۲سالنامهلر 11
11
شِمَعیانین پیغمبرلئیی
(۱پاد. ۱۲:۴-۲۱)
1رِحوبعام اورشلئمه گلدئکده، یهودا و بِنیامئن اِوئنی - یوز هشتاد مئن سچمه دؤیوشچوسونو بئر یره ییغدی کی، ائسرایئللیلرله موحارئبه ادئب سلطنتی رِحوبعاما قایتارسین. 2لاکئن ربّئن بو سؤزو تاری آدامی شِمَعیایا نازئل اولدو: 3«یهودا پادشاهی سولیمان اوغلو رِحوبعاما، یهودا و بِنیامئنده اولان بوتون ائسرایئللیلره دِه کی، 4رب بله دیئر: ”گرک گتمیهسئنئز و هموطنلرئنئزله موحارئبه اتمیهسئنئز. هر کس اؤز اِوئنه قاییتسین، چونکی بو ائش منئم طرفئمدن اولوب.“» بلهجه اونلار ربّئن سؤزونه قولاق آسدیلار و یَروبعامین اوستونه گتمکدن اَل چکدئلر.
رِحوبعام قالالار تئکئر
5رِحوبعام اورشلئمده یاشادی و یهودانین دئفاعسی اوچون شهرلر تئکدی. 6تئکدئیی شهرلر بیتلِحِم، اِیتام، تَقوعَع، 7بِیتصور، سوکو، عَدوللام، 8گَت، مارِشا، زئف، 9اَدورهیئم، لاکئش، عَزِقا، 10صورعا، اَیّالون و خِبرون ائدی. او یهودا و بِنیامئن تورپاغیندا اولان بو قالالی شهرلری تئکدی. 11قالالاری مؤحکملهدئب اونلارا سرکردهلر تعیئن اتدی و اونلاردا ارزاق، زیتون یاغی، و شراب آنبار اتدی. 12هر شهره سئپر و نئزهلر قویدو، اونلاری چوخ مؤحکملَندئردی. بلهجه یهودا ائله بِنیامئن تورپاقلاری اونون طرفئنده قالدیلار.
13بوتون ائسرایئلده اولان کاهئنلر و لاوئلیلر ده اونلارین بوتون محللرئندن گلئب رِحوبعامین یانینا ییغیلدیلار. 14لاوئلیلر اوتلاقلارینی و مولکلرئنی قویوب یهودایا و اورشلئمه گلدئلر. چونکی یَروبعام اونلاری اوغوللاری ائله بئرلئکده ربّه کاهئنلئک اتمکدن برکنار اتمئشدی. 15او، پرستئشگاهلار اوچون هم ده دوزَلتدئیی کچی و دانا بوتلری اوچون اؤز کاهئنلرئنی قویموشدو. 16اونلارین دالینجا بوتون ائسرایئل قبئلهلرئندن اولان ائسرایئللیلر ده کی، صادئق اورَکله ربّی آختارماق ائستهیئردئلر، اورشلئمه گلدئلر کی، آتالارینین تاریسی ربّه قوربان تقدئم اتسئنلر. 17یهودا پادشاهلیغینی مؤحکملَندئردئلر و اوچ ائل سولیمانین اوغلو رِحوبعاما کؤمک اتدئلر. چونکی اوچ ائل داوودون و سولیمانین یولو ائله گتدئلر.
رِحوبعامین آروادلاری و اوشاقلاری
18رِحوبعام ماخَلَتی اؤزونه آرواد آلدی. ماخَلَت داوودون اوغلو یِرئموتلا یَسّهنئن اوغلو اِلئآبین قیزی اَبئخهیئلئن قیزی ائدی. 19او، رِحوبعاما اوغوللار دوغدو: یِعوشو، شِمَریانی، زاهَمی. 20ماخَلَتدن سونرا اَبشالومون قیزی مَعَکانی آلدی. او، اَبئیانی، عَتّهیی، زئزانی و شِلومئتی دوغدو. 21رِحوبعام اَبشالومون قیزی مَعَکانی بوتون آیری آروادلاری و جارئیهلرئندن داها چوخ سِوئردی. او، اون سکّئز آرواد و آلتمیش جارئیه آلمیشدی، ائیئرمی سکّئز اوغولون و آلتمیش قیزین آتاسی اولدو. 22رِحوبعام مَعَکا اوغلو اَبئیانی قارداشلاری آراسیندا باشچی و رهبر تعیئن اتدی چونکی اونو پادشاه اتمک نئیّتئنده ائدی. 23آغیلّی رفتار ادئب بوتون یهودا و بِنیامئن تورپاغیندا هر قالالی شهره اوغوللارینی گؤندَردی و اونلارا بول ارزاق وردی، اونلار اوچون چوخلو آرواد آلدی.
Currently Selected:
۲سالنامهلر 11: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
