یوشَع 9
9
گئبعونلولارین مَکری
1اوردون چایینین قرب طرفئنده، داغلیقدا، هامار بؤلگهده، لوبنانا قدر اوزانان بؤیوک دهنزئن ساحئلئنده یاشایان خئتلیلر، اِمورلولار، کَنَعانلیلار، پِرئزلئلر، خئولیلر و یِبوسلولارین بوتون پادشاهلاری بونو اشئتدئلر 2و بئر یره ییغیلدیلار کی، یوشَع و ائسرایئللیلرئن ضئدّئنه بئرلئکده دؤیوشسونلر.
3لاکئن گئبعون اهالئسی یوشَعئن اَرئحا و عای شهرئنئن باشینا نه گتئردئکلرئنی اشئتدئکده، 4حئیله ائله رفتار اتدئلر؛ گدئب اؤزلرئنی اِلچی کئمی گؤرستدئلر و کؤهنهلنمئش توربالار، کؤهنه، ییرتیق و باغلانمیش شراب تولوقلارینی اِششَکلرئنه یوکلهدئلر. 5آیاقلاریندا جیریق و یاماقلی چاریقلاری، اَیئنلرئنده کؤهنه پالتارلاری وار ائدی. یمکلری اولان بوتون چؤرکلر قوروموش و کوفسهمئشدی. 6اونلار گئلگالدا اولان اوردوگاها، یوشَعئن یانینا گتدئلر، اونا و ائسرایئللیلره ددئلر: «بئز اوزاق بئر اؤلکهدن گلمئشئک، ائندی بئزئمله عهد باغلایین.» 7ائسرایئللیلر خئولیلره#9.7 گئبعونلولار خئو خالقیندان ائدئلر ددئلر: «بلکه سئز بئزئم آرامیزدا یاشایارسینیز. بئز سئزئنله نجه عهد باغلایاق؟» 8اونلار یوشَعه ددئلر: «بئز سنئن قوللارینیق.» آمّا یوشَع اونلارا ددی: «سئز کئمسئنئز و هارادان گلئرسئنئز؟» 9اونا ددئلر: «بئز قوللارین، سنئن تارین ربّئن شؤهرتلی آدینا گؤره چوخ اوزاق اؤلکهدن گلمئشئک. چونکی ربّئن خبرئنی، و اونون مئصئرده اتدئیی بوتون شیلری اشئتمئشئک. 10اشئتمئشئک کی، اوردون چایینین او طرفئنده اولان اِمورلولارین ائکی پادشاهی یعنی خِشبون پادشاهی سئخونون و عَشتاروتداکی باشان پادشاهی عوگون باشینا نه گتئردی. 11اونا گؤره آغساقّاللاریمیز و اؤلکهمئزئن بوتون اهالئسی بئزه بله ددئلر: ”یول اوچون ارزاق گؤتوروب اونلارین گؤروشویونه گدئن و دیئن: بئز سئزئن قوللارینیزیق، ائندی بئزئمله عهد باغلایین.“ 12یانینیزا گلمک اوچون چیخدیغیمیز گون بو چؤرهیئمئزی ارزاق اولاراق اِولرئمئزدن ائستی-ائستی گؤتورموشدوک، باخ، آمّا ائندی قورویوب و کوفسهیئب. 13دولدوردوغوموز بو شراب تولوقلاری تزه ائدی، باخ، آمّا ائندی ییرتیلیب. یولون چوخ اوزونلوغوندان پالتارلاریمیز و چاریقلاریمیز دا کؤهنهلَنئب.» 14بلهجه ائسرایئللیلر اونلارین ارزاقلارینین بئر آزینی گؤتوردولر و ربدن مصلحت آلمادیلار. 15یوشَع اونلارلا صولح ادئب، عهد باغلادی کی، اونلاری صاغ بوراخسین؛ جاماعاتین رهبرلری ده بونون اوچون آند ائچدئلر. 16اونلارلا عهد باغلادیقدان اوچ گون سونرا اشئتدئلر کی، بو آداملار ائسرایئللیلرله قونشولوقدا، اِله اؤز آرالاریندا یاشاییرلار. 17ائسرایئللیلر چیخیب اوچونجو گون اونلارین شهرلرئنه گلدئلر. اونلارین شهرلری گئبعون، کِفئرا، بِعِروت و قئریَتیِعهرئم ائدی. 18ائسرایئللیلر اونلارا هوجوم اتمهدئلر، چونکی جاماعات رهبرلری اونلار اوچون ائسرایئلئن تاریسی ربّه آند ائچمئشدئلر. بوتون جاماعات رهبرلرئن ضئدّئنه دیئندئلر. 19آمّا رهبرلرئن هامیسی جاماعاتا ددئلر: «بئز اونلار اوچون ائسرایئلئن تاریسی ربّه آند ائچمئشئک و اونلارا توخونا بئلمهرئک. 20اونا گؤره ده بله ادک: اونلاری صاغ بوراخاق، یوخسا ائچدئیئمئز آندا گؤره اوستوموزه قضب گلر.» 21رهبرلر خالقا ددئلر: «قوی اونلار صاغ قالسینلار.»
بلهجه اونلار رهبرلرئن سؤزلری کئمی بوتون جاماعات اوچون اودون کَسن و سو داشییان اولدولار. 22سونرا یوشَع اونلاری چاغیریب بله ددی: «آرامیزدا یاشادیغینیز حالدا، نه اوچون بئزی آلدادیب دِدئنئز: ”بئز سئزدن چوخ اوزاغیق؟“ 23ائندی لعنت اولوبسونوز. دائم نؤکر اولاجاقسینیز. تاریمیزین اِوی اوچون اودون کَسئب سو داشییاجاقسینیز.» 24اونلار یوشَعه جاواب ورئب ددئلر: «بئز سنئن نؤکرلرئن اشئتمئشدئک کی، سنئن تارین رب اؤز قولو موسایا امر ادئب کی، بوتون اؤلکهنی سئزه ورسئن و اؤلکهنئن بوتون ساکئنلرئنی سئزئن قاباغینیزدان محو اتسئن. بونا گؤره ده سئزئن اوزونوزدن جانیمیز اوچون چوخ قورخوب بله اتدئک. 25آرتیق سنئن اَلئندهیئک. سنئن گؤزونه نه خوش و دوز گلئر، بئزه ات.» 26یوشَع اونلارلا بله رفتار اتدی و اونلاری ائسرایئل اؤولادلارینین اَلئندن قورتاردی و اونلاری اؤلدورمهدئلر. 27او گون یوشَع جاماعات اوچون و ربّئن سچهجیی یردهکی اؤز قوربانگاهی اوچون، اونلاری اودون کَسن و سو داشیماق ائشئنه تعیئن اتدی و بو گونه قدر ده بلهدئر.
Currently Selected:
یوشَع 9: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
