۲سالنامهلر 10
10
ائسرایئللیلر رِحوبعاما ضئدّ چیخیرلار
(۱پاد. ۱۲:۱-۲۰)
1رِحوبعام شِکِمه گتدی، چونکی بوتون ائسرایئللیلر شِکِمه گلمئشدئلر کی، اونو پادشاه اتسئنلر. 2نِباط اوغلو یَروبعام، بونو اشئتدئیی زامان، مئصئردن قاییتدی چونکی سولیمان پادشاهین اَلئندن اورایا قاچمیشدی. 3اونو چاغیرتدیردیلار. یَروبعام گلدی و بوتون ائسرایئللیلرله بئرلئکده رِحوبعاملا دانیشیب اونا ددی: 4«آتان اوستوموزه آغیر یوغ قویدو. سن ائندی آتانین چتئن قوللوغونو و اوستوموزه قویدوغو آغیر یوغو یونگوللَشدئر، بئز ده سنه قوللوق ادهرئک.» 5رِحوبعام اونلارا ددی: «اوچ گوندن سونرا گئنه منئم یانیما گلئن.» خالق گتدی.
6پادشاه رِحوبعام آتاسی سولیمانین صاغلیغیندا اونا مصلحت ورن آغساقّاللارلا مصلحتلهشئب ددی: «بو خالقا جاواب ورمک اوچون منه نه مصلحت ورئرسئنئز؟» 7آغساقّاللار اونا ددئلر: «اگر سن بو خالقا مهرئبان اولاسان و اونلاری راضی ادئب اونلارلا یاخشی دانیشاسان، دائم سنه قول اولارلار.» 8آمّا او، آغساقّاللارین وردئکلری مصلحته محل قویمادی و اونونلا بئرلئکده بؤیوموش و اونا خئدمت ادن جاوان آداملارلا مصلحتلَشدی. 9اونلاردان سوروشدو: «سئز نه مصلحت ورئرسئنئز؟ منه دیئن. بو خالقا کی، ”آتانین اوستوموزه قویدوغو یوغو یونگوللَشدئر“ دیئرلر، نه جاواب ورئم؟» 10اونونلا بئرلئکده بؤیوموش جاوان آداملار اونا ددئلر: «سنه ”آتان اوستوموزه آغیر یوغ قویدو، سن اونو یونگوللَشدئر“ دئیَن بو خالقا بله دِه: ”منئم کئچئک بارماغیم آتامین بِلئندن یوغوندور. 11آتام سئزی آغیر یوغلا یوکلهمئشدی، آمّا من سئزئن یوغونوزو داها دا آرتیراجاغام. آتام سئزی قامچیلارلا تَنبِه اتدی، آمّا من سئزی عقربلرله تَنبِه ادهجیم.“»
12یَروبعام بوتون خالقلا بئرلئکده پادشاهین ددئیی کئمی کی، «اوچ گون سونرا گئنه یانیما گلئن»، اوچ گون سونرا رِحوبعامین یانینا گلدئلر. 13پادشاه اونلارا یاوا جاواب وردی. پادشاه رِحوبعام آغساقّاللارین مصلحتئنه محل قویماییب، 14جاوان آداملارین مصلحتئنه موطابئق، خالقا ددی: «آتام سئزی آغیر یوغلا یوکلهمئشدی، آمّا من اونو داها دا آرتیراجاغام. آتام سئزی قامچیلارلا تَنبِه اتدی، آمّا من عقربلرله تَنبِه ادهجیم.» 15بلهجه پادشاه خالقا قولاق آسمادی، چونکی بو حادئثه تاری طرفئندن اولدو کی، رب شئلولو اَخئیا واسئطهسیائله نِباط اوغلو یَروبعاما ددئیی سؤزو یرئنه یتئرسئن.
16بوتون ائسرایئللیلر پادشاهین اونلارا قولاق آسمادیغینی گؤرنده اونا جاواب ورئب ددئلر:
«داوودلا بئزئم نه ائشئمئز وار؟
یَسّهنئن اوغلوندا ائرثئمئز یوخدور!
ای ائسرایئللی، هر کس اِوئنه!
ای داوود، ائندی اؤز اِوئنه باخ!»
بوتون ائسرایئللیلر اِولرئنه گتدئلر. 17رِحوبعام فقط یهودا شهرلرئنده یاشایان ائسرایئل اؤولادلاری اوستونده پادشاهلیق اتدی. 18پادشاه رِحوبعام ائجباری فَحلهلر اوستونده نظارتچی اولان هَدورامی گؤندَردی. ائسرایئل اؤولادلاری اونو داشا باسیب اؤلدوردولر. پادشاه رِحوبعام تَلَسئک اؤز عاراباسینا مئندی کی، اورشلئمه قاچسین. 19بلهجه ائسرایئل داوودون سولالهسئنئن ضئدّئنه قالخدی و بو، بو گونه کئمی بلهدئر.
Currently Selected:
۲سالنامهلر 10: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
