انجیلِ مَرقُس 14
14
توطعَه قَتلِ عیسی
1دو رو هَنی مَنی وِ عیدِ پِسَخ وَ عیدِ فَطیر. سَرُونِ کاهِنیا وَ معلمیا تورات دِ دُمِ رَئی بییِن کِه عیسی نِه وا کِلَکی گرفتار بَکَن وَ بَکُشَن، 2سی یَکه میگُتِن: «دِ روزیا عید نِموئَه، نَکَه مردِم شورش بَکَن.»
3هِه کِه عیسی دِ آبادی بِیتعَنْیا دِ حُونَه شَمعونِ جُذامی نِشِسی وِ سَرِ سِفرَه، زِئنِهای وا ظرفِ مرمری دِ رِغُونِ گِرُو قیمَتی، دِ سنبلِ خالص، اُوما وِ تِه عیسی وَ ظرفِ نِه اِشکِنا، رِغُو نِه رِخت وِ ری سَرِ عیسی. 4قَری دِ وِنُو کِه اوچِه بییِن تَش دِ سَرِشُو رَت، وا یَکتِری گُتِن: «سی چی بایِس ایی رِغُو، چِنی دِ بین رُوئَه؟ 5سی یَکه مِوی وَه نِه بالا سیصد دینار فِرُوخت وَ پیلِشِه دَه وِ ژاریا.» وَ سخت توپِسِن وِ او زِئنَه. 6اما عیسی وِشُو گُت: «او نِه بِئیلیت وِ حالِ خُوش. سی چی میچِزنیتِش؟ او کارِ خوئی دِ حَقِ مِه کِردَه. 7ژاریا نِه همیشَه وا خُوتُو داریت وَ هِه کِه باحایت تُونیت وِشُو کمک بَکیت، اما مِه همیشَه واردِتُو نیسِم. 8ایی زَ او چیئی کِه دِ دَسِش مِیما، کِرد. او وا ایی کار، بدنِ مِه نِه دِ نِهاتِر سی کفنوُدفن، تدهین کِرد. 9وِ راسی وِتُو مُوئِم، دِ گِردِ دنیا، هَر جا ایی خَوَرِ خُوشِ پاتشائی خدا اِعلُوم با، کارِ ایی زَ هَم وِ یایِ او وازگو موئَه.»
خیانتِ یهودا
10اوسِه یهودا اَسخَریوطی کِه یَکی دِ او دُوازَه شاگرد بی، رَت وِ تِه سَرُونِ کاهِنیا تا عیسی نِه بُونَه دِ قَپِشُو. 11وِنُو هِه کِه حرفیا یهودا نِه اِشنَفتِن، خُشال بییِن وَ وِ او وعدَه پیل دَن. پس او دِ دُمِ مِجالی بی تا عیسی نِه بُونَه دِ گیر.
شُومِ آخِر
12دِ اولین روزِ عیدِ فَطیر کِه بِرَه پِسَخِ نِه قُرُونی میکَن، شاگردیا عیسی دِش پُرسیئِن: «میحای کجا رِیم سیت تیارِک بِئینیم تا شُومِ پِسَخِ نِه بُحُوری؟» 13او دو نفر دِ شاگردیاشِه کِل کِرد وَ وِشُو گُت: «رِیت وِ شهر؛ دِ اوچِه پیائی وا کیزَه اُوی مِئینیت. رِیت دِ دُمِش. 14هَر جا کِه رَت، وِ صِحُو او حُونَه بُوئیت، ”اُستاد مُوئَه، مِمُوحُونَه مِه ها کجا تا شُومِ پِسَخِ نِه وا شاگردیام بُحُورِم؟“ 15وَ او بالاحُونَه گَپ وَ فرشکِردَه وَ آمادهای وِتُو نِشُو مِیئَه. دِ اوچِه سیمُو تیارِک بِئینیت.» 16شاگردیا رَتِن وِ شهر، همَه چی نِه هِه چِنُو کِه وِشُو گُتی پیا کِردِن وَ پِسَخ نِه تیارِک دیئِن.
