داورلر 18
18
مئکانین اِوئنئن غارَت ادئلمهسی
1او گونلرده ائسرایئلده پادشاه یوخ ائدی. اِله همئن گونلرده دان قبئلهسی، یاشاماق اوچون اؤزلرئنه ائرثی تورپاق آختاریردی، چونکی او گونه قدر ائسرایئل قبئلهلری آراسیندا اونلارا ائرث تورپاق دوشمهمئشدی. 2دان اؤولادلاری صورعا و اِشتااول شهرلرئندن اولان بوتون طایفالاریندان بش نفر ائگئد آدامی اؤلکهنئن تَجَسّوسونه گؤندَردئلر و اونلارا ددئلر: «گدئن، اؤلکهنی آختارین.» اونلار اِفرایئمئن داغلیق بؤلگهسئنه، مئکانین اِوئنه گلدئلر و گجهنی اورادا قالدیلار. 3حله مئکانین اِوی یانیندا ائکَن، جاوان لاوئلینئن سَسئنی تانیدیلار؛ اِوه طرف دؤنوب اوندان سوروشدولار: «بورایا سنی کئم گتئرئب؟ بورادا نه ادئرسن؟ سنئن بورادا نه ائشئن وار؟» 4لاوئلی اونلارا ددی: «مئکا منئم اوچون فئلان بَهمان ائشلر گؤردو. او منی اوجرتله توتوب، من ده اونون کاهئنی اولموشام.» 5دانلیلار اونا ددئلر: «خاهئش ادئرئک، تاریدان سوروش. گؤر بئزئم گتدئیئمئز بو یول اوغورلو اولاجاق یا یوخ.» 6کاهئن اونلارا ددی: «سالامات گدئن، گتدئیئنئز بو یول ربّئن نظرئندهدئر.»
7بو بش ائگئد گدئب لَیئشه چاتدیلار و گؤردولر کی، اورادا یاشایان خالق اَمئن-آمانلیقدادیرلار. صئدونلولار کئمی دئنج و راحات یاشاییرلار؛ چونکی بو بؤلگهده هچ کئم یوخ ائدی کی، اونلارا حؤکم ادئب اذئیّت ورسئن. اونلار صئدونلولاردان اوزاق ائدئلر و هچ کسله ده رابئطهلری یوخ ائدی. 8ائگئدلر صورعا و اِشتااول شهرلرئنه، اؤز خالقینین یانینا قاییداندا خالق اونلارا ددی: «نه اؤیرَنه بئلدئنئز؟» 9ائگئدلر اونلارا ددئلر: «قالخین، اونلارا هوجوم اِدَک، چونکی اونلارین تورپاغینی گؤردوک، چوخ یاخشیدیر. نئیه هچ نه اتمئرسئنئز؟ گدئب تورپاغی آلماغی یوباتمایین! 10اورایا چاتاندا آرخایین بئر خالق و گِنئش بئر تورپاق گؤرهجکسئنئز. تاری بو تورپاغی سئزه تسلئم ادئب. اورا اِله تورپاقدیر کی، هچ نَیه اِحتئیاجی یوخدور.»
11دان نسلئندن آلتی یوز کئشی سئلاحلانیب صورعا و اِشتااولدان یولا دوشدولر. 12یهودایا قالخیب گجهنی قئریَتیِعهرئمده قالدیلار. بونا گؤره ده او یِر بو گونه قدر مَخَنِدان #18.12 عئبرانی دئلئنده «دان اوردوگاهی» چاغیریلیر. او یِر قئریَتیِعهرئمئن قربئنده یِرلَشئر. 13اورادان اِفرایئمئن داغلیق بؤلگهسئنه کچدئلر و مئکانین اِوئنه گلدئلر.
