داورلر 20
20
1بوتون ائسرایئل اؤولادلاری، داندان بئرشئبایا قدر بؤلگهدن و گئلعاد تورپاغیندان مئصپایا چیخدیلار. جاماعات بئر نفر کئمی ربّئن قاباغیندا بئر یره ییغیلدی. 2بوتون خالقین، بوتون ائسرایئل قبئلهلرئنئن باشچیلاری تارینین خالقینین ییغینیندا اؤز یرلرئنی توتدولار. اورادا قیلینج داشییان دؤرد یوز مئن پئیادا وار ائدی.
3بِنیامئن اؤولادلاری ائسرایئل اؤولادلارینین مئصپایا چیخدیقلارینی اشئتدئلر. اورادا ائسرایئل اؤولادلاری ددئلر: «دانیشین گؤرَک، بو پئس حادئثه نجه باش وردی؟» 4اؤلدورولَن آروادین اَری اولان لاوئلی اونلارا جاواب وردی: «منئمله جارئیَم گجهلَمَک اوچون بِنیامئنئن گئبعا شهرئنه داخئل اولدوق. 5گئبعا کئشئلری منئم ضئدّئمه قالخدیلار و گجه واختی قالدیغیم اِوی موحاصئرهیه آلدیلار، منی اؤلدورمک ائستهدئلر و جارئیهمی زورلادیلار. بونون نتئجهسئنده آرواد اؤلدو. 6من ده جارئیهمی گؤتوردوم و تئکه-تئکه دوغراییب هر حئصّهسئنی ائسرایئلئن ائرث تورپاقلارینین بوتون بؤلگهلرئنه گؤندَردئم، چونکی ائسرایئلده پوزغونچولوق و آلچاقلیق ادئلئب. 7ای ائسرایئل اؤولادلاری! باخین هامینیز بورادا اؤز فئکئر و مصلحتئنئزی ورئن.»
8بوتون خالق بئر نفر کئمی آیاغا قالخیب ددی: «بئزدن هچ کئم چادیرینا گتمَیهجک و هچ کئم اِوئنه قاییتمایاجاق. 9ائندی بله بئر ائش گؤرمَلییئک: پوشک آتیب گئبعایا هوجوم ادهجیئک. 10قوشونا آذوقه گتئرمک اوچون ائسرایئلئن بوتون قبئلهلرئنئن هر یوز نفردن اونونو، مئن نفرئندن یوزونو، اون مئن نفرئندن مئنئنی گؤتورهجیئک کی، بِنیامئنئن گئبعا شهرئنه گدئب چاتاندا، ائسرایئلده اتدئکلری آلچاق ائشلرئن هامیسینین عوضئنی اونلارا اده بئلسئنلر.» 11بوتون ائسرایئللیلر بئر نفر کئمی بئرلهشئب او شهرئن ضئدّئنه ییغیلدیلار.
12ائسرایئل قبئلهلری بِنیامئن قبئلهسئنئن تورپاقلارینین هر طرفئنه قاصئدلر گؤندَرئب ددئلر: «بو نه پئسلئکدئر، سئزئن آرانیزدا باش ورئب؟ 13ائندی گئبعادا اولان او یاراماز آداملاری بئزه ورئن، اونلاری اؤلدورک و بونونلا ائسرایئلدن بو پئسلئیی تمئزلَیَک.» لاکئن بِنیامئن اؤولادلاری ائستمهدئلر کی، هموطنلری اولان ائسرایئل اؤولادلارینین سؤزونه قولاق آسالار. 14بِنیامئن اؤولادلاری ائسرایئل اؤولادلاری ائله دؤیوشه چیخماق اوچون اؤز شهرلرئندن گئبعایا ییغیلدیلار. 15همئن گون شهرلردن گلن قیلینج داشییان بِنیامئن اؤولادلاری ائیئرمی آلتی مئن کئشی ائدی. بوندان علاوه گئبعا اهالئسئندن ده یدّی یوز نفر سچئلمئش آدام ییغیلدیلار. 16بوتون بو خالقین آراسیندا سولاخای اولان یدّی یوز سچمه آدام وار ائدی کی، هر بئری سرراست ساپاند آتیب، داشلا باشدا اولان بئر توکو بِله، وورا بئلئردی و آتدیقلاری بوشا چیخمیردی.
