۱سمویئل 31
31
شاعوللا اوغوللارینین اؤلومو
(۱سال ۱۰:۱-۱۲)
1فئلئسطلیلر ائسرایئللیلرله دؤیوشوردولر. ائسرایئللیلر فئلئسطلیلرئن قاباغیندان قاچدیلار و گئلبوعا داغیندا قیریلیب دوشدولر. 2فئلئسطلیلر شاعوللا اوغوللارینی تعقئب ادئب شاعولون اوغوللاری یوناتانی، اَبئنادابی و مِلکئشوعهیی اؤلدوردولر. 3دؤیوش شاعولون اطرافیندا شئدّتلَنَنده اوخآتانلار اونو تاپدیلار و آغیر یارالادیلار. 4شاعول اؤز سئلاحدارینا ددی: «قیلینجینی چک، منی وور، یوخسا بو ختنهسئزلر گلئب قیلینجلارینی منه سوخوب باشلارینی قال ادهجکلر.» لاکئن سئلاحداری چوخ قورخدوغوندان بونو اتمک ائستمهدی. اونا گؤره ده شاعول قیلینجی گؤتوروب اؤزونو اونون اوستونه ییخدی. 5سئلاحداری شاعولون اؤلدویونو گؤرنده، او دا اؤزونو قیلینجینین اوستونه ییخیب شاعوللا بئرلئکده اؤلدو. 6او گون شاعول، اوچ اوغلو، سئلاحداری، بوتون آداملاری ائله بئرلئکده هلاک اولدولار. 7درهنئن او بئری طرفئنده و اوردون چایینین او بئری تاییندا اولان ائسرایئللیلر، ائسرایئل قوشونونون قاچدیغینی و شاعوللا اوغوللارینین اؤلدویونو گؤرنده شهرلری قویوب قاچدیلار. فئلئسطلیلر گلئب او یرلرده یاشادیلار.
8او گونون صاباحی فئلئسطلیلر اؤلدورولَنلری سویماق اوچون گلنده، گئلبوعا داغیندا شاعوللا اوچ اوغلونون مِیئتئنی تاپدیلار. 9شاعولون باشینی کسئب سئلاحلارینی گؤتوردولر. بوتلرئنئن معبدئنه و خالقا خوش خبر ورمک اوچون فئلئسطلیلرئن اؤلکهسئنئن هر طرفئنه قاصئد گؤندَردئلر. 10شاعولون سئلاحلارینی ائلاهه عَشتاروتون معبدئنه قویدولار و جسدئنی بِیتشهآن شهرئنئن دووارینا میخلادیلار.
11یابِش گئلعاد اهالئسی فئلئسطلیلرئن شاعولا اتدئکلرئنی اشئدنده، 12بوتون جنگاورلری قالخدیلار و گجه بویو یول گدئب شاعولون و اوغوللارینین جسدئنی بِیتشِهآنین دوواریندان گؤتوردولر و یابِشه گلئب اورادا جسدلری یاندیردیلار. 13سونرا جسدلرئن سوموکلرئنی گؤتوروب یابِشده، گَز آغاجینین آلتیندا باسدیردیلار و یدّی گون اوروج توتدولار.
Currently Selected:
۱سمویئل 31: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
