داورلر 19
19
گئبعادا باش ورن دهشتلی حادئثه
1ائسرایئلده پادشاه اولمایان او گونلرده، اِفرایئمئن داغلیق بؤلگهسئنئن اوزاقلاریندا بئر لاوئلی یاشاییردی. او، یهودانین بیتلِحِم شهرئندن اؤزو اوچون بئر جارئیه آلمیشدی. 2بو جارئیه آیری بئر آداملا زئنا اتدی و اوندان آیریلیب آتاسینین اِوئنه، یهودانین بیتلِحِم شهرئنه قاییدیب اورادا دؤرد آی قالدی. 3اَری اونون دالینجا گتدی کی، جارئیهنئن گؤیلونو آلیب اونو گری قایتارسین. او اؤزو ائله نؤکرئنی و بئر جوت اِششَک گؤتوردو. جارئیه اَرئنی آتا اِوئنه آپاردی و آتاسی کئشئنی گؤرنده شادلیقلا پئشوازا چیخدی. 4بو کئشئنئن قایینآتاسی یعنی جاوان آروادین آتاسی اونو اِوئنده قوناق ساخلادی. کئشی اونلاردا اوچ گون قالدی و اونلار یِیئب-ائچئب اورادا قوناق قالدیلار. 5دؤردونجو گون سحر تزدن دوردولار. کئشی گتمهیه حاضیرلاشاندا، جاوان آروادین آتاسی کورهکَنئنه ددی: «بئر تئکه چؤرک یِه کی، قووّت آلاسان، اوندان سونرا گِدَرسئنئز.» 6اونلار اوتوردولار و ائکئسی ده بئرلئکده یِیئب-ائچدئلر؛ سونرا جاوان آروادین آتاسی بو کئشئیه ددی: «خاهئش ادئرم، بو گجهنی ده بئزئمله قال، قوی اورهیئن شاد اولسون.» 7کئشی یولا دوشمَک اوچون آیاغا قالخدی، لاکئن قایینآتاسی اونون قالماسینا چوخ تأکئد اتدی، اونا گؤره ده، او گجهنی گئنه اورادا کچئرتدی. 8بشئنجی گون کئشی گری قاییتماق اوچون سحر تزدن قالخدی. جاوان آروادین آتاسی اونا ددی: «خاهئش ادئرم، بئر آز یمک یِه کی، قووّت آلاسان. گوناورتادان سونرایا قدر گؤزله.» اونلار ائکئسی ده بئرلئکده یمک یدئلر. 9کئشی جارئیهسی و نؤکری ائله گتمک اوچون آیاغا قالخاندا، قایینآتاسی، یعنی جاوان آروادین آتاسی اونا ددی: «باخ، گون آرتیق باتیر؛ خاهئش ادئرم، بو گجهنی ده بورادا قال. چونکی گون باشا گلئب آخشام دوشور. گجهنی بورادا قالین. قوی اورهیئن شاد اولسون. صاباح سحر سفرئنئز اوچون تزدن دورارسینیز و اِوئنه قاییدارسان.»
10لاکئن بو کئشی ائستمهدی کی، گجهنی اونونلا قالسین و آیاغا قالخیب یولا دوشدو. او، یِبوس، یعنی ائندئکی اورشلئم شهرئنئن موقابئلئنه گلئب چیخدی. اونون پالانلی ائکی اِششهیی وار ائدی، جارئیهسی ده یانیندا ائدی. 11اونلار یِبوسا یاخینلاشاندا، آرتیق گون باتماقدا ائدی. نؤکری آغاسینا ددی: «خاهئش ادئرم، گل یِبوسلولارین بو شهرئنه گئرک و گجهنی بورادا کچئردک.» 12آمّا آغاسی اونا ددی: «یوخ، ائسرایئل اؤولادلاریندان اولمایان یاد اِللیلرئن شهرئنه گئرمهیَک، گئبعایا گدک.» 13سونرا آغاسی نؤکرئنه ددی: «گل چالیشاق گئبعایا یا دا رامایا چاتاق. گجهنی اونلارین بئرئنده قالاریق.» 14اونلار اورادان کچئب گتدئلر. بِنیامئنئن گئبعا شهرئنه یاخینلاشارکَن آرتیق گونش باتمیشدی. 15گئبعایا دؤندولر کی، گجهنی اورادا قالسینلار. شهره گئرئب میداندا اوتوردولار، لاکئن هچ کس اونلاری اِوئنه قوناق آپارمادی.
