیق میکَه، خُوشِه قضاوت نَکَه. 23اما وَه کِه دو وِ شَک اَ، اَر بُحُورَه محکوم موئَه، سی یَکِه وا ایمُو نَحَردَه. سی یَکِه هَر چیئی کِه دِ ری ایمُو نوئَه، گُنَهآ.
Currently Selected:
نُومَه وِ کلیسای روم 14: NLB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company