۱سمویئل 16
16
داوودون پادشاهلیغا مسح اولونماسی
1رب سمویئله ددی: «ائندی کی، شاعولو ائسرایئل اوستونده پادشاه اولماقدان ردّ اتمئشم، نه واختا قدر اونون دردئنی چکهجکسن؟ یاغ بوینوزونو یاغلا دولدور و گت. سنی بیتلِحِملی یَسّهنئن یانینا گؤندَرهجیم. چونکی اونون اوغوللاری آراسیندان اؤزوم اوچون پادشاه تعیئن اتمئشم.» 2لاکئن سمویئل ددی: «نجه گده بئلهرم؟ شاعول اشئتسه، منی اؤلدورَر.» رب ددی: «اؤزونله بئر بوزوو گؤتوروب ده: ”ربّه قوربان کسمک اوچون گلمئشم.“ 3یَسّهنی ده قوربان مراسئمئنه دعوت ات، و سونرا نه ادهجیئنی سنه بئلدئرهرم. سنه دئیهجیئم آدامی منئم اوچون مسح اِدَرسن.» 4سمویئل ربّئن ددئیی کئمی ادئب بیتلِحِمه گلدی. شهرئن آغساقّاللاری اونو تئترهیهرک پئشواز اتدئلر و سوروشدولار: «بو گلئشئن آیا خیئردئر؟» 5او جاواب وردی: «بلی، خیئردئر. ربّه قوربان کسمک اوچون گلمئشم. اؤزونوزو تقدئس ادئن و منئمله برابر قوربان مراسئمئنه گلئن.» سمویئل یَسّه ائله اوغوللارینی دا تقدئس ادئب اونلاری دا قوربان مراسئمئنه دعوت اتدی.
6اونلار گلدئکده سمویئل اِلئیابا باخیب ددی: «دوغرودان دا، ربّئن مسح اتدئیی، ربّئن حوضوروندادیر!» 7لاکئن رب سمویئله ددی: «اونون گؤرونوشونه و اوجا بویونا باخما، من اونو ردّ اتمئشم. اونا گؤره کی، رب ائنسانین گؤردویو کئمی گؤرمَز، چونکی ائنسان ظاهئره، رب آمّا اورهیه باخار.» 8او زامان یَسّه اَبئنادابی چاغیردی و اونو سمویئلئن حوضوروندان کچئرتدی. سمویئل ددی: «رب بونو دا سچمهیئب.» 9یَسّه شمّانی گتئردی و سمویئل ددی: «رب بونو دا سچمهیئب.» 10بلهجه یَسّه اوغلانلارینین یدّئسئنی ده سَمویئلئن قاباغیندان کچئرتدی. آمّا سمویئل یَسّهیه ددی: «رب بونلاری سچمهیئب.» 11سونرا یَسّهدن سوروشدو: «اوغلانلارینین هامیسی بودور؟» یَسّه جاواب وردی: «لاپ کئچئیی ده وار، لاکئن ائندی قویون اوتاریر.» سمویئل یَسّهیه ددی: «دالیسیجا آدام گؤندَر و اونو دا بورایا گتئر. چونکی او بورایا گلمَسه، بئز سوفرهیه اوتورمایاجاغیق.» 12یَسّه آدام گؤندَرئب اونو ائچهری گتئرتدی. اوغلان آلیاناق، گؤزلری گؤزل، ظاهئری ده یاراشیقلی ائدی. رب سمویئله ددی: «دور، اونو مسح ات، چونکی سِچئلمئش بودور.» 13سمویئل یاغ بوینوزونو گؤتوروب قارداشلاری آراسیندا اونو مسح اتدی و او گوندن ربّئن روحو قووّتله داوودون اوستونه اِندی. سونرا سمویئل قالخیب رامایا گتدی.
شاعول و داوود
14ربّئن روحو شاعولدان آیریلمیشدی. ربّئن گؤندَردئیی شر بئر روح اونا عذاب چکدئرئردی. 15شاعولون نؤکرلری اونا بله ددئلر: «باخ، تارینین گؤندَردئیی شر بئر روح سنه اذئیّت ورئر. 16ای آغامیز، قاباغیندا اولان قوللارینا امر ات کی، یاخشی چنگ چالان بئر آدام آختارسینلار. تارینین گؤندَردئیی شر روح سنئن اوستونه گلن زامان او چنگ چالار، سن ده روحلانارسان.» 17شاعول نؤکرلرئنه ددی: «منئم اوچون یاخشی چنگ چالان بئر آدام تاپیب یانیما گتئرئن.» 18جاوان نؤکرلردن بئری جاواب وردی: «من گؤرموشم کی، بیتلِحِملی یَسّهنئن اوغلو یاخشی چنگ چالیر. او، ائگئد، جسور دؤیوشچو، حئکمتله دانیشان، یاراشیقلی بئر اوغلاندیر و رب اونونلادیر.» 19شاعول یَسّهنئن یانینا قاصئدلر گؤندَرئب ددی: «قویون اوتاران اوغلون داوودو منئم یانیما گؤندَر.» 20یَسّه بئر اِششهیه چؤرک، بئر تولوق شراب، بئر کچی بالاسی یوکلهدی و اوغلو داوودون اَلی ائله شاعولا گؤندَردی. 21داوود شاعولون یانینا گلدی و اونون قوللوغوندا دوردو. داوود شاعولون چوخ خوشونا گلدی و اونو اؤز سئلاحداری اتدی.
22سونرا شاعول یَسّهنئن یانینا آدام گؤندَرئب ددی: «خاهئش ادئرم، قوی داوود یانیمدا قالسین، چونکی او، گؤزومده لوطف تاپیب.» 23بلهجه هر دفه تارینین گؤندَردئیی شر روح شاعولا گلن زامان، داوود چنگ گؤتوروب چالاردی، شاعول ساکئتلهشَردی، یاخشی اولاردی و شر روح اوندان آیریلاردی.
Currently Selected:
۱سمویئل 16: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
