۲سالنامهلر 35
35
یوشئیا پاسخا بایرامینی کچئردئر
(۲پاد. ۲۳:۲۱-۲۳)
1یوشئیا اورشلئمده رب اوچون پاسخا بایرامینی جشن توتدو و بئرئنجی آیین اون دؤردونجو گونو پاسخا قوربانینی کَسدئلر. 2او، کاهئنلری وظئفهلرئنه قویدو و اونلاری ربّئن معبدئنئن خئدمتی اوچون تشوئق اتدی. 3لاوئلیلره ده کی، بوتون ائسرایئله تعلئم ورئردئلر و رب اوچون تقدئس ادئلمئشدئلر، ددی: «موقدّس ساندیغی ائسرایئل پادشاهی داوود اوغلو سولیمانین تئکدئیی معبده قویون. او داها سئزئن چئیئنلرئنئزه یوک اولمایاجاق. ائندی تارینیز ربّه و اونون خالقی ائسرایئله خئدمت ادئن. 4ائسرایئل پادشاهی داوودون و اونون اوغلو سولیمانین یازدیغی کئمی نسئللرئنئزه و بؤلمهلرئنئزه گؤره حاضیر اولون. 5قوحوملارینیز اولان خالقین نسئل بؤلمهلرئنه گؤره و لاوئلیلرئن نسئل بؤلمهلرئنه گؤره موقدّس یرده دایانین. 6پاسخا قوربانینی کَسئن، اؤزونوزو تقدئس ادئن و موسا واسئطهسیائله ورئلَن ربّئن سؤزونه عمل ادئب قوحوملارینیز اوچون حاضیرلیق گؤرون.»
7یوشئیا خالقا، اورادا اولان هر کسه پاسخا قوربانی اولاراق، اوتوز مئن قوزو و کچی بالاسی و اوچ مئن گامیش وردی. بونلار پادشاهین مالیندان ائدی. 8اونون ریئسلری ده اؤز گؤیلو ائله خالقا، کاهئنلره و لاوئلیلره هدئیّهلر وردئلر. تاری معبدئنئن ریئسلری خئلقئیا، زِکَرئیّا و یِخیاِل، کاهئنلره پاسخا قوربانی اوچون سورودن ائکی مئن آلتی یوز باش قوزو و اوچ یوز گامیش وردئلر. 9کونَنیا، اونون قارداشلاری شِمَعیا و نِتهنِل، لاوئلیلرئن ریئسلری خَشَبیا، یِعیاِل و یوزاباد لاوئلیلره پاسخا بایرامی اوچون بش مئن باش قوزو و بش یوز باش گامیش وردئلر.
10خئدمت ائشی حاضیر اولاندا، پادشاهین امری ائله کاهئنلر یرلرئنده و لاوئلیلر بؤلمهلرئنه گؤره دایاندیلار. 11پاسخا قوربانلارینی کَسدئلر. کاهئنلر اونلارین اَلئندن آلدیقلاری قانی سَپدئلر، لاوئلیلر ده قوربانلارین دَرئسئنی سویدولار. 12یاندیرما قوربانلارینی آییردیلار کی، خالقا نسئل بؤلمهلرئنه گؤره ورسئنلر و خالق ربّه یاندیرما قوربانلاری تقدئم اتسئن. نجه کی، موسانین کئتابیندا یازیلمیشدی. گامیشلارلا دا بله اتدئلر. 13پاسخا قوربانینی دا حؤکمه گؤره اوددا قیزارتدیلار. موقدّس شیلری تئیانلاردا، قازانلاردا و تاوالاردا پئشئردئلر و بوتون خالقا تَلَسئک پایلادیلار. 14بوندان سونرا اؤزلری و کاهئنلر اوچون حاضیرلادیلار، چونکی هارون نسلئندن اولان کاهئنلر گجه دوشَنه قدر یاندیرما قوربانلاری و پئیلری تقدئم اتمکله مشغول ائدئلر. بوندان اؤتری ده لاوئلیلر اؤزلری و هارون نسلئندن اولان کاهئنلر اوچون حاضیرلیق گؤردولر. 15آساف نسلئندن اولان نغمهچئلر داوودون، آسافین، هِیمانین و پادشاهین گؤروجوسو یِدوتونون امر اتدئیی یرلرده ائدئلر، قاپیچیلار دا هر دروازا آغزیندا دایانمیشدیلار. خئدمتلرئندن آیریلمالاری لازیم دیئلدی، چونکی لاوئلی اولان قوحوملاری اونلار اوچون حاضیرلیق گؤرموشدولر.
