۲سمویئل 3
3
داوود نسلئنئن گوجلَنمهسی
(۱سال. ۳:۱-۴)
1شاعول نسلی ائله داوود نسلی آراسیندا چکئشمه اوزون چکدی. و داوود نسلی گتدئکجه قووّتلَندی، آمّا شاعول نسلی ضعئفلهدی.
2خِبروندا داوودا اوغوللار دوغولدو: ائلک اوغلو یِزرِعِللی اَخئنوعَمدن دوغولان اَمنون ائدی. 3ائکئنجئسی کَرمِللی نابالین دول آروادی اَبئگائلدن دوغولان کئلاب، اوچونجوسو گِشور پادشاهی تَلمهیئن قیزی مَعَکادان دوغولان اَبشالوم، 4دؤردونجوسو خَگّئتدن دوغولان اَدونئیا، بِشئنجئسی اَبئطالدان دوغولان شِفَطیا، 5آلتینجیسی دا داوودون آروادی عِگلادان دوغولان یئترِعام ائدی. بونلار خِبروندا داوودا دوغولدولار.
آبنِر داوودا قوشولور
6شاعول نسلی ائله داوود نسلی آراسیندا اولان چکئشمه زامانی، آبنِر اؤزونو شاعول نسلی آراسیندا قووّتلَندئرئردی. 7شاعولون اَیّا قیزی رئصپا آدلی بئر جارئیهسی وار ائدی. ائشبوشِت آبنِره ددی: «نئیه آتامین جارئیهسی ائله یاتدین؟» 8ائشبوشِتئن بو سؤزلرئنه گؤره آبنِر چوخ قضبلَندی و ددی: «مگر من یهودایا عایید اولان بئر ائت باشییام؟ من بو گون آتان شاعولون نسلئنه، اونون قارداشلار و دوستلارینا مهرئبانلیق گؤرسهدئب سئزی داوودا تسلئم اتمهمئشم، لاکئن ائندی سن او آرواددان اؤتری منئم اوستومه گوناه ییخیرسان؟ 9قوی تاری آبنِره بونو و بوندان بَتَرئنی اتسئن، اگر ربّئن داوودا آند ائچدئیئنی، من اونون اوچون یرئنه یتئرمهسم 10و پادشاهلیغی شاعول نسئلئندن گؤتوروب داوودون تختئنی ائسرایئل و یهودا اوستونه داندان بئرشئبایا قدر قورماسام.» 11بله اولاندا ائشبوشِت هچ بئر جاواب وره بئلمهدی، چونکی آبنِردن قورخوردو.
12سونرا آبنِر داوودون یانینا قاصئدلر گؤندَرئب ددی: «بو تورپاق کئمئندئر؟ گل سن منئمله عهد باغلا و باخ، منئم اَلئم ده سنئنله اولاجاق کی، بوتون ائسرایئلی سنئن طرفئنه چکسئن.» 13داوود ددی: «لاپ یاخشی، من سنئنله عهد باغلایارام. آنجاق سندن بونو ائستهیئرم: منی گؤرمهیه گلدئیئنده شاعولون قیزی مئکَلی ده گتئر. یوخسا منی گؤرمهیهجکسن.» 14بلهجه داوود شاعول اوغلو ائشبوشِتئن یانینا قاصئدلر گؤندَرئب ددی: «آروادیم مئکَلی کی، اونو یوز فئلئسطلینئن ختنه دَرئسئنی گتئرئب اؤزومه نئشانلادیم، منه قایتار.» 15ائشبوشِت آدام گؤندَرئب آروادی اَری لایئش اوغلو پَلطیاِلدن آلدی. 16اونون اَری آغلایا-آغلایا بَخورئمه قدر آروادینین دالینجا گتدی. بورادا آبنِر اونا ددی: «گری قاییت.» او دا قاییتدی.
17آبنِر ائسرایئل آغساقّاللاری ائله مصلحتلَشئب دمئشدی: «کچمئشده چوخ ائستهیئردئنئز کی، داوود پادشاهینیز اولسون. 18ائندی ائستهدئیئنئزی یرئنه یتئرئن! چونکی رب داوود حاقّیندا دانیشیب و دیئب: ”قولوم داوودون اَلی ائله خالقیم ائسرایئلی فئلئسطلیلرئن و بوتون دوشمنلرئنئن اَلئندن قورتاراجاغام.“» 19آبنِر بونو بِنیامئنلیلره ده ددی و ائسرایئلله بوتون بِنیامئن نسلئنئن گؤزونده خوش اولان هر شیی گدئب خِبروندا داوودا نقل اتدی.
20آبنِر و اونونلا برابر ائیئرمی نفر خِبرونا، داوودون یانینا گلدئلر. داوود آبنِرله آداملاری اوچون ضئیافت قوردو. 21آبنِر داوودا ددی: «قوی گدئم، بوتون ائسرایئلی آغام پادشاهین یانینا ییغیم کی، سنئنله عهد باغلاسینلار. سن ده اورهیئن ائستهین کئمی هر شیئن اوستونه پادشاهلیق ات.» داوود آبنِری بوراخدی، او دا صاغ-سالامات چیخیب گتدی.
