یوشَع 8
8
عای شهرئنئن اَله کچئرتمهسی
1رب یوشَعه ددی: «قورخما، اورهیئن ده اوزولمهسئن. بوتون دؤیوشچولرئنی اؤزونله گؤتور و عای شهرئنه هوجوم ات. باخ، من عای شهرئنئن پادشاهینی، خالقینی، شهرئنی و تورپاغینی سنه تسلئم اتمئشم. 2اَرئحانین و اورانین پادشاهینین باشینا نه گتئردئن، عای شهرئنئن و اونون پادشاهینین باشینا دا اِله گتئر؛ آنجاق ماللارینی و حیوانلارینی اؤزونوز اوچون قارت ادئن. شهرئن ضئدّئنه آرخا طرفدن کمئن قورون.»
3یوشَعله بوتون دؤیوشچولر عای شهرئنه گتمک اوچون قالخدیلار؛ یوشَع اوتوز مئن ائگئد آدام سچئب، اونلاری گجه ائکن اورایا گؤندَردی. 4و اونلارا بله امر اتدی: «قولاق آسین، شهرئن ضئدّئنه آرخا طرفدن کمئن قوراجاقسینیز، شهردن چوخ اوزاغا گتمهیئن، لاکئن هامینیز حاضیر دورون. 5من و یانیمدا اولان بوتون خالق شهره یاخینلاشاجاغیق. اوّلکی کئمی شهرئنئن ساکئنلری بئزئم ضئدّئمئزه چیخاندا، بئز ده اونلارین قاباغیندان قاچاجاغیق. 6آرخامیزجا او قدر آپاراجاغیق کی، شهردن اوزاق دوشسونلر. چونکی ”اوّلکی کئمی قاباغیمیزدان قاچیرلار“ دئیهجکلر. بلهجه اونلارین قاباغیندان قاچاجاغیق. 7او واخت سئز کمئندن قالخیب شهری آلین، چونکی تارینیز رب اورانی سئزه تسلئم ادهجک. 8شهری اَله کچئرتدئیئنئز زامان، شهره اود وورون. بونو ربّئن سؤزونه گؤره ادئن. گؤرون، سئزه بله امر اتدئم.» 9بلهجه، یوشَع اونلاری گؤندَردی. اونلار کمئن یرئنه گتدئلر و بِیت ائلله عای شهری آراسیندا کمئنده، عای شهرئنئن قرب طرفئنده گؤزلهدئلر. آمّا یوشَع گجهنی جاماعاتین آراسیندا کچئرتدی.
10یوشَع سحر تزدن دوردو، خالقا نئظام وردی، اؤزو و خالقین آغساقّاللاری خالقین قاباغیندا عای شهرئنئن طرفئنه گتدئلر. 11بوتون دؤیوشچولر ده اونونلا بئرلئکده گتدئلر و یاخینلاشیب شهرئن قاباغینا گلدئلر و عای شهرئنئن شئمال طرفئنده ییغیلدیلار. ائندی یوشَعله عای شهری آراسیندا آنجاق بئر دره وار ائدی. 12یوشَع بش مئنه قدر آدام گؤتوردو، اونلاری بِیت ائلله عای شهری آراسیندا، شهرئن قرب طرفئنده کمئنه قویدو. 13شهرئن شئمالیندا اولان بوتون قوشون و شهرئن قربئنده کمئنده دورانلار دؤیوش اوچون یِرلَشدئرئلدی. یوشَع او گجهنی درهنئن اورتاسینا کچئرتدی.
14عای شهرئنئن پادشاهی بونو گؤردوکده، سحر تزدن شهرئن آداملاری ائله بئرلئکده تَلهسئک قالخدی و بوتون جاماعات موعیّن یرده ائسرایئللیلرئن ضئدّئنه عَرابا درهسئنئن قاباغیندا دؤیوشه چیخدیلار. لاکئن پادشاه بئلمئردی کی، شهر آرخاسیندا اونون ضئدّئنه کمئن قورولوب. 15یوشَعله بوتون ائسرایئللیلر اؤزلرئنی اونلارین قاباغیندا مغلوب اولموش کئمی گؤرسهدئب چؤله طرف قاچدیلار. 16شهرده اولان بوتون جاماعات چاغیریلدی کی، اونلاری تعقئب اتسئنلر. اونلار یوشَعی تعقئب ادئب شهردن اوزاقلاشدیلار. 17عای و بِیت ائل شهرلرئنده بئر نفر ده قالمادی کی، ائسرایئللیلرئن دالینجا گتمهسئن. اونلار شهری آچیق قویوب ائسرایئللیلری تعقئب اتدئلر.