17بِنیامئنلیلردن باشقا، ائسرایئللیلردن قیلینج داشییان دؤرد یوز مئن کئشئنی سایدیلار کی، بونلارین دا هامیسی دؤیوشچو ائدی. 18ائسرایئل اؤولادلاری بِیت ائله چیخدیلار و تارینین حوضورونا گلئب ددئلر: «بِنیامئن اؤولادلارینین ضئدّئنه بئزئم طرفدن اوّلجه کئم دؤیوشه چیخاجاق؟» رب ددی: «اوّلجه یهودا قبئلهسی چیخاجاق.»
19بلهجه ائسرایئل اؤولادلاری سحر تزدن قالخیب گئبعانین ضئدّئنه اوردوگاه قوردولار. 20ائسرایئللیلر بِنیامئنلیلرله دؤیوشه چیخیب گئبعادا اونلارین ضئدّئنه دوزولدولر. 21بِنیامئن اؤولادلاری گئبعادان چیخدیلار و او گون ائسرایئللیلردن ائیئرمی ائکی مئن کئشئنی ووروب یره سَردئلر. 22لاکئن ائسرایئل قوشونو جسارته گلئب اوّلکی گون دوزولدوکلری یرده گئنه ده دؤیوشه دوزولدولر. 23ائسرایئل اؤولادلاری بِیت ائله چیخیب ربّئن قاباغیندا آخشاما قدر آغلادیلار و رَبدن سوروشوردولار: «آیا هموطنئمئز بِنیامئن اؤولادلاری ائله گئنه دؤیوشه گئرئشَک؟» رب اونلارا ددی: «اونلارین قاباغینا چیخین.»
24ائکئنجی گون ائسرایئل اؤولادلاری بِنیامئن اؤولادلارینا یاخینلاشدیلار. 25همئن گون ده بِنیامئنلیلر اونلارین قاباغینا چیخیب ائسرایئل اؤولادلاریندان بو دفه اون سکّئز مئن کئشئنی ووروب یره سَردئلر. بونلارین هامیسی قیلینج داشییان آداملار ائدی. 26بوتون ائسرایئل اؤولادلاری و بوتون قوشون بِیت ائله چیخیب آغلادی؛ اورادا ربّئن قاباغیندا قالیب آخشاما قدر اوروج توتدولار. ربّئن حوضوروندا یاندیرما و باریش قوربانلاری تقدئم اتدئلر. 27ائسرایئل اؤولادلاری رَبدن مصلحت ائستهدئلر، چونکی تارینین عهد ساندیغی او گونلر اورادا ائدی. 28هارون اوغلو اِلعازار اوغلو پئنِخاس او گونلرده ساندیغین قاباغیندا خئدمت ادئردی. اونلار ربّه ددئلر: «هموطنلرئمئز بِنیامئن اؤولادلارینین ضئدّئنه بئر داها دؤیوشه چیخاق، یوخسا بو ائشدن اَل چَکَک؟» رب ددی: «چیخین، چونکی صاباح اونلاری سئزه تسلئم ادهجیم.»
29ائسرایئللیلر گئبعانین اطرافیندا کمئن قوروب آداملار قویدولار. 30اوچونجو گون گئنه ائسرایئل اؤولادلاری بِنیامئن اؤولادلارینین ضئدّئنه چیخدیلار و اوّلکی کئمی گئبعانین ضئدّئنه دوزولدولر. 31بِنیامئن اؤولادلاری دا بو خالقین ضئدّئنه چیخدیلار و شهردن کنارا چکئلدئلر. اوّلکی کئمی اونلار ائسرایئللیلری قیرماغا باشلادیلار. بِیت ائله و گئبعایا گدن اصلی یوللاردا، هم ده آچیق تورپاقدا اوتوز نفره قدر ائسرایئللی قیریلدی. 32بِنیامئن اؤولادلاری دیئردئلر: «اَوّلکی کئمی اونلار گئنه ده قاباغیمیزدا مغلوبدورلار.» لاکئن ائسرایئل اؤولادلاری دیئردئلر: «قاچاق، اونلاری شهردن اوزاغا اصلی یوللارا چیخارداق.» 33بوتون ائسرایئللیلر یرلرئندن قالخیب بَعَلتاماردا دوزولدولر؛ گئبعانین قرب سمتئنده کمئنده دوران ائسرایئللیلر ده یرلرئندن چیخدیلار. 34او زامان کی، بوتون ائسرایئلدن سچئلمئش اون مئن کئشی گئبعایا هوجوم اتدی، دؤیوش شئدّتلی ائدی؛ آمّا بِنیامئنلیلر موصئبتله راستلاشدیقلارینی بئلمهدئلر. 35رب ائسرایئلئن قاباغیندا بِنیامئنلیلری دارماداغین اتدی. همئن گون ائسرایئل اؤولادلاری بِنیامئنلیلردن ائیئرمی بش مئن یوز کئشئنی هلاک اتدئلر. بونلارین هامیسی قیلینج گَزدئرن آداملار ائدی.