یوآبین آبنِری اؤلدورمهسی
22بو واخت داوودون آداملاری و یوآب بئر هوجومدان قاییتمیشدیلار و اؤزلری ائله چوخلو تالان مالی گتئرمئشدئلر. لاکئن آبنِر خِبروندا داوودون یانیندا دیئلدی، چونکی داوود اونو بوراخمیشدی، او دا صاغ-سالامات چیخیب گتمئشدی. 23او زامان کی، یوآب و اونونلا اولان بوتون قوشون گلدئلر، یوآبا خبر وردئلر: «نِر اوغلو آبنِر پادشاهین یانینا گلمئشدی و پادشاه اونو بوراخدی، او دا صاغ-سالامات چیخیب گتدی.» 24یوآب پادشاهین یانینا گلئب ددی: «سن نه ادئبسن؟ باخ، آبنِر سنئن یانینا گلدی، بس نه اوچون اونو بوراخدین کی، گتسئن؟ 25سن نِر اوغلو آبنِری تانیییرسان. بئلئرسن کی، او سنی آلداتماق اوچون، هارا گدئب-گلدئیئنی اؤیرنمک و اتدئیئن هر شیی بئلمک اوچون گلمئشدی.» 26یوآب داوودون یانیندان چیخدیقدا آبنِرئن دالیسیجا قاصئدلر گؤندَردی و اونو سئرا قویوسونون یانیندان گری قایتاردیلار، لاکئن داوودون بوندان خبری یوخ ائدی.
27آبنِر خِبرونا قاییداندا یوآب اونو دروازانین ائچئنه چکدی کی، اونونلا تکلئکده دانیشسین. و قارداشی عَساهِلئن قانیندان اؤتری آبنِری قارنیندان ووروب اؤلدوردو. 28سونرا داوود بوندان خبر توتاندا ددی: «ربّئن حوضوروندا نِر اوغلو آبنِرئن قانیندان اؤتری من و پادشاهلیغیم ابده کئمی گوناهکار دیئل. 29قوی بو گوناه یوآبین باشینا و آتاسینین بوتون نسلئنئن اوستونه دوشسون. قوی یوآبین نسلئندن یارا-خورالی، جوزاملی#3.29 عئبرانی دئلئنده «جوزاملی» ترجومه اولموش سؤز، گنئش بئر شکئلده چوخ دَری ناخوشلوقلارینی اؤزونده توتوردو.، قولتوق آغاجینا سؤیکَنَن، قیلینجدان کِچَن و یا آجلیق چکن آداملار هچ واخت اَسکئک اولماسین.» 30بلهجه یوآبلا قارداشی اَبشهی آبنِری اؤلدوردولر، چونکی آبنِر اونلارین قارداشی عَساهِلی گئبعونداکی دؤیوشده اؤلدورموشدو.
31سونرا داوود یوآبا و یانیندا اولان بوتون خالقا بله ددی: «پالتارلارینیزی جیرین، چولا بورونوب آبنِر اوچون یاس توتون.» داوود پادشاه تابوتون دالینجا گدئردی. 32آبنِری خِبروندا دفن اتدئلر. پادشاه آبنِرئن قبئری اوستونده اوجا سَسله آغلادی و بوتون خالق اونا قوشولوب آغلادیلار. 33پادشاه آبنِر اوچون مرثئیه اوخودو:
«مگر آبنِر، بئر آخماق کئمی اؤلمهلی ائدی؟
34اَللرئن باغلانمامیشدی،
آیاقلارینا دا زنجئر وورولمامیشدی.
شر آداملار قاباغیندا یره دوشَن بئر آدام کئمی ییخیلدین.»
بوتون خالق گئنه آبنِر اوچون آغلادی.
35سونرا بوتون خالق داوودون یانینا گلدئلر کی، حله گوندوز ائکَن اونو چؤرک یمیه مجبور اتسئنلر. لاکئن داوود آند ائچئب ددی: «اگر گون باتمادان اوّل چؤرک و یا آیری بئر شی دئلئمه وورسام، قوی تاری منه بِلهسئنی و بوندان بَتَرئنی اتسئن!» 36بوتون خالق بونا دئقّت وردی و اونلارین گؤزونه چوخ خوش گلدی، نجه کی، پادشاهین اتدئیی هر شی اونلارین گؤزونه خوش گلمئشدی. 37او گون خالق و بوتون ائسرایئللیلر باشا دوشدولر کی، نِر اوغلو آبنِرئن اؤلدورولمهسی پادشاهین ائستهیی دیئلدی. 38سونرا پادشاه اعیانلارینا ددی: «مگر بئلمئرسئنئز کی، بو گون ائسرایئلده بئر رهبر، بؤیوک بئر آدام هلاک اولوب؟ 39من مسح ادئلمئش بئر پادشاه اولدوغوم حالدا بو گون حله ضعئفم. بو آداملار یعنی صِرویانین اوغوللاری منه حددن آرتیق موشکولدورلر. قوی رب پئسلئک ادهنه عوضئنی ورسئن!»
Currently Selected:
۲سمویئل 3: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