17هِه کِه بی وِ شُو، عیسی واردِ دُوازَه شاگردِش رَت وِ اوچِه. 18هِه کِه نِشِسینی وِ سَرِ سِفرَه وَ خوراک میحَردِن، عیسی گُت: «وِ راسی وِتُو مُوئِم کِه یَکی دِتُو کِه وا مِه خوراک مُوحُورَه مِه نِه مُونَه دِ قَپِ دُشمِه.» 19وِنُو غُصَهدار بییِن وَ یَکوِیَک دِش پُرسیئِن: «مِه کِه او کَس نیسِم؟» 20عیسی وِشُو گُت: «یَکی دِ شِما دُوازَه نفر اَ، هِه وَه کِه نُونِ خُوشِه وا مِه مِیزِنَه دِ جُومیلَه. 21کُرِ انسان هِه چِنُو کِه دِبارَه او نیسَنَه بییَه، میرَه، اما هِرو سی او کَس کِه کُرِ انسانِه تسلیمِ دُشمِه میکَه. سی او بیتِر بی کِه هرگز وِ دی نِمِیما.»
22هَنی سرگرمِ حَردِه بییِن کِه عیسی نُو نِه گِرِت وَ دِما شکرکِردِه، کُت کُت کِرد وَ دَه وِ شاگردیا وَ گُت: «بِئیریت، یِنَهآ بدنِ مِه.» 23اوسِه پیالَه نِه وِرداشت وَ دِما شکرکِردِه، وِشُو دَه وَ همَه دِش وِراشَنِن. 24وَ وِشُو گُت: «یِنَهآ خینِ مِه سی عَهدِ جدید کِه وِ سُنَه خیلییا میریزیَه. 25وِ راسی وِتُو مُوئِم کِه دِ مَصولِ مُو دَ وِرنِمیراشنِم تا روزی کِه وَه نِه دِ پاتشائی خدا، تازَه وِراشِنِم.»
26اوسِه دِما یَکِه سِروئی حَنِن، والا کُوء زِیتُو اُفتان وِ رَه.
عیسی حاشاکِردِهنِ پطرسِ نِه پیشگوئی میکَه
27عیسی وِشُو گُت: «گِردِ شِما دِ رَه وِل موئیت سی یَکه نیسَنَه بییَه،
«”چوپُو نِه مِیزِنِم
وَ کُوَهیا دِ یَک تَرفِهتین موئَن.“
28اما دِما یَکه زِنَه بیئِم، دِ نِها شِما مِیرِم وِ شهرِ جلیل.» 29پطرس وِش گُت: «حتی اَر همَه دِ رَه وِل بان، مِه وِل نِموئِم.» 30عیسی وِش گُت: «وِ راسی وِت مُوئِم کِه هِه اِیمشُو، وِرَز یَکِه کِلَهشیر دو گِل بُنگ وِرآرَه، سِه گِل مِه نِه حاشا میکی!» 31اما پطرس قاطع گُت: «اَر لازم با وات بَمیرِم، هیچ حاشات نِمیکِم.» باقی شاگردیا هَم هِه چِنی گُتِن.