16بو زامان آخشام بئر قوجا کئشی زَمئده اولان ائشئندن اِوه قاییدیردی. او، اِفرایئمئن داغلیق بؤلگهسئندن ائدی و گئبعادا یاشاییردی. آمّا اورانین ساکئنلری بِنیامئنلیلردن ائدئلر. 17بو قوجا کئشی باشینی قالدیردی و شهرئن میدانینداکی موسافئری گؤروب ددی: «هارادان گلئب، هارایا گِدئرسن؟» 18کئشی اونا ددی: «بئز یهودانین بیتلِحِم شهرئندن اِفرایئمئن داغلیق بؤلگهسئنئن اوزاقلارینا گدئرئک. من اورالییام. یهودانین بیتلِحِم شهرئنه گتمئشدئم، ائندی ده اِوئمه قاییدیرام. آمّا منی اِوئنه آپاران یوخدور. 19حال بو کی، اِششَکلرئمئزئن سامانی دا وار، یِمی ده وار. منئم، جارئیهمئن و یانیمداکی نؤکرئن چؤرهیی و شرابی وار؛ هچ نَیه احتئیاجیمیز یوخدور.» 20قوجا کئشی ددی: «جانین صاغ اولسون! قویون سئزئن احتئیاجلارینیزی من رفع ادئم. آنجاق گجهنی میداندا قالمایین.» 21اونو گؤتوروب اِوئنه گتئردی و اِششَکلرئنه یِم وردی. هامی آیاقلارینی یویاندان سونرا یِیئب-ائچدئلر.
22یِیئب-ائچدئکلری زامان، شهر ساکئنلرئندن بئر دسته یاراماز آدام اِوی احاطهیه آلیب قاپینی دؤیدولر. بو آداملار اِو صاحئبی قوجایا ددئلر: «اِوئنه گلن کئشئنی باییرا چیخارت، اونونلا یاتاق.» 23اِو صاحئبی باییرا چیخیب اونلارا ددی: «یوخ، هموطنلرئم، یالواریرام، بله بئر پئسلئک اتمهیئن. ائندی کی بو آدام منئم اِوئمه گلئب، بو آلچاقلیغی اتمهیئن. 24باخ منئم اِوده اَره گتمهمئش قیزیم و او کئشئنئن جارئیهسی وار. قوی اونلاری بورایا چیخاردیم، بو بیآبیرچیلیغی اونلارلا ادئن، اونلارلا گؤزونوزه خوش گؤرونهنی ادئن، لاکئن بو کئشی ائله بله آلچاقلیق اتمهیئن.» 25لاکئن بو آداملار اونا قولاق آسماق ائستمهدئلر. اونا گؤره ده لاوئلی جارئیهسئنئن قولوندان توتوب باییرا، اونلارین یانینا چیخارتدی. اونلار اونا تَجاووز ادئب بوتون گجهنی سحرهجک اونونلا پئس ائشلر گؤردولر. سحر آچیلاندا آروادی بوراخدیلار. 26آرواد گون آغاراندا آغاسینین قالدیغی یره، قوجا آدامین اِوئنه قاییدیب قاپینین یانیندا یره ییخیلدی و هاوا آچیلانا قدر اورادا قالدی.
27آغاسی سحر قالخیب اِوئن قاپیلارینی آچدی و یولونا داوام اتمک اوچون چیخاندا، جارئیهسئنی اِوئن دروازاسیندا اَللری آستانادا یره ییخیلمیش گؤردو. 28کئشی آروادا ددی: «دور، گِدَک.» لاکئن اوندان هچ بئر جاواب گلمهدی. سونرا کئشی جارئیهسئنی اِششهیئن اوستونه قویوب، اؤز شهرئنه یولا دوشدو. 29او، اِوئنه چاتاندا، بئر بیچاق گؤتوروب جارئیهسئنئن جسدئنی اون ائکی تئکهیه بؤلدو و دوغرادیغی تئکهلری بوتون ائسرایئل بؤلگهلرئنه گؤندَردی. 30بو حئصّهلری گؤرَن هر کس ددی: «ائسرایئل اؤولادلاری مئصئردن چیخاندان بو گونهجک، بله بئر حادئثه نه اولوب، نه ده گؤرونوب. بو بارهده دوشونون، مصلحتلهشئب وردئیئنئز قَراری بئلدئرئن.»
Currently Selected:
داورلر 19: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
