نُومَه وِ کلیسا اَفِسُس 2
2
وا فیض وِ وسیلَه ایمُو
1وَ شِما دِ خبطیا وَ گُنَهیا مُردیتُونی، 2وَ زِمُونی دِ او گُنَهیا گُوم وِرمیئاشتیت، اوسِه کِه دِ رَهیا ایی دنیا وَ دِ رئیسِ قدرتِ هوی، ابلیس اطاعت میکِردیت، دِ او روحی کِه هِه ایسِه هَم دِ آیِمیا تور کار میکَه. 3گِرد اِیما هَم زِمُونی دِ مینِ وِنُو دِ هَوَسیا جِسمِمُو زِنِهئی میکِردیم، وَ حاسَهیا جسم وُ فکرِمُو نِه وِجا میاُوِردیم؛ وَ هِه چی باقی، بِنا وِ طبیعتِمُو محکوم وِ غَضُوِ خدا بیئیم. 4اما خدا کِه دِ رَحمَت، دُولَهمَن اَ، وِ سُنَه محبتِ عظیمِ خُوش اِیما نِه دوس داشت، 5حتی اوسِه کِه دِ خبطیامُو مُردیمُونی، اِیما نِه وا مسیح زِنَه کِرد- دِ رَه فیض نجات پیا کِردیتَه؛ 6وَ اِیما نِه وا مسیح زِنَه کِرد وَ دِ جایا آسمُونی وا مسیح عیسی نِشَن، 7تا دِ زِمُونیا آیندَه او فیضِ پُر وُ بیحَدِحِسُوِ خُوشِه دِ مِرَبُونیش نِسوَت وِ اِیما دِ مسیح عیسی نِشُو بِئَه. 8سی یَکِه وِ سُنَه فیض وَ وِ وسیلَه ایمُو نجات پیا کِردیتَه. وَ یَه دِ خُوتُو نی، بلکِم پیشکَشِ خدا اَ، 9وَ یَه دِ نتیجَه کاریا نی، تا هیشکَه وِ خُوش نُونَه. 10سی یَکه اِیما کارِ دَسِ خدائیم، دِ مسیح عیسی آفَریَه بیئیمُونَه تا کاریا خو بَکیم، کاریائی کِه خدا دِ نِهاتِر آمادَه کِرد تا دِ وِنُو گُوم وِرداریم.
یَکی بییِه دِ مسیح
11پس وِ ویر بیاریت کِه زِمُونی شِما غیرِیهودیُو نِه «ختنَهنِویَه» میحَنِن وَ خُوشُو نِه «ختنَهبییَه» دُونِسِن. (دِ صورتی کِه ختنَه وِنُو کاری جسمانی اَ کِه وِ دَسِ انسان اَنجُوم بییَه.) 12وِ ویر بیاریت کِه دِ او زِمُو دِ مسیح جِگا بیئیت، وَ دِ قُومِ اسرائیل وِ حِسُو نِمِیمایت، وَ بِغیرَه بیئیت وَ نِسوَت وِ عَهدیا وَعدَه غَریوَه بیئیت، وَ نااُمید وُ بیخدا دِ ایی دنیا زِنِهئی میکِردیت. 13اما اِیمدال دِ مسیح عیسی شِما کِه زِمُونی دیر بیئیت توسطِ خینِ مسیح نِزیک بیئیتَه.
14سی یَکِه مسیح خُوش صُولوُسِلا اِیمانَه، کِه اِیما هَر دِکِمُو یعنی یهود وَ غیرِیهودِ نِه یَکی کِردَه وَ دِ بدنِ خُوش دیوارِ جِگائی نِه کِه باعثِ دُشمِنی بی، رِمَن، 15آییندایینی کِه دِ هُدیا شریعت بی دِ اعتبار وَن، تا دِ خُوش دِ جالِ او دو، یِه انسانِ نو وِ وجود بیارَه، تا صُولوُسِلا برقِرار بَکَه 16وَ هَردِکِمُو نِه دِ یِه بدن وا خدا صُول بِئَه، وِ واسطَه صلیبِ خُوش کِه وِ ری وَه دُشمِنی نِه کُشت. 17وَ او اُوما وَ خَوَرِ خُوشِ صُولوُسِلا نِه وِ شِما کِه دیر بیئیت وَ وِ وِنُو کِه نِزیک بییِن، اِعلُوم کِرد. 18سی یَکِه توسطِ او، هَردِکِ اِیما دِ یِه روح وِ بُوَه آسمُونی دَسرَسی داریم.
19پس دیساتما شِما دَ نَه بِغیرَه وُ غَریوَه، بلکِم وا ایمُوداریا، هُموِلاتی وَ یَکی دِ هوزِ خدا هیسیت؛ 20شِما وِ ری عمارتی کِه زیر بِناش رسولیا وَ انبیا اَن بِنا بیئیتَه، کِه مسیح عیسی خُوش بَردِ اصلی او بِنا اَ. 21دِ مسیح گِردِ ایی بِنا هَشتِگیر موئَن وا یَک وَ معبدی مقدس موئَه دِ خداوند. 22وَ شِما هم وا یَک دِ مسیح بِنا موئیت، تا چی حُونِهای دِرایت کِه خدا وِ واسطَه روحِش دِ وَه مالگَه میکَه.
Currently Selected:
نُومَه وِ کلیسا اَفِسُس 2: NLB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