باغِ جِتسیمُونی
32اوسِه رَتِن وِ جائی وِ نُومِ جِتسیمُونی وَ دِ اوچِه عیسی وِ شاگردیاش گُت: «بَنشینیت دِ ایچِه، تا مِه دعا بَکِم.» 33اوسِه پطرس وَ یعقوب وَ یوحنا نِه وا خُوش بُرد وَ وا پِژارَه وَ دِلدِهولی، وِشُو گُت: 34«دِ زورِ غُصَه، ها میمیرِم. بَمُونیت ویچِه وَ بیار بایت.» 35اوسِه قَدِ چَنی رَت وا نِهاتِر وُ سَر نِئا وِ زِمی وَ دعا کِرد کِه اَر موئَه او ساعت دِ سَرِش رَد با. 36عیسی چِنی گُت: «اَبا، بُوَه، همَه چی سیتُو ممکن اَ. ایی پیالَه نِه دِ مِه دیر کُو، اما نَه وِ حاسِ مِه بَلکم وِ اِرادَه تو.» 37هِه کِه وِرگَشت، وِنُو نِه دی کِه هان دِ خُو. اوسِه وِ پطرس گُت: «شَمعون، حُفتیئیَه؟ نَکُمِسی ساعتی بیار بَمُونی؟ 38بیار بایت وَ دعا بَکیت تا دِ اِمتحُو نِفتیت. روح شُوق دارَه اما جسم ضعیف اَ.» 39پس گِلی هَنی رَت وَ هِه او دعا نِه کِرد. 40هِه کِه وِرگَشت، وِنُو نِه هِه چِنُو دِ خُو دی، سی یَکه چَشیاشُو خیلی سنگین بیئی. وِنُو نُئُونِسِن چی وِش بُوئَن. 41اوسِه عیسی سی گِلِ سِئِم اُوما وِ تِه شاگردیا وَ وِشُو گُت: «یعنی هَنی هَم حایت دِ خُو وَ استراحت میکیت؟ دَ بَسِتُونَه! موقَعکَهش رَسِسَه. ایسِه کُرِ انسان وِ دَسِ گُنَهکاریا تسلیم موئَه. 42وِریسیت وا راس، رِیمُو. هِیسِه وَه کِه مِه نِه مُونَه دِ گیر، دِ رَه مِیرَسَه.»
گرفتار بییِهنِ عیسی
43عیسی هِه چِنُو قِصَه میکِرد کِه یِگِلی یهودا، یَکی دِ او دُوازَه شاگرد، واردِ قَری گُرز وِ دَس وَ شِمشیر وِ دَس، دِ لا سَرُونِ کاهِنیا وَ معلمیا تورات وَ مشایخ اُومان. 44وَه کِه او نِه تسلیم کِرد وِ هُمرایاش عِلامتی دِئی وَ گُتی: «وَه نِه کِه ماچ میکِم، هِه وِنَهآ؛ او نِه بِئیریت وَ وا حَواس جمعی بُوریت.» 45پس هِه کِه رَسِس وِ اوچِه، جَلدی وِ عیسی نِزیک بی وَ گُت: «اُستاد!» وَ او نِه ماچ کِرد. 46اوسِه او آیِمیا رِختِسِن وِ سَرِ عیسی، او نِه گِرِتِن. 47اما یَکی دِ وِنُو کِه واردِ عیسی بی شِمشیر کَشی، ضَروَتی وِ پاکارِ کاهِنِ اعظم زَه وَ گوشِ او نِه بُری. 48عیسی وِشُو گُت: «مَر مِه دُوزِم کِه وا گُرز وَ شِمشیر اُومایتَه سی گِرِتِهنِم؟ 49هَر رو دِ وَرِ چَشِتُو دِ مینِ معبد تعلیم میدَم وَ مِه نِه نَگِرِتیت. اما کِتُویا مقدس بایِس حقیقت پیا بَکَه.» 50اوسِه گِردِ شاگردیا، او نِه نِئان، جِیستِن.
51جِوُونی کِه تَنیا یِه لُنگی دِ وَر پیچَنی، دِ دُمِ عیسی اُفتا وِ رَه. او نِه هَم گِرِتِن، 52اما او هَر چی کِه دِ وَر پیچَنی نِئا وَ لُختِ بِرِنَه جِیست.