14او بش نفر کی، لَیئش دئیارینین تفتئشی اوچون گتمئشدئلر، اؤز خالقینا ددئلر: «آیا بئلئرسئنئز کی، بو اِولرده اِفود، اِو بوتلری، هم ده اویما و تؤکمه بوتلر وار؟ ائندی گؤرون نه ادئرسئنئز، بو بارهده بئر قَرارا گلئن.» 15اونلار اورایا دؤنوب، او جاوان لاوئلینئن قالدیغی مئکانین اِوئنه گلدئلر و اونون حال-اَحوالینی خبر آلدیلار. 16دان اؤولادلاریندان دؤیوش اوچون سئلاحلانمیش آلتی یوز نفر اونون دروازاسینین گئرئشئنده دایاندی. 17اؤلکهنی آختارماغا گِدن او بش ائگئد اِوه گئرئب اویما بوتو، اِفودلا اِو بوتلرئنی و تؤکمه بوتو گؤتوردولر. کاهئن سئلاحلانمیش آلتی یوز نفرئن یانیندا دروازانین گئرئشئنده دایانمیشدی. 18اونلار مئکانین اِوئنه گئرئب اویما بوتو، اِفودلا اِو بوتلرئنی و تؤکمه بوتو گؤتورَنده کاهئن اونلارا ددی: «نه ادئرسئنئز؟» 19او واخت ددئلر: «ساکئت اول، اَلئنله آغزینی اؤرت. دور بئزئمله گِدَک، بئزه آتا و کاهئن اول. سنئن اوچون بئر آدامین اِوئنده کاهئنلئک اتمک یاخشیدیر، یوخسا بئر ائسرایئل قبئلهسئنه، بئر نسله؟» 20کاهئنئن اورهیی شاد اولدو، اِفودلا اِو بوتلرئنی و اویما بوتو گؤتوروب خالقلا برابر گتدی.
21اونلار اؤز اِو اهلئنی، حیوانلاری و اِو اشیالارینی قاباقلارینا قاتیب یولا دوشدولر. 22مئکانین اِوئندن اوزاقلاشاندا مئکانین اِو اهلی ییغیلیب دان اؤولادلارینا چاتدیلار. 23اونلار دان اؤولادلارینا قیشقیردیلار. دان اؤولادلاری دؤنوب مئکایا ددئلر: «سنه نه اولوب کی، بونلاری بورایا ییغیبسان؟» 24مئکا اونلارا ددی: «دوزَلتدئیئم آللاهلاری و کاهئنی گؤتوروب گتدئنئز، مگر آرتیق منه بئر شی قالیب؟ نجه منه دئیه بئلرسئنئز: ”سنه نه اولوب؟“» 25دان اؤولادلاری اونا ددئلر: «سَسئن آرامیزدا اِشئدئلمهسئن، یوخسا تِز قضبلهنَن آداملاریمیز سنئن اوستونه هوجوم اِدَر، هم اؤز حیاتینی، هم ده اِوئندهکئلرئن حیاتینی ائتئرَرسن.» 26دان اؤولادلاری یوللارینا داوام وردئلر. مئکا بو آداملارین اوندان گوجلو اولدوغونو گؤروب اِوئنه قاییتدی.
27دان اؤولادلاری مئکانین دوزَلتدئیی شیلری و اونون کاهئنئنی گؤتوروب لَیئشه، دئنج و آرام بئر خالقا هوجوم اتدئلر. اهالئسئنی قیلینجدان کچئردئب شهره اود ووردولار. 28اونلاری قورتاران اولمادی، چونکی لَیئش صئدوندان اوزاقدا ائدی. بو خالقین هچ کسله ده رابئطهسی یوخ ائدی. بو شهر بِیترِخوبون یانیندا اولان بئر درهده یِرلَشئر. دانلیلار بو شهری تزهدن تئکئب اورادا یاشادیلار. 29اونلار ائسرایئلده دوغولان اؤز آتالاری دانین خاطئرئنه بو شهرئن آدینی دان قویدولار. آمّا شهرئن اوّلکی آدی لَیئش ائدی. 30دان اؤولادلاری اورادا اؤزلری اوچون اویما بوتو قوردولار؛ اؤلکهنئن اسئرلئیه دوشَن گونونه قدر موسا اوغلو گِرشوم اوغلو یوناتان اؤزو و اوغوللاری دان قبئلهسئنه کاهئن اولدولار. 31تارینین عئبادتگاهی شئلودا اولارکن، بوتون بو دؤورده دانلیلار مئکانین دوزَلتدئیی اویما بوته سئتایئش ادئردئلر.
Currently Selected:
داورلر 18: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