18او واخت رب یوشَعه ددی: «اَلئندهکی نئزهنی عای شهرئنه طرف اوزات، چونکی اورانی سنه تسلئم ادهجیم.» یوشَع اَلئندهکی نئزهنی عای شهرئنه طرف اوزاتدی. 19یوشَع اَلئنی شهره طرف اوزاتدیقدا، کمئنده دورانلار جَلد یرلرئندن قالخدیلار. قاچیب شهره گئردئلر و اورانی آلدیلار. و تزلئکله شهره اود ووردولار. 20عای شهرئنئن اهالئسی آرخایا دؤنوب باخاندا، گؤردولر کی، شهردن گؤیه توستو قالخیر و اونلارین او یان بو یانا قاچماغا دا یرلری یوخ ائدی. چونکی چؤله طرف قاچان ائسرایئللیلر ده اونلاری تعقئب ادنلره طرف دؤندولر. 21یوشَع و بوتون ائسرایئللیلر او واخت کی، گؤردولر کمئنده اولان آداملار شهری آلیبلار و شهردن توستو گؤیه قالخیر، دؤنوب عای شهرئنئن آداملارینا هوجوم اتدئلر. 22او بئری ائسرایئللیلر ده شهردن اونلارا طرف چیخدیلار. او واخت اونلار ائکی طرفدن گلن ائسرایئللیلرئن آراسیندا تلهیه دوشدولر. اونلاری او قدر قیردیلار کی، اونلاردان هچ کس دئری و یا قاچمیش اولمادی. 23آمّا عای شهرئنئن پادشاهینی دئری توتوب یوشَعئن یانینا گتئردئلر.
24ائسرایئللیلر عای شهرئنئن اهالئسئنئن هامیسینی اؤلدوروب قورتارانا قدر، اونلاری زَمئده و تعقئب اتدئکلری چؤلده قیلینجدان کچئرتدئلر. سونرا بوتون ائسرایئللیلر عای شهرئنه قاییدیب، اورادا قالانلاری دا قیلینجدان کچئرتدئلر. 25او گون قیریلان کئشئلر و آروادلارین ساییسی، اون ائکی مئن نفر ائدی؛ یعنی عای شهرئنئن بوتون اهالئسئنی. 26چونکی یوشَع بوتون عای شهرئنئن اهالئسئنی کامئل قیریب قورتارانا قدر، نئزه اوزادان اَلئنی گری چکمهدی. 27آنجاق ربّئن یوشَعه بویوردوغو سؤزه گؤره، ائسرایئللیلر او شهرئن حیوانلارینی و اشیالارینی تالان ادئب اؤزلرئنه گؤتوردولر. 28بلهجه یوشَع عای شهرئنی یاندیردی. اورانی ابدی بئر داش قالاغینا دؤندَردی، یعنی بئر وئرانهیه کی، بو گونه قدر قالیر. 29او، عای شهرئنئن پادشاهینی آغاجدان آسیب آخشاما قدر ساخلادی. گون باتاندا یوشَع امر وردی و اونون جسدئنی آغاجدان دوشورتدولر. اونو شهر دروازاسینین گئرهجیئنه آتدیلار. اوستونه اِله بؤیوک داش قالاغی ییغدیلار کی، بو گونه کئمی قالیر.
موسانین شرئعتی ائسرایئل خالقینا اوخونور
30او زامان یوشَع عِیبال داغیندا ائسرایئلئن تاریسی ربّه بئر قوربانگاه قوردو. 31او، اوستونه هچ کئمئن دمئر وورمادیغی، یونولمامیش داشلاردان بئر قوربانگاه دوزَلتدی، نجه کی، ربّئن قولو موسا ائسرایئل اؤولادلارینا امر اتمئشدی و موسانین شرئعت کئتابیندا یازیلمیشدی؛ اونون اوستونده ربّه یاندیرما قوربانلاری و باریش قوربانلاری تقدئم اتدئلر. 32یوشَع اورادا، موسانین ائسرایئل اؤولادلاری حوضوروندا یازدیغی شرئعتئن بئر نوسخهسئنی داشلار اوستونه یازدی. 33بوتون ائسرایئللیلر، آغساقّاللار، سرکردهلر، حاکئملر، و حتّا قرئبلر ربّئن عهد ساندیغینین ائکی طرفئنده، ساندیغی داشییان لاوئلی کاهئنلرئن قاباغیندا دایاندیلار. خالقین یاریسی گِرِزئم داغینین، او بئری یاریسی دا عِیبال داغینین قاباغیندا دوردو. نجه کی، ربّئن قولو موسا ائسرایئل خالقینا برکت ورمک اوچون اوّللر بو جور دایانماغی بویورموشدو. 34اوندان سونرا یوشَع شرئعتئن بوتون سؤزلرئنی، برکت و لعنتی، یعنی شرئعت کئتابیندا یازیلانلارین هامیسینی اوخودو. 35بوتون ائسرایئل جاماعاتینین، آروادلارین، اوشاقلارین و آرالاریندا اولان قرئبلرئن حوضوروندا موسانین بوتون بویوردوقلاریندان هچ بئر سؤز قالمادی کی یوشَع اونو اوخومامیش اولسون.
Currently Selected:
یوشَع 8: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
