۲سالنامهلر 34
34
یهودا پادشاهی یوشئیا
(۲پاد. ۲۲:۱-۲)
1یوشئیا، پادشاه اولدوغو واخت، سکّئز یاشیندا ائدی و اورشلئمده اوتوز بئر ائل پادشاهلیق اتدی. 2او، ربّئن گؤزونده دوغرو اولان ائشلر اتدی، هر ائشده آتاسی داوودون یوللاری ائله گدئب اونلاردان صاغا-سولا دؤنمهدی.
3پادشاهلیغینین سکّئزئنجی ائلئنده، یوشئیا حله جاوان ائکن، آتاسی داوودون تاریسینی آختارماغا باشلادی. اون ائکئنجی ائلده بونو باشلادی کی، یهودانی و اورشلئمی پرستئشگاهلاردان، اَشِرا بوتلرئندن، اویما بوتلردن و تؤکمه بوتلردن تمئزلهسئن. 4یوشئیانین حوضوروندا بَعَل بوتلرئنئن قوربانگاهلارینی داغیتدیلار. اونلارین اوستونده قویولان بوخور قوربانگاهلارینی کَسئب آتدیلار. اَشِرا بوتلرئنی، اویما بوتلری و تؤکمه بوتلری سیندیردیلار، اونلاری اَزئب توز اتدئلر و بو بوتلره قوربان گتئرنلرئن قبئرلری اوستونه سَپدئلر. 5یوشئیا کاهئنلرئن سوموکلرئنی اؤز قوربانگاهلاریندا یاندیردی، بلهجه یهودانی و اورشلئمی تمئزلهدی. 6یوشئیا مِنَسّه، اِفرایئم و شَمعون قبئلهلرئنئن شهرلرئنده و اطراف وئرانهلئکلرئنده ده نَفتالی تورپاغینا قدر قوربانگاهلاری داغیتدی. 7اَشِرا بوتلرئنی و اویما بوتلری توز ادهنه قدر اَزدی، بوتون ائسرایئل اؤلکهسئنده بوخور قوربانگاهلارینین هامیسینی کَسئب آتدی، سونرا اورشلئمه قاییتدی.
معبدده شرئعت کئتابینین تاپیلماسی
(۲پاد. ۲۲:۳-۲۰)
8پادشاهلیغینین اون سکّئزئنجی ائلئنده، اؤلکهنی و معبدی تمئزلهدئکدن سونرا، یوشئیا اَصَلیا اوغلو شافانی، شهر ریئسی مَعَسِیانی، و یوآخاز اوغلو سالنامهچی یواَخی گؤندَردی کی، اؤز تاریسی ربّئن معبدئنی تعمئر اتسئنلر. 9اونلار باش کاهئن خئلقئیانین یانینا گلدئلر. بوتون قالان ائسرایئللیلرئن یعنی، مِنَسّهلیلرئن، اِفرایئملیلرئن، بوتون یهودالیلارین، بِنیامئنلیلرئن و اورشلئمده یاشایانلارین تاری معبدئنه گتئردئکلری، قاپیدا دوران لاوئلی کشئکچئلرئن ییغدیقلاری پولو 10ربّئن معبدئنئن ائشئنه نظارت ادنلره وردئلر و ربّئن معبدئنده ائشلهیَن اوستالار اونو معبدئن تعمئر و برپاسی اوچون خرج اتدئلر. 11اونلار دا پولو دولگرلره و اوستالارا وردئلر کی، یهودا پادشاهلارینین خارابا قویدوقلاری اِولر اوچون یونولموش داش و رَزهلرله دئرَکلر اوچون تخته آلسینلار. 12بو آداملار صداقتله ائش گؤردولر. ائشه نظارت اتمک اوچون اونلارین اوستونه لاوئلیلر یعنی مِراری نسلئندن اولان یَخَت و عوبَدیا، قوحات نسلئندن اولان زِکَرئیّا و مِشولّام، هر بئری موسئقی آلَتلرئنده چالا بئلَن لاوئلیلر قویولموشدو. 13بونلار یوک داشییانلارین دا اوستونده ائدئلر و هر جور خئدمتده بوتون ائشی گؤرَنلره نظارت ادئردئلر. لاوئلیلردن بعضئلری ده مئرزه، مأمور، و قاپیچی اولاراق ائش گؤردولر.
