۲سمویئل 2
2
داوودون یهودادا پادشاه سِچئلمهسی
1بوندان سونرا داوود ربدن مصلحت آختاریب سوروشدو: «آیا یهودا شهرلرئندن بئرئنه گدئم؟» رب اونا جاواب وردی: «گت.» داوود ددی: «هارایا قالخیم؟» رب ددی: «خِبرونا.» 2بلهجه داوود، ائکی آروادی یِزرِعِللی اَخئنوعَم و کَرمِللی نابالین دول آروادی اَبئگائلله خِبرونا گتدی. 3داوودون یانیندا اولان آداملاری اؤز عایئلهلرئنی گؤتوروب خِبرونون و اونون اطراف محلّهلرئنده ساکئن اولدولار. 4او واخت یهودا آداملاری گلئب داوودو اورادا یهودا اِوئنئن پادشاهی آدیندا مسح اتدئلر.
و داوودا بئلدئردئلر کی، «شاعولو دفن ادنلر یابِش گئلعاد اهالئسی ائدئلر.» 5داوود یابِش گئلعادین ساکئنلرئنئن یانینا قاصئدلر گؤندَرئب ددی: «رب سئزه برکت ورسئن، چونکی آغانیز شاعولا شفقت گؤرسهدئب اونو دفن ادئبسئنئز. 6قوی رب ده سئزه شفقت و حقئقتله رفتار اتسئن! بو ائشئنئزئن و بو یاخشیلیغینیزین عوضئنی من ده سئزه ورهجیم. 7آغانیز شاعولون اؤلدویو اوچون، قوی ائندی قوللارینیز قووّتدن دوشمهسئن و جسور اولون. چونکی یهودا نسلی منی اؤز اوستونه پادشاه مسح ادئب.»
8لاکئن شاعولون قوشون باشچیسی نِر اوغلو آبنِر شاعولون اوغلو ائشبوشِتی گؤتوروب مَخهنایئمه آپارمیشدی. 9اورادا آبنِر اونو گئلعاد، آشورلولار، یئزرِعِل، اِفرایئم، بِنیامئن و حتّا بوتون ائسرایئلئن اوستونه پادشاه اتدی. 10شاعول اوغلو ائشبوشِت ائسرایئلئن پادشاهی اولان زامان قیرخ یاشیندا ائدی. او، جَمی ائکی ائل پادشاهلیق اتدی. گرچی یهودا نسلی داوودا پِیرَو ائدی. 11داوودون خِبروندا، یهودا نسلی اوستونه پادشاه اولماسی یدّی ائل آلتی آی ائدی.
12بئر گون نِر اوغلو آبنِر، شاعول اوغلو ائشبوشِتئن اعیانلاری ائله مَخهنایئمدن گئبعونا گتدی. 13صِرویا اوغلو یوآب دا داوودون آداملاری ائله چیخیب، گئبعون حوووضونون یانینا گتدی کی، اونلاری گؤرسون. یوآب آداملاری ائله حوووضون بئر طرفئنده، آبنِر ده آداملاری ائله حوووضون او بئری طرفئنده اَیلَشدی.
14آبنِر یوآبا ددی: «قوی جاوانلار قالخیب قاباغیمیزدا تَکبهتَک دؤیوشسونلر.» یوآب ددی: «قالخسینلار.» 15اونلار قالخدیلار. بِنیامئن و شاعول اوغلو ائشبوشِت طرفئندن اون ائکی نفر و داوودون آداملاریندان دا اون ائکی نفر قالخیب سایی-حسابی ائله یرلرئنه کچدئلر. 16اونلار بئربئرئنئن باشیندان توتوب هر بئری اؤز قیلینجینی قاباغیندا اولانین بؤیرونه سوخدو. هامیسی بئرلئکده یره ییخیلدیلار. بونا گؤره ده گئبعوندا اولان او یره خَلقَتهَصّورئم#2.16 «خَلقَتهَصّورئم» - عئبرانی دئلئنده «قیلینجلار ساحهسی» دیئلئر. 17او گون دؤیوش چوخ شئدّتلی اولدو و آبنِرله ائسرایئللیلر داوودون آداملاری قاباغیندا مغلوب اولدولار.
