نُومَه وِ کلیسا اَفِسُس 1
1
1دِ لا پولُس، کِه وِ حاسِ خدا رسولِ مسیح عیسی اَ،
وِ ایمُوداریائی کِه هان دِ شهرِ اَفِسُس، کِه دِ مسیح عیسی بَفادار اَن:
2فیض وُ سِلامتی دِ لا خدا، بُوَه اِیما، وَ خداوند عیسی مسیح، وِ شِما با.
برکتیا روحانی دِ مسیح
3هورِم با خدا وَ بُوَه خداوندِ اِیما عیسی مسیح، کِه اِیما نِه دِ مسیح وا هَر برکتِ روحانی دِ جایا آسمُونی برکت دِئَه. 4هِه اوطور کِه او وِرَز بِنا دنیا، اِیما نِه دِ مسیح انتخاب کِرد تا دِ حضورِش، مقدس وَ بیعِیو بایم. دِ محبت، 5بِنا وِ قَصتِ اِرادَه خُوش، اِیما نِه دِ جِلوتِر سی فرزندخواندگیش تعیین کِرد تا وِ واسطَه عیسی مسیح، کُرُونِ خدا بایم، 6تا فیضِ پُر جِلالِ او ستایش با، هِه او فیضی کِه دِ او ستینِ خُوش وِ اِیما برکت دِئَه. 7دِ مسیح، اِیما وِ واسطَه خینِ او راهائی داریم، کِه یَه هِه او آمرزشِ گُنَهیا اَ، کِه وَه نِه وِ قَدِ دُولَهمَنی فیضِ خُوش، 8دِ هَر حکمت وُ دِ هَر فَهمِ کامل، فَتِفِراوُو وِ اِیما بَخشَن، 9او سِرِ اِرادَه خُوشِه وِ اِیما شِناسَن، بِنا وِ قَصتِ خُوش کِه دِ مسیح دیاری کِرد 10نَشخَه خدا یَه بی کِه هِه کِه زِمُونِش بَرَسَه، همَه چی نِه، چِه دِ آسمُو چِه وِ ری زِمی، وا یَک دِ مسیح جمع بَکَه.
11اِیما دِ او بیئیمُونَه وِ وارثیا، سی یَکِه بِنا وِ قَصتِ او کِه همَه چی نِه بِنا وِ اِرادَه خُوش اَنجُوم مِیئَه، دِ جِلوتِر انتخاب بیئیمُو. 12تا اِیما کِه اولین کَسُونی بیئیم کِه وِ مسیح اُمید داشتیم، جِلالِ او نِه ستایش بَکیم. 13شِما هَم دِ او، هِه کِه کلُومِ حقیقت، کِه هِه او انجیلِ نجاتِتُونَه اِشنَفتیت وَ وِش ایمُو اُوِردیت، وا روحالقدسِ موعود مُهر بیئیت، 14کِه بِیعُونَه ارثِ اِیمانَه تا زِمُونی کِه وَه نِه تمُومِکمال وِ دَس بیاریم، تا جِلالِ خدا ستایش با.
شکرکِردِه وَ دعا
15زوتا مِه هَم هِه کِه تعریفِ ایمُونِ شِما نِه وِ عیسی خداوند وَ محبتِتُو نِه نِسوَت وِ گِردِ ایمُوداریا اِشنَفتِم، 16دِ شکرکِردِه سی شِما دَس نَکَشیمَه، شِما نِه هِه دِ دعایام میارِم وِ ویر، 17تا خدایِ خداوندِ اِیما عیسی مسیح، او بُوَه پُر جِلال، روحِ حکمت وَ مکاشفَه نِه وِتُو عطا بَکَه، تا او نِه بَشناسیت. 18تا چَشیا دِلِتُو روشِه با، تا او اُمیدی کِه خدا سی وَه شِما نِه دعوت کِردَه، بَشناسیت، وَ وِ او میراتِ بیحَدِحِسُو وَ پُر جِلالِ خدا دِ ایمُوداریا پِی بُوریت 19وَ دِ قُوَه بیحَدِحِسُوِ او نِسوَت وِ اِیما کِه ایمُو داریم، واخَوَر بایت. ایی قُوَه، دِ کارِ قدرتِ بیحَدِحِسُوِ خدا وِریسائَه 20کِه وَه نِه دِ مسیح وِ کار گِرِت، اوسِه کِه او نِه دِ مُردَهیا زِنَه کِرد وَ دِ جایا آسمُونی وِ دَسِ راسِ خُوش نِشَن، 21بالاتِر دِ هَر ریاست وَ قدرت وَ قُوَت وُ سِلطِنَت، وَ بالاتِر دِ هَر نُومی نَه تَنیا دِ ایی دُورَه بَلکِم دِ دُورُونِ آیندَه هَم. 22وَ او همَه چی نِه نِئا وِ زیرِ پایا مسیح، وَ تعیین کِرد کِه او سی کلیسا سَرِ همَه چی با، 23کلیسائی کِه بدنِ اونَه، وَ پُریِ او همَه چی نِه دِ همَه جا پُراپُر میکَه.
Currently Selected:
نُومَه وِ کلیسا اَفِسُس 1: NLB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