14ربّئن معبدئنه گتئرئلمئش اولان پولو چیخارتدیقلاری زامان، کاهئن خئلقئیا موسا واسئطهسیائله ورئلَن ربّئن شرئعت کئتابینی تاپدی. 15خئلقئیا مئرزه شافانلا دانیشیب اونا ددی: «ربّئن معبدئنده شرئعت کئتابینی تاپمیشام.» خئلقئیا کئتابی شافانا وردی. 16شافان کئتابی پادشاهین یانینا آپاردی، هم ده اونا خبر گتئرئب ددی: «قوللارین تاپشیردیغین هر شیی ادئرلر. 17ربّئن معبدئنده تاپیلان پولو بوشالتدیلار، اونو نظارتچئلرئن و ائشچئلرئن اَلئنه وردئلر.» 18مئرزه شافان پادشاها بونو دا خبر ورئب ددی: «کاهئن خئلقئیا منه بئر کئتاب وردی.» شافان اونو پادشاهین حوضوروندا اوخودو. 19پادشاه شرئعت سؤزلرئنی اشئدنده پالتارینی جیردی. 20پادشاه خئلقئیایا، شافان اوغلو اَخئقاما، مئکا اوغلو عَبدونا، مئرزه شافانا و پادشاهین خئدمتچئسی عَسایایا امر ادئب ددی: 21«گدئن، تاپیلمیش کئتابین سؤزلرئنه گؤره منئم اوچون، ائسرایئللیلرئن و یهودالیلارین قالانی اوچون ربدن مصلحت آلین، چونکی ربّئن بئزئم ضئدّئمئزه تؤکولموش قضبی بؤیوکدور. اونا گؤره کی، آتالاریمیز بو کئتابدا یازیلان هر شیه گؤره ربّئن سؤزونه عمل اتمهمئشدئلر.»
22خئلقئیا و پادشاهین آداملاری نَبئیّه خولدانین یانینا گتدئلر. او، خَسرا اوغلو توقَت اوغلو پالتارلارا باخان شَلّومون آروادی ائدی و اورشلئمده ائکئنجی محلّهده یاشاییردی. اونونلا بو بارهده صؤحبت اتدئلر. 23خولدا اونلارا ددی: «ائسرایئلئن تاریسی رب بله دیئر: ”سئزی منئم یانیما گؤندَرَن آداما دیئن کی، 24رب بله دیئر: من بو یره و بورادا یاشایانلارین اوستونه بلا گتئرئرم، حتّا بوتون او لعنتلری ده کی، بو کئتابدا یازیلیب و یهودا پادشاهینین حوضوروندا اوخویوبلار. 25چونکی اونلار منی ترک ادئبلر و آیری آللاهلارا بوخور یاندیریب بوتون عمللری ائله منی قضبلَندئرئبلر. بونا گؤره ده بو یرئن ضئدّئنه قضبئم تؤکولهجک و سؤنمیهجکدئر.“ 26آنجاق ربدن مصلحت آلماق اوچون سئزی گؤندَرَن یهودا پادشاهینا دیئن کی، ائسرایئلئن تاریسی رب اشئتدئیئن سؤزلر بارهده بله دیئر: 27”اونا گؤره کی، تاری سؤزلرئنی بو یرئن و اورادا یاشایانلارین ضئدّئنه اشئدنده اورهیئن یومشالدی و اونون قاباغیندا اؤزونو آلچالتدین، چونکی منئم حوضورومدا اؤزونو آلچالتدین، پالتارینی جیریب حوضورومدا آغلادین. بونا گؤره سنی اشئتمئشدئم.“ رب بله بویورور. 28”باخ، من سنی آتالارینا قوشاجاغام و راحاتلیق ائچئنده اؤز قبئرئنه قویولاجاقسان و بو یرئن و اورادا یاشایانلارین اوستونه گتئرهجیئم بوتون بلانی گؤزلرئن گؤرمهیهجک.“» اونلار بو خبری پادشاها چاتدیردیلار.
پادشاه و خالق ربله عهد باغلاییرلار
(۲پاد. ۲۳:۱-۲۰)
29پادشاه یهودا و اورشلئمئن بوتون آغساقّاللارینی چاغیرتدیریب اؤز یانینا ییغدی. 30پادشاه، اونونلا بئرلئکده بوتون یهودا آداملاری، اورشلئمده یاشایانلار، کاهئنلر، لاوئلیلر و بؤیوکدن کئچئیه قدر بوتون خالق ربّئن معبدئنه گتدئلر. پادشاه، ربّئن معبدئنده تاپیلمیش عهد کئتابینین بوتون سؤزلرئنی اونلارا اشئتدئرئب اوخودو. 31پادشاه اؤز یرئنده دایاندی. او، ربّئن حوضوروندا عهد باغلادی کی، ربّئن یولو ائله گدئب اونون امرلرئنی، شهادتلرئنی، و قایدالارینی بوتون قلبی و بوتون جانی ائله ساخلاسین و بو کئتابدا یازیلمیش عهدئن سؤزلرئنی یرئنه یتئرسئن. 32او، اورشلئمده اولانلارین هامیسینا و بِنیامئنلیلره بو عهدی تصدئق اتدئردی. اورشلئمده یاشایانلار تارینین، آتالارینین تاریسینین عهدئنه گؤره بله اتدئلر. 33یوشئیا ائسرایئللیلرئن بوتون تورپاقلاریندا ائیرنج شیلرئن هامیسینی آرادان قالدیردی و ائسرایئلده اولانلارین هامیسینا اؤزلرئنئن تاریسی ربّه قوللوق اتمهیی امر اتدی. اونون بوتون عؤمرو بویو، خالق آتالارینین تاریسی ربّئن دالینجا گتمکدن دؤنمهدئلر.
Currently Selected:
۲سالنامهلر 34: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
