انجیلِ مَرقُس 16
16
زِنَه بییِهنِ عیسی
1دِما روزِ شَبات، مریمِ مَجدَلیَه وَ سالومَه وَ مریم، داآ یعقوب، سدر وَ کافور خَریئِن تا رُوئَن وَ جِنازَه عیسی نِه تَدهین بَکَن. 2پس دِ روزِ اول هفتَه، موقَع لیسکِ اَفتُو، رَتِن والا مقبِرَه. 3وِنُو وا یَک میگُتِن: «ایسِه کی هُوگِلَه نِه سیمُو دِ وَرِ مقبِرَه پِل مِیئَه؟» 4اما هِه کِه سِیل کِردِن، دیئِن او هُوگِلَه کِه خیلی هَم گَپ بی، دِ جِلو مقبِرَه پِلِسی وِ لائی. 5هِه کِه رَتِن مینِ مقبِرَه، جِوُونی نِه دیئِن کِه نِشِسی وِ لا راسِ مقبِرَه وَ رَدا اِسبیئی دِ وَر داشت. دِ دیئِهنِش زَرتِلاق بییِن. 6جِوُونِکَه وِشُو گُت: «زَلَهتُو نَرُوئَه. شِما مِنی عیسی ناصری میکیت کِه کَشیئِنِش وِ صلیب. او زِنَه بییَه؛ ویچِه نی. جائی کِه جِنازَهشِه نِئایینی، سِیل بَکیت. 7ایسِه، رِیت وِ شاگردیاش وَ وِ پطرس بُوئیت کِه او دِ نِها شِما مِیرَه وِ جلیل؛ دِ اوچِه او نِه مِئینیت، چِنُو کِه نِهاتِر وِتُو گُتی.» 8پس زَنُو کِردِن وِ دَر، دِ مقبِرَه جِیستِن، سی یَکِه رِکَه اُفتایی وِ جُونِشُو وَ ماقِشُو بُردی. وِنُو وِ هیشکَه چیئی نَگُتِن، سی یَکه زَلَهشُو مِیرَت.
9هِه کِه عیسی شَفَقِ صُو، دِ روزِ اولِ هفتَه زِنَه بی، اول وِ مریمِ مَجدَلیَه ظاهر بی، وَه کِه عیسی هفت دیوِ نِه دِش کِردی وِ دَر. 10مریم هَم رَت وِ شاگردیا عیسی کِه عازیَتدار بییِن وَ میگِریوِسِن، خَوَر دَه. 11اما وِنُو هِه کِه اِشنَفتِن کِه عیسی زِنَه بییَه وَ مریم او نِه دیئَه، باوَر نَکِردِن.
12دِما یِنُو، عیسی خُوشِه وا قیافِهای هَنی وِ دو نفر دِ وِنُو کِه والا آبادییا مِیرَتِن، نِشُو دَه. 13او دو تا وِرگَشتِن وَ باقی نِه دِ ایی جریان واخَوَر کِردِن، اما حرفِ وِنُو نِه هَم باوَر نَکِردِن.
14دِما وَه عیسی خُوشِه وِ او یازَه نفر، هِه چِنُو کِه داشتِن نُو میحَردن، نِشُو دَه وَ وِنُو نِه وِ سُنَه بیایمُونی وَ سختدِلیشُو مِنا کِرد، سی یَکه قِصَه وِنُونی کِه او نِه دِما زِنَهبییِهنِش دیئِن، باوَر نَکِردِن. 15اوسِه وِشُو گُت: «وِ سَرتاسَرِ دنیا رِیت وَ ایی خَوَرِ خُوشِه انجیلِ نِه وِ گِردِ مردِمِ دنیا اِعلُوم بَکیت. 16هَر کَه ایمُو بیارَه وَ تعمید بِئیرَه، نجات پیا میکَه. اما هَر کَه ایمُو نیارَه، محکوم موئَه. 17وَ ایی نِشُونَهیا واردِ ایمُوداریا هی: وِ نُومِ مِه دیویا نِه میکَن وِ دَر وَ وِ زِوُونیا جدید قِصَه میکَن 18وَ وا دَسیاشُو ماریا نِه مِئیرَن، وَ اَر ژَرِ هِلاهِلی وِراشِنَن، بِلائی نِمِئیرَهشُو، وَ دَسیاشُو نِه وِ مَریضیا مینِیئَن وَ وِنُو شفا مِئیرَن.»
19اوسِه عیسی خداوند دِما وَه کِه ایی قِصَهیا نِه وِشُو گُت، بالا بُردِس وِ آسمُو وَ نِشِس وِ دَسِ راسِ خدا. 20وِنُو رَتِن وِ دَر، دِ همَه جا موعظَه میکِردِن، وَ خداوند وِ کاریاشُو برکت مِیدَه وَ کلُومِشِه وا نِشُونَهیائی کِه واردِشُو بی، تائید میکِرد.
Currently Selected:
انجیلِ مَرقُس 16: NLB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
