نُومَه وِ کلیسا غَلاطیَه 2
2
شورای اورشلیم
1دِما چاردَه سال، دُوارَه واردِ برنابا رَتِم وِ اورشلیم وَ تیتوسِ نِه هَم وا خُوم بُردِم. 2مِه وِ سُنَه یِه مکاشفَه بی کِه رَتِم؛ وَ انجیلی نِه کِه دِ مینِ غیرِیهودیُو موعظَه میکِم واشُو دِ مینَه نِئام؛ دِ هولِ یَه بیئِم کِه نَکَه بیخُود هَلگِدو کِردوئِم، (اَلوَت مِه یَه نِه دِ غَلوَت، سی کَسُونی کِه وِ نظر وانفوذ مِیمان، گُتیمی). 3اما حتی تیتوس، کِه واردِم بی، وا یَکِه یونانی بی، زورِش نَکِردِن ختنَه با. 4ایی دِلواپسی وِ سُنَه بِرارُونِ دِروکِنیای بی کِه بیکِشکی اُومایینی دِ مینِمُو، کِه سُرِسینی وا می تا آزادیئی کِه دِ مسیح عیسی داریم نِه جاسوسی بَکَن، تا اِیما نِه بِئیرَن وِ بَردِئی. 5اما اِیما گِری هَم تسلیمِشُو نِویئیم تا حقیقتِ انجیل سی شِما تمُومِکمال محفوظ بَمُونَه.
6اما دِ وِنُونی کِه وِ نظر وانفوذ مِیمان (هَر چی بییِن سی مِه فرقی نِمیکَه، خدا بیخُودی دِ کسی لادِراری نِمیکَه) مُوئِم کِه وِنُو کِه وانفوذ وِ نظر مِیمان، چیئی وِ مِه اضافَه نَکِردِن. 7بَلکِم چُوارشَه، وِنُو فَمِسِن کِه بشارتِ انجیل وِ ختنَهنِویَهیا وِ مِه سپردَه بییَه، هِه چِنُو کِه بشارتِ انجیل وِ ختنَهبییَهیا وِ پِطرُس 8سی یَکِه وَه کِه توسطِ پِطرُس سی رسالتِ ختنَهبییَهیا کار کِرد، توسطِ مِه هَم سی غیرِیهودیُو کار کِرد. 9وَ هِه کِه یعقوب وَ کیفا وَ یوحنا کِه وِ نظر مِیمان ستوناَن، فیضی نِه کِه نِصیوِم بییی دیئِن، دَسِ رفیقی دَن وِ مِه وَ برنابا، تا اِیما رِیم والا غیرِیهودیُو وَ وِنُو رُوئَن والا ختنَهبییَهیا. 10وِنُو تَنیا دِمُو حاسِن کِه ژاریا نِه وِ یای داشتوئیم، هِه او کاری کِه مِه خُوم هَم شوقِشِه داشتِم.
مخالفتِ پولُس وا پِطرُس
11اما هِه کِه کیفا اُوما وِ اَنطاکیَه، اِیسام دِ ریش، سی یَکِه حَقِش بی. 12سی یَکِه وِرَز اُومایِهنِ قَری دِ پیایا دِ لا یعقوب، او داشت وا غیرِیهودیُو نُو میحَرد، اما هِه یَکه وِنُو اُومان، دِ ترسِ لادِراریا ختنَه، کَشی دِما وَ خُوشِه جِگا کِرد. 13باقی یهودیُو هَم دِ ایی دوریئی بییِن چی او، تا حتی برنابا هَم وا دوریئی وِنُو دِ رَه دِراُوما.
14اما هِه کِه مِه دیئِم وِنُو دِ راسی حقیقتِ انجیل، گُوم وِرنِمیارَن، دِ وَرِ ری همَه وِ کیفا گُتِم:«اَر تو، کِه یهودیئی، هِه چی غیرِیهودیُو زِنِهئی میکی نَه چی یهودیُو، چطور اَ کِه زور میاری وِ غیرِیهودیُو کِه چی یهودیُو رفتار بَکَن؟»
15اِیما یهودی زادَهآئیم وَ گُنَهکارِ غیرِیهودی نیسیم؛ 16اِیما دُونیم کِه کَس وا کاریا شریعت صالح نِموئَه بَلکِم دِ رَه ایمُو وِ مسیح عیسی، پس اِیما هَم وِ مسیح عیسی ایمُو اُوِردیمَه تا وا ایمُو وِ مسیح صالح وِ حِسُو بیایم وَ نَه وا کاریا شریعت، سی یَکه هیچ کَه وا کاریا شریعت صالح نِموئَه.
17اما اَر هایم دِ دُمِ یَه کِه دِ مسیح، صالح وِ حِسُو بیایم، دیار با کِه گُنَه کاریم، یعنی مسیح پاکارِ گُنَهآ؟ اَصلا! 18سی یَکِه اَر اوچیئی نِه کِه یِه گِل خِرُو کِردِم دِ سَر بِناش بَکِم، نِشُو مِیئِم کِه خطاکارِم. 19سی یَکه مِه وِ واسطَه شریعت، نِسوَت وِ شریعت مُردِم تا نِسوَت وِ خدا زِنِهئی بَکِم. 20مِه وا مسیح وِ صلیب بیمَه؛ وَ یَه دَ مِه نیسِم کِه زِنِهئی میکِم، بَلکِم مسیح دِ مِه زِنِهئی میکَه؛ وَ ایی زِنِهئی کِه ایسِه دِ جسم میکِم وا ایمُو وِ کُرِ خدا اَ، کِه مِه نِه دوس داشت وَ جُونِ خُوشِه سی مِه دَه. 21مِه فیضِ خدا نِه باطل نِمیکِم، سی یَکِه اَر صالحبییِه دِ رَه شریعت بی، پس مسیح بیخُودی مُرد.
Currently Selected:
نُومَه وِ کلیسا غَلاطیَه 2: NLB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
