انجیلِ مَرقُس 13
13
نِشُونَهیا آخِرِ ایی زِمُو
1هِه کِه عیسی دِ معبدِ میکِرد وِ دَر، یَکی دِ شاگردیاش وِش گُت: «اُستاد، سِ! چِه بَردیا باشِکوهی وَ چه بِنایا باشِکوهی!» 2عیسی وِش گُـت: «گِردِ ایی بِنایا گَپِ نِه مِئینی؟ بَردی وِ ری بَردی هَنی نِمیمُونَه وِجا، بلکِم گِردِشُو میرِمیئَن.»
3هِه کِه عیسی دِ کُوء زیتُو نِشِسی ریوِری معبدِ خداوند، پطرس وَ یعقوب وَ یوحنا وَ آندریاس دِ تَنیائی دِش پُرسیئِن: 4«وِمُو بُو کِی ایی اتفاقیا مِیفتَه وَ نِشُونَه نِزیک بییِهنِشُو چینَه؟» 5عیسی وِشُو گُت: «حَواسِتُو با تا کسی دِ رَه دِرنِیارَتُو. 6خیلییا وِ نُومِ مِه میان، مُوئَن ”مِه هِه وِنَهآم“ وَ خیلییا نِه دِ رَه وِ دَر میکَن. 7هِه کِه دِبارَه جنگیا میشنُوئیت وَ خَوَرِ جنگیا وِ گوشِتُو مِیرَسَه، دِ رآو نَرُوئیت. یَه بایِس اتفاق بِفتَه، اما هَنی آخِرِ کار نَرَسِسَه. 8ملتی وِ تیشکِ ملتی هَنی وَ مملکتی وِ تیشکِ مملکتی هَنی وِرمِیسَن. دِ جایا جورواجور زِمی لَرزَهیا میآیَه، وَ قَطییا موئَه. اما یِنُو تَنیا هِه چی شروع ژُ اَ.
9«وَ اما شِما حَواسِتُو وِ خُوتُو با، سی یَکِه وِ سُنَه مِه شِما نِه مِیئَن وِ مَحکِمَهیا وَ دِ کنیسَهیا میوَنَنِتُو وِ فِلَک، دِ بِرُووَرِ والییا وَ پاتشایا مِسیت تا دِ وَرِ وِنُو شاهادَتی بِئیت. 10اول بایِس ایی خَوَرِ خُوشِ پاتشائی خدا وِ گِردِ ملتیا اِعلُوم با. 11هِه کِه شِما نِه گرفتار بَکَن وَ بُورَنِتُو وِ مَحکِمَه، دِ نِهاتِر دِلدِهول نوئیت کِه چی بُوئیت، بلکِم هَر چیئی کِه دِ او ساعت وِ شِما گُتَه موئَه، وَه نِه بُوئیت؛ سی یَکه وَه کِه مُوئَه شِما نیسیت، بَلکم روحالقدس اَ. 12بِرار، بِرارِ نِه وَ بُوَه، اولادِ نِه مِیئَه وِ کُشت. اُولادیا وِ تیشکِ داآ وَ بُوَه وِرمِیسَن وِنُو نِه مِیئَن وِ کُشت. 13همَه وِ سُنَه نُومِ مِه دِ شِما بَی مُورَن؛ اما هَر کَه تا وِ آخِر تاو بیارَه، نجات پیا میکَه.