36بِنیامئن اؤولادلاری گؤردولر کی، مغلوب اولوبلار. بله اولدو کی، ائسرایئللیلر گئبعانین ضئدّئنه قوردوقلاری کمئنده دورانلارا بِل باغلادیقلارینا گؤره بِنیامئنلیلره میدان ورمئشدئلر. 37کمئنده دوران آداملار جَلد تَرپهنئب گئبعایا هوجوم اتدئلر؛ کمئنده دوران آداملار اطرافا یاییلیب بوتون شهری قیلینجدان کچئرتدئلر. 38شهردن قالخان بؤیوک توستو، ائسرایئللیلرله کمئنده دورانلار آراسیندا تعیئن اولونموش علامت ائدی. 39بو علامته گؤره دؤیوش میدانینداکی ائسرایئللیلر دؤنوب بِنیامئنلیلرئن اوستونه گتمهیه باشلادیلار. بِنیامئنلیلر ائسرایئللیلری قیرماغا باشلامیشدیلار و اوتوز نفره قدر آدامی اؤلدوردولر. چونکی دیئردئلر: «یقئن اَوّلکی دؤیوشده اولدوغو کئمی قاباغیمیزدا مغلوبدورلار.» 40لاکئن شهردن توستو سوتون کئمی قالخماغا باشلایاندا، بِنیامئنلیلر آرخایا باخیب گؤردولر کی، بوتون شهردن توستو گؤیه قالخیر. 41ائسرایئللیلر دؤنوب اونلارین اوستونه گلنده بِنیامئنلیلری دهشت بورودو، چونکی فَلاکَتله راستلاشدیقلارینی گؤردولر. 42اونلار ائسرایئللیلرئن قاباغیندان گری چکئلئب چؤله طرف قاچدیلار، لاکئن دؤیوش اورانی دا بورودو. شهرلردن چیخانلار، اونلاری موحاصئرهیه آلیب قیردیلار. 43بِنیامئنلیلری موحاصئرهیه آلدیلار و دایانمادان اونلاری تعقئب اتدئلر و گئبعانین قاباغیندا گون دوغان طرفده اونلاری اَزدئلر. 44بِنیامئنلیلردن اون سکّئز مئن نفر یره سَرئلدی. بونلارین هامیسی ائگئد جنگآور ائدئلر. 45قالانلاری دؤنوب چؤله طرف، رئمّون قایاسینا قاچدیلار. ائسرایئللیلر اصلی یوللار بویونجا اونلاردان بش مئن کئشئنی قیردیلار. سونرا گئدعوما قدر بِنیامئنلیلرئن دالینجا دوشوب داها ائکی مئن کئشئنی اؤلدوردولر. 46همئن گون قیلینج گَزدئرَن ائیئرمی بش مئن بِنیامئنلی قیریلدی. بونلارین هامیسی ائگئد جنگآور ائدی. 47لاکئن آلتی یوز کئشی دؤنوب چؤله طرف، رئمّون قایاسینا قاچدیلار و دؤرد آی اورادا قالدیلار. 48ائسرایئللیلر بِنیامئن اؤولادلارینین تورپاقلارینا قاییدیب بوتون شهر ساکئنلرئنی و حیوانلارینی، اَللرئنه نه کچدی، هامیسینی قیلینجدان کچئرتدئلر. سونرا قاباقلارینا چیخان بوتون شهرلره اود ووردولار.
Currently Selected:
داورلر 20: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