18صِرویانین اوچ اوغلو یوآب، اَبشهی و عَساهِل ده اورادا ائدئلر. عَساهِل چؤل جیرانی کئمی آیاقدان ائتی ائدی. 19او، آبنِرئن دالینجا دوشوب اونو قوووردو و آبنِرئن تعقئبئنده نه صاغا، نه ده سولا دؤنوردو. 20آبنِر آرخایا باخیب ددی: «عَساهِل، بو مگر سنسن؟» او ددی: «بلی، منم.» 21آبنِر اونا ددی: «بئر ساغینا و یا سولونا دؤن. او جاوانلاردان بئرئنی توت، اونون سئلاحلارینی آل.» لاکئن عَساهِل اَل چکمهدن اونو قوووردو. 22آبنِر عَساهِله بئر ده ددی: «قاییت، اَل چک، منی قووما! آخی نئیه سنی اؤلدوروب یره سَرئم؟ سونرا قارداشین یوآبین اوزونه نجه باخارام؟» 23لاکئن عَساهِل یولوندان دؤنمَک ائستمهدی. آبنِر ده نئزهسئنئن آرخا اوجو ائله اونون قارنیندان اله ووردو کی، نئزه اونون کورهیئندن چیخدی. عَساهِل اورادا دوشوب او یرده اؤلدو. بو حادئثهدن سونرا عَساهِلئن ییخیلیب اؤلدویو یره گلنلرئن هامیسی، آیاق ساخلادیلار.
24یوآبلا اَبشهی آبنِرئن دالینجا قاچدیلار و گون باتارکن گئبعون چؤلو یولوندا گئیَخله اوزبهاوز اولان اَمّا تپهسئنه چاتدیلار. 25بِنیامئن اؤولادلاری آبنِرئن آرخاسینا ییغیلدیلار و بئر دسته اولوب بئر تپهنئن باشیندا گؤزلهدئلر. 26آبنِر یوآبا اوز توتوب چیغیردی: «همئشه مگر گرک قیلینج اودسون؟ مگر بئلمئرسن کی، بونون آخیری آجی اولاجاق؟ نه واختا قدر بو خالقا دِمَیهجکسن کی، هموطنلرئنئن تعقئبئندن اَل چکسئنلر؟» 27یوآب ددی: «وار اولان تارییا آند اولسون، اگر سن بو سؤزلری دِمهسَیدئن، حقئقتن، صاباحا قدر دؤیوشچولر دایانمادان اؤز هموطنلرئنی تعقئب ادهجک ائدئلر.» 28سونرا یوآب کَرهنای چالدی و بوتون خالق دایاندی. آرتیق ائسرایئللیلری تعقئب اتمهدئلر، دؤیوشمهیه ده داوام ورمهدئلر. 29آبنِرله آداملاری بوتون گجهنی عَرَبا وادئسئنده یول گتدئلر. اوردون چایینی کچئب بوتون صاباحی یول گدئب مَخهنایئمه چاتدیلار. 30یوآب آبنِرئن دالینجا دوشمکدن اَل چکئب قاییتدی و بوتون خالقی بئر یره ییغدی. داوودون آداملاریندان عَساهِلدن باشقا اون دوقّوز نفر اَسکئک ائدی. 31داوودون آداملاری دا بِنیامئنلیلری و آبنِرئن آداملارینی ووردولار و اوچ یوز آلتمیش نفر اؤلدوردولر. 32عَساهِلی گؤتوروب آتاسینین بیتلِحِمده اولان قَبئرئنده دفن اتدئلر. سونرا یوآب و آداملاری بوتون گجهنی یول گتدئلر و گون دوغاندا خِبرونا چاتدیلار.
Currently Selected:
۲سمویئل 2: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