محاکمَه دِ حضورِ شورایِ یهود
53عیسی نِه بُردِن وِ تِه کاهِنِ اعظم. دِ اوچِه گِردِ سَرُونِ کاهِنیا وَ مشایخ وَ معلمیا تورات جمع بیئینی. 54پطرس هَم دیرآدیر رَت دِ دُمِ عیسی تا رَسِس وِ مینِ حُوشِ حُونَه کاهِنِ اعظم. پس دِ اوچه، واردِ نِگَبُونیا نِشِس دِ وَرِ تَش، تا خُوشِه گرم بَکَه. 55سَرُونِ کاهِنیا وَ گِردِ اَهلِ شُورا دِ دُمِ پیاکِردِهنِ شاهادَتی دِروئی وِ تیشکِ عیسی بییِن تا او نِه بَکُشَن، اما هیچی پیا نَکِردِن. 56سی یَکه هَر چَن خیلییا شاهادَتییا دِرو وِ تیشکِ عیسی دَن، اما شاهادَتییاشُو وا یَک، یَکی نِوی. 57اوسِه قَری اُومان وا وَر وَ دِ دِرو وِ تیشکِ او شاهادَتی دَن، گُتِن: 58«اِیما خُومُو اِشنَفتیم کِه میگُت، ”ایی معبدِ نِه کِه ساختَه دَسِ بشر اَ، خِرُو میکِم وَ دِ سه رو، معبدی هَنی بِنا میکِم کِه ساختَه دَسِ بشر نوئَه.“» 59حتی وا ایی حال شهادَتییا وِنُو هَم وا یَک، یَکی نِوی. 60اوسِه کاهِنِ اعظم وِریسا وَ دِ بِرُووَرِ همَه دِ عیسی پُرسی: «هیچ جُئُو نِمِئی؟ یَه چینَه کِه وِ تیشکِ تو شاهادَتی مِیئَن؟» 61اما عیسی هِه چِنی بیکِش مَن وَ جُئُوی نَدَه. یِه گِل هَنی کاهِنِ اعظم دِش پُرسی: «یعنی تو مسیحِ موعود، کُرِ خدای متبارکی؟» 62عیسی وِش گُت: «هیسِم، وَ کُرِ انسانِه مِئینیت کِه وِ دَسِ راسِ قدرتِ متعال نِشِسَه وَ وا اُوریا آسمُو میایَه.» 63اوسِه کاهِنِ اعظم یَخَه خُوشِه دِرَن وَ گُت: «دَ چِه هُوجَه وِ شاهد اَ؟ 64کِفرِشِه اِشنَفتیت. حُکمِتُو چینَه؟» وِنُو گِردِشُو حُکم دَن کِه سِزاش مُردِهنَه. 65اوسِه قَری نِئان وِ تُفکَهوَنِه وِش؛ وِنُو چَشیاشِه بَستِن وَ هِه چِنُو کِه او نِه مِیزَن، میگُتِن: «نبوت کُو!» نِگَبُونیا هَم او نِه گِرِتِن وَ زَن.
حاشا کِردِهنِ پطرس
66هِهکه پطرس هَنی وِ هار، دِ مینِ حُوش بی، یَکی دِ کنیزیا کاهِنِ اعظم هَم اُوما ووچِه 67وَ او نِه دی کِه دِ وَرِ تَش خُوشِه گرم میکَه. او زَ خو گِز بُری وِش وَ گُت: «تو هَم واردِ عیسی ناصری بیئی.» 68اما پطرس حاشا کِرد وَ گُت: «نُئُونِم وَ نِمیفَمِم چی مُوئی!» یَه نِه گُت وَ رَت وِ مینِ دالُونِ حُونَه. هِه دِ او موقَع کِلَهشیر بُنگ وِراُوِرد. 69گِلی هَنی، چَشِ او کنیز اُفتا وِش وَ وِ وِنُو کِه اوچِه اِیسایینی، گُت: «ایی پیا یَکی دِ وِنُونَه.» 70اما پطرس دُوارَه حاشا کِرد. دِما گِری، وِنُو کِه اوچِه اِیسایینی، یِه گِل هَنی وِ پطرس گُتِن: «بیگِمُو تو هَم یَکی دِ وِنُونی، سی یَکِه جَلیلی ایی.» 71اما پطرس نِئا وِ لَعنوُگَنکِردِه وَ قِسَم حَرد، گُت: «ایی پیا نِه کِه مُوئیت، نِمیشناسِم!» 72هِه دِ او موقَع، کِلَهشیر سی گِلِ دوئِم بُنگ وِراُوِرد. اوسِه قِصَهیا عیسی اُوما وِ ویرِ پِطرُس کِه وِش گُتی: «وِرَز وَه کِه کِلَهشیر دو گِل بُنگ وِرآرَه، سِه گِل مِه نِه حاشا میکی». پس دِلِش اِشکِس وَ روآرو گِریوِس.
Currently Selected:
انجیلِ مَرقُس 14: NLB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