14«اما هِهکِه او ”کِفارَتی وِیرُوگَر“ دِ جائی کِه نَبایِس، اِیسایَه بِئینیت - وَه کِه ها مُوحُونَه حواسِش با - اوسِه وِنُو کِه دِ وِلاتِ یهودیَهآن، بَجیئَن وِ کُوءیا؛ 15هَر کَه دِ سَرِ بُونِ حُونَه با، سی وِرداشتِهنِ چیئی، نِیایَه وِ هار وَ نَرُوئَه وِ مینِ حُونَه؛ 16هَر کَه دِ سَرِ زِمی با، سی وِرداشتِهنِ سِتِرَهش وِرنَگَردَه وِ حُونَه. 17هِرو دِ او روزیا سی زَنُونِ اُوِس وَ دالِکَهیائی کِه بچَه، ها وِ شیرِشُو! 18دعا بَکیت کِه ایی چیا دِ زِمِسُو نوئَه. 19سی یَکه دِ او روزیا موئَه وِ چِنُو چَمَری، کِه دِ اولِ دنیا کِه خدا آفَری تا هِه ایسِه چی وَه، نِویَه وَ هرگز هَم نِموئَه. 20وَ اَر خداوند او روزیا نِه کُل نِمیکِرد، هیچ بَشَری جُونِ سالم بیر نِمیکِرد. اما وِ سُنَه بَرگُزیَهیا، کِه خُوش وِنُو نِه جِگا کِردَه، او روزیا نِه کُل کِردَه. 21دِ او زِمُو، اَر یَکی وِ شِما بُوئَه: ”سِیل کُو، مسیحِ موعود ها ایچِه“، یا ”سِیل کُو، او ها اوچِه!“ باوَر نَکیت. 22سی یَکه کَسُونی وِ اسمِ مسیحِ موعود وَ پِیغَمَریا دِروکِنی وِرمِیسَن، نِشُونَهیا وَ معجزَهیا میکَن تا اَر بوئَه، بَرگُزیَهیا نِه دِ رَه دِرارَن. 23پس حَواسِتُو با، سی یَکه دِ نِهاتِر، گِردِ یِنُو نِه وِتُو گُتِم.
24«اما دِ او روزیا، دِما او چَمَر،
«”اَفتُو تاریک موئَه
وَ ماه دَ نیر نِمِیئَه.
25آسارَهیا دِ آسمُو مِیفتَن وِ هار
وَ قدرتیا آسمُو میان وِ رِکِسِه.“
26اوسِه مردِم کُرِ انسانِه مِئینَن کِه وا قدرت وَ جِلالِ عظیم دِ اُوریا میایَه. 27او فرشتَهیا نِه کِل میکَه وَ بَرگُزیَهیا خُوشِه دِ چار سیکِ دنیا، دِ او سَرِ زِمی تا ایی سَرِ آسمُو، جمع میکَه وِ دُورِ یَک.
28«ایمدال، دِ دارِ انجیر ایی دَرسِ نِه یای بِئیریت: هِه یَکه پَلیاش زیم زَه وَ بَلگ دَه، میفَمیت کِه تُوئِسُو نِزیک اَ. 29هِه وِ چِنی، هِه کِه بِئینیت کِه ایی چیا اتفاق مِیفتَه، بَفَمیت کِه پاتشائی خدا نِزیک اَ، بلکِم اِیسایَهآ دِ دَمِ دَر. 30وِ راسی وِتُو مُوئِم کِه تا گِردِ یِنُو اِتفاق نِفتَه، ایی نسل دِ بین نِمِیرَه. 31آسمُو وَ زِمی دِ بین مِیرَه، اما قِصَهیا مِه دِ بین نِمِیرَه.
چَش وِ رَه وِرگشتِهنِ مسیح
32«اما دِ او روز وَ او ساعت هیشکَه خَوَر نارَه غیرِ بُوَه آسمُونی؛ حتی نَه فرشتَهیا آسمُو وَ نَه کُر هَم. 33پس وِ هوش بایت، بیار بایت، سی یَکه نُئُونیت او زِمُو کِی مِیرَسَه. 34او زِمُو هِه چی پیائی اَ کِه رَتوئَه وِ سفر وَ دِ موقَع رَتِه، حُونَهشِه سِپُردوئَه وِ پاکاریاش، وَ دِ گُردَه هَر کُوم وظیفهای نِئایوئَه وَ وِ دَربُو هَم هُد کِردوئَه کِه بیار بَمُونَه. 35پس شِما هَم بیار بایت، سی یَکه نُئُونیت صِحُو حُونَه کِی میآیَه، شُو یا نِصمِهشُو، موقَع بُنگِ کِلَهشیر یا دِ لیسکِ اَفتُو. 36نَکَه کِه او یِگِلی بیایَه وَ شِما نِه دِ خُو بِئینَه. 37او چیئی کِه وِتُو مُوئِم، وِ همَه مُوئِم: بیار بَمُونیت!»
Currently Selected:
انجیلِ مَرقُس 13: NLB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
