۲سالنامهلر 2
2
معبدئن تئکئلمهسئنه حاضیرلیق
(۱پاد. ۵:۱-۱۸)
1سولیمان قصد اتدی کی، ربّئن آدینا بئر معبد، اؤزو اوچون ده بئر سارای تئکسئن. 2بونا گؤره ده یوک داشییان یتمئش مئن نفر و داغلاردا داش یونان هشتاد مئن نفر تعیئن اتدی. اونلارین اوستونه ده اوچ مئن آلتی یوز نظارتچی قویدو. 3سونرا صور پادشاهی خوراما خبر گؤندَرئب ددی: «نجه آتام داوودلا اِتدئن و اونا سئدر آغاجلاری گؤندَردئن کی، یاشاماق اوچون اؤزونه سارای تئکسئن، اِله ده منه گؤندَر. 4باخ، من تاریم ربّه تقدئس اتمک اوچون اونون آدینا بئر معبد تئکئرم کی، اونون حوضوروندا خوش عطئرلی بوخور یاندیرماق اوچون، دائمی تقدئم چؤرکلری اوچون، سحر-آخشام، سَبّت گونلرئنده، تزه آی مراسئملرئنده و تاریمیز ربّئن بایراملاریندا یاندیرما قوربانلاری اوچون اولسون. بونلار ائسرایئل اوچون ابدی قایدادیر. 5تئکهجیئم معبد بؤیوک اولاجاق، چونکی تاریمیز بوتون آللاهلاردان بؤیوکدور. 6لاکئن کئم اونا اِو تئکمهیه قادئردئر؟ او، گؤیه و گؤیلرئن گؤیونه سیغماز و من کئمَم کی، اونا بئر اِو تئکَم؟ اونون قاباغیندا آنجاق بوخور یاندیرماق اوچون بئر یر تئکه بئلهرم. 7ائندی منه بئر آدام گؤندَر کی، قیزیل، گوموش، بورونج، دَمئر ائشلرئنی، ارغوانی، قیرمیزی رنگلی و لاجورد پارچا ائشلرئنی باجارسین، هر جور اویما ائشی گؤرسون و آتام داوودون حاضیرلادیغی و منئم یانیمدا، یهودادا و اورشلئمده اولان اوستالارلا بئرلئکده ائشلهسئن. 8لوبناندان منه سئدر، شام و اَردَج آغاجلاری گؤندَر، چونکی بئلئرم کی، سنئن آداملارین لوبناندان آغاج کَسمهیی باجاریرلار. باخ، منئم آداملاریم سنئن آداملارینلا ائشلَیهجکلر کی، 9منه بول تاختا دئرَکلری حاضیرلاسینلار. چونکی تئکهجیئم معبد بؤیوک و خارئقه اولاجاق. 10باخ، من ده سنئن آداملارینا، یعنی آغاج کَسنلره ائیئرمی مئن کور#2.10 تقرئبن ۳۵۰۰ تون یارما، ائیئرمی مئن کور#2.10 تقرئبن ۲۹۰۰ تون آرپا، ائیئرمی مئن بَت#2.10 تقرئبن ۴۴۰۰۰۰ لئتر شراب و ائیئرمی مئن بَت زیتون یاغی ورهرم.»
11صور پادشاهی خورام گؤندَردئیی مَکتوبلا سولیمانا جاواب وردی: «رب خالقینی سِودئیی اوچون سنی اونلارین اوستونده پادشاه ادئب.» 12خورام بله داوام وردی: «گؤیو و یری یارادان ائسرایئلئن تاریسی رب موبارَک اولسون کی، پادشاه داوودا حئکمتلی، دَرّاکهلی و فَهئم اوغول ورئب، اِله کی، رب اوچون بئر معبد، اؤزو اوچون ده بئر پادشاه سارایی تئکسئن. 13ائندی سنئن یانینا خورام-آبی آدیندا اوستا و عاغیلّی بئرئنی گؤندَرئرم. 14او، دانلی بئر آروادین و صورلو بئر آتانین اوغلودور. بو آدام قیزیل، گوموش، بورونج، دَمئر، داش، آغاج ائشلرئنی، ارغوانی، لاجورد، قیرمیزی پارچا و نازئک کتان ائشلرئنی باجاریر، هر جور اویما ائشئنی و اونا تاپشیریلان هر ناخیشی چکه بئلئر. سنئن اوستالارینلا و آتان آغام داوودون اوستالاری ائله بئرلئکده اونا دا ائش تاپشیریلسین. 15ائندی آغام ددئیی بوغدانی و آرپانی، زیتون یاغینی و شرابی قوللارینا گؤندَرسئن. 16بئز ده سنه لازیم اولدوغو قدر لوبناندان آغاج کَسهرئک و اونو ساللارلا دهنز یولو ائله سنئن یانینا یافایا گتئرهرئک، سن ده اونو اورشلئمه چیخاردارسان.»
17سولیمان ائسرایئلده اولان بوتون قرئبلری، آتاسی داوودون سئیاهییا آلدیغیندان سونرا بئر ده سایدی. قرئبلر یوز اَلّی اوچ مئن آلتی یوز نفر ائدئلر. 18اونلاردان یتمئش مئن نفری یوک داشیماغا، هشتاد مئن نفری داغلاردا داش یونماغا قویدو. اوچ مئن آلتی یوز آدامی دا خالقی ائشلَتمَک اوچون نظارتچی اتدی.
Currently Selected:
۲سالنامهلر 2: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
