نُومَه وِ کلیسا اَفِسُس 3
3
سِرِ انجیل دیاری بی
1زوتا مِه، پولُس، کِه وِ سُنَه شِما غیرِیهودیُو، سی مسیح عیسی هام دِ هُلِفدُو.
2بیگِمُو شِما دِ ایی بارَه اِشنَفتیتَه کِه نظارتِ فیضِ خدا سی خدمت وِ شِما وِ مِه بَخشیَه بییَه. 3هِه چِنُو کِه کَمِکُتی سیتُو نیسَنِمَه، کِه چطور ایی سِر دِ رَه مکاشفَه وِ مِه دیاری بی. 4هِه کِه یَه نِه مُوحُونیت، تُونیت پِی بُوریت کِه چطور مِه سِرِ مسیحِ نِه فَمِسِمَه، 5او سِری کِه دِ نَسلیا هَنی وِ کُرُونِ آیِمیا دیاری نِویئی، هِه چِنُو کِه ایسِه وِ واسطَه روحالقدس وِ رسولیا مقدسِ او وَ وِ انبیا دیاری بییَه. 6ایی سِر یِنَهآ کِه غیرِیهودیُو هَم دِ مسیح عیسی وِ واسطَه انجیل، هُماِرث اَن وَ عُضویا هِه او بدن اَن وَ هُمبَرِ وَعدَه خدا اَن.
7مِه وِ طبقِ پیشکَشِ فیضِ خدا کِه دِ رَه کارِ قدرتِ او وِ مِه دِئَه بییَه، پاکارِ ایی انجیل بیمَه. 8هَر چَن مِه دِ مینِ گِردِ ایمُوداریا دِ همَه کمتِراِم، ایی فیض وِ مِه دِئَهبی تا ایی گنجیا بیحَدِحِسُوِ مسیحِ نِه وِ غیرِیهودیُو اِعلُوم بَکِم، 9وَ سی همَه نَشخَه سِری نِه روشِه بَکِم کِه دِ طولِ دُورُون وِ تِه خدائی کِه همَه چی نِه آفَری، پوشِسی، 10تا دِ طریقِ کلیسا حکمتِ جورواجورِ خدا وِ ریاستیا وَ قدرتیا دِ جایا آسمُونی دیاری بوئَه. 11یَه هِه او قَصتی بی کِه خدا دِ ازل داشت کِه وا وَه دِ خداوندِ اِیما مسیح عیسی وِ اَنجُوم رَسَن، 12اِیما دِ او وَ وِ واسطَه ایمُونِ وِ او، تُونیم وا جرأت وَ وا اِطمینُو وِ خدا نِزیک بوئیم. 13پس دِ شِما تمنا میکِم وِ سُنَه عَذُویائی کِه سی شِما میکَشِم، دِلسرد نوئیت، سی یَکِه وِنُو مایَه افتخارِ شِمانَه.
دعا سی قُوَتِ روحانی
14زوتا، مِه دِ بِرُووَرِ او بُوَه آسمُونی زُونی میزِنِم، 15کِه هَر خانوادَه دِ آسمُو وَ وِ ری زِمی، دِ او نُوم مِئیرَه، 16کِه بِنا وِ دُولَهمَنی جِلالِ خُوش وِ شِما عطا بَکَه کِه وِ سُنَه روحِ خدا، دِ باطنِ خُوتُو وا قُوَت زوردار بایت. 17تا مسیح وِ واسطَه ایمُو دِ دِلیا شِما مالگَه بَکَه، وَ دِ محبت ریشَه بِئیریت وَ پایار بوئیت، 18تا قُوَه داشتوئیت کِه وا گِردِ ایمُوداریا، پَهنا وَ دِرازا وَ بُلِنی وَ قیلی محبتِ مسیحِ نِه بَفَهمیت، 19وَ محبتِ مسیحِ نِه کِه بالاتِر دِ درک وُ شناختِ بشر اَ، بَشناسیت تا دِ پُریِ کاملِ خدا لُوبَریز بوئیت.
20ایمدال وِ خدائی کِه تُونَه وِ واسطَه او قُوِهای کِه دِ اِیما کار میکَه، خیلی بیشتِر دِ او چیئی که اِیما باحایم یا فکرِشِه بَکیم، کار بَکَه، 21دِ کلیسا وَ دِ مسیح عیسی، دِ گِرِد نسلیا، تا وِ ابد وِ خدا جِلال با! آمین.
Currently Selected:
نُومَه وِ کلیسا اَفِسُس 3: NLB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