16پادشاه یوشئیانین امرئنه گؤره، پاسخا بایرامینی جشن توتماق و ربّئن قوربانگاهیندا یاندیرما قوربانلاری تقدئم اتمک اوچون ربّئن بوتون خئدمتی او گون بلهجه حاضیرلاندی. 17اورادا اولان ائسرایئل اؤولادلاری او زامان پاسخا بایرامینی، و مایاسیز چؤرک بایرامینی یدّی گون جشن توتدولار. 18پیغمبر سَمویئلئن دؤوروندن بَری پاسخا بایرامی ائسرایئلده بله کچئرئلمهمئشدی. ائسرایئل پادشاهلاریندان هچ بئری یوشئیا ائله کاهئنلرئن و لاوئلیلرئن، بوتون یهودالیلارین، اورادا اولان ائسرایئللیلرئن و اورشلئمده یاشایانلارین توتدوغو بو پاسخا بایرامی کئمی بئر پاسخا کچئرتمهمئشدئلر. 19بو پاسخا یوشئیانین پادشاهلیغینین اون سکّئزئنجی ائلئنده کچئرئلدی.
یوشئیانین اؤلومو
(۲پاد. ۲۳:۲۸-۳۰)
20یوشئیانین معبده گؤردویو بوتون بو ائشلردن سونرا، مئصئر پادشاهی نِکو موحارئبه اتمک اوچون فَرات چایینین یانیندا اولان کَرکِمئشه گلدی. یوشئیا اونونلا موقابئله اتمک اوچون چیخدی. 21مئصئر پادشاهی اونون یانینا قاصئدلر گؤندَرئب ددی: «ای یهودا پادشاهی، منئم سنئنله نه ائشئم وار؟ من بو گون سنئن اوستونه یوخ، موحارئبه اتدئیئم سولالهنئن ضئدّئنه گلمئشم. تاری منه امر ادئب کی، تَلَسئم. منئمله اولان تاریدان چکئن کی، سنی هلاک اتمهسئن.» 22یوشئیا اونونلا موحارئبه اتمکدن اوز دؤندَرمهدی و اونونلا ووروشماق اوچون قئیافهسئنی دَیئشدی، تاری طرفئندن اولان نِکونون سؤزلرئنه قولاق آسمادی و ووروشماق اوچون مِگئدّو اوواسینا گتدی.
23اوخآتانلار پادشاه یوشئیانی اوخونان ووردولار. پادشاه نؤکرلرئنه ددی: «منی بورادان آپارین، چونکی آغیر یارالانمیشام.» 24نؤکرلری اونو عارابادان گؤتوردولر و اونو اؤزونون ائکئنجی عاراباسینا مئندئرئب اورشلئمه آپاردیلار. یوشئیا اؤلدو و آتالارینین قبئرلرئنده باسدیریلدی. بوتون یهودالیلار و اورشلئملیلر یوشئیا اوچون یاس توتدولار. 25اِرِمیا یوشئیا اوچون مرثئیه قوشدو. بوتون کئشی و آرواد خانَندهلر بو گونه قدر مرثئیهلرئنده یوشئیا بارهده دانیشیرلار. بو مرثئیهلری اوخوماغی ائسرایئلده عادت اتدئلر. باخین، بونلار مرثئیهلر کئتابیندا یازیلیب. 26یوشئیانین قالان ائشلری، ربّئن قانونوندا یازیلدیغینا گؤره اتدئیی صداقتلی ائشلری، 27ائلک ائشلرئندن آخیر ائشلرئنه قدر ائسرایئل و یهودا پادشاهلارینین کئتابیندا یازیلیبدیر.
Currently Selected:
۲سالنامهلر 35: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
