۲سالنامهلر 1
1
سولیمان تاریدان حئکمت ائستهیئر
(۱پاد. ۳:۴-۱۵)
1داوود اوغلو سولیمان اؤز پادشاهلیغینی مؤحکملَندئردی، تاریسی رب اونونلا ائدی و اونو چوخ اوجالتدی. 2سولیمان بوتون ائسرایئللیلری، مئنباشیلاری، یوزباشیلاری، قاضیلاری، بوتون ائسرایئلده هر بئر رهبری و عایئله باشچیلارینی چاغیردی. 3سولیمان و اونونلا برابر بوتون جاماعات گئبعوندا اولان پرستئشگاها گتدئلر، چونکی تارینین حوضور چادیری کی، ربّئن قولو موسا اونو چؤلده قورموشدو، اورادا ائدی. 4لاکئن داوود تارینین ساندیغینی قئریَت یِعهرئمدن اونون اوچون حاضیرلادیغی یره گتئرمئشدی، چونکی داوود اونون اوچون اورشلئمده بئر چادیر قورموشدو. 5خور اوغلو اوری اوغلو بِصهلِلئن دوزَلتدئیی بورونج قوربانگاه گئبعوندا، ربّئن خیمهسی قاباغیندا ائدی و سولیمانلا جاماعات اورایا ربدن مصلحت آلماغا گتدئلر. 6سولیمان اورایا، ربّئن حوضورونا، حوضور چادیرینین قاباغینداکی بورونج قوربانگاها قالخدی و اونون اوستونده مئن باش یاندیرما قوربانی تقدئم اتدی.
7همئن گجه تاری سولیمانا گؤرونوب اونا ددی: «نه ائستهیئرسن، سنه ورئم؟» 8سولیمان تارییا ددی: «سن آتام داوودا بؤیوک شفقت گؤرسدئبسن و اونون یرئنه منی پادشاه ادئبسن. 9ائندی، یارب تاری، آتام داوودا وردئیئن وعده یرئنه یِتئشسئن، چونکی سن منی اله بئر خالقین اوستونه پادشاه ادئبسن کی، یرئن توزو قدر چوخدورلار. 10ائندی منه حئکمت و بئلئک ور کی، بو خالقا حؤکم اده بئلئم، چونکی سنئن بو بؤیوک خالقینا کئم حؤکم اده بئلر؟» 11تاری سولیمانا ددی: «ائندی کی اورهیئنده بو ائستَک وار و سن وار-دؤولت، ثروت، عئزّت، حتّا سندن نئفرت ادنلرئن جانینی و اؤزونه اوزون عؤمور ائستمهدئن، آمّا اؤزون اوچون حئکمت و بئلئک ائستهدئن کی، سنی اوستونده پادشاه اتدئیئم خالقیما حؤکم ادهسن، 12حئکمت و بئلئک سنه عطا اولوندو. سنه اله وار-دؤولت، ثروت و عئزّت ورهجیم کی، نه سندن قاباق اولان پادشاهلاردا اولوب، نه ده سندن سونراکیلاردا اولاجاق.» 13سولیمان گئبعوندا اولان پرستئشگاهدان، حوضور چادیرینین قاباغیندان اورشلئمه گتدی و ائسرایئل اوستونده پادشاهلیق اتدی.
سولیمانین وار-دؤولتی
(۱پاد. ۱۰:۲۶-۲۹)
14سولیمان دؤیوش عارابالاری و آتلیلار ییغدی؛ اونون مئن دؤرد یوز دؤیوش عاراباسی و اون ائکی مئن آتلیسی وار ائدی. اونلاری عارابالار اوچون آیریلان شهرلرده و اورشلئمده، پادشاهین یانیندا یِرلَشدئردی. 15پادشاه اورشلئمده قیزیل و گوموشو او قدر چوخ اتدی کی، داشلارا برابر اولدو، سئدر آغاجینی دا او قدر بول اتدی کی، هامار بؤلگهده بئتَن وحشی انجئر آغاجینا برابر اولدو. 16سولیمانین آتلاری مئصئردن و قِوِهدن گتئرئلئردی، پادشاهین تاجئرلری اونلاری قِوِهدن ساتین آلیردیلار. 17هر بئر دؤیوش عاراباسی آلتی یوز شِکِل#1.17 تقرئبن ۹/۶ کئلو گوموشه، هر بئر آت دا یوز اَلّی شِکِل#1.17 تقرئبن ۷/۱ کئلو گوموشه مئصئردن گتئرئلئردی. بوتون خئت و اَرام پادشاهلاری دا بونلاری سولیمانین تاجئرلرئنئن واسئطهسیائله آلیردیلار.
Currently Selected:
۲سالنامهلر 1: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
