۱سمویئل 17
17
داوود گولیاتی اؤلدورور
1فئلئسطلیلر موحارئبه اوچون قوشونلارینی ییغیب یهودانین سوکو شهرئنده جَملَشدئلر. و اِفِسدَمئمده اوردوگاه قوردولار کی، سوکولا عَزِقا شهری آراسیندادیر. 2شاعوللا ائسرایئللیلر ییغیلیب اِلا درهسئنده اوردوگاه قوردولار و فئلئسطلیلرئن ضئدّئنه دؤیوش اوچون دوزولدولر.
3فئلئسطلیلر بئر تپهنئن اوستونده، ائسرایئللیلر ده او بئری تپهده دایانمیشدیلار، آرالاریندا دره وار ائدی. 4گَت شهرئندن اولان گولیات آدلی بئر قهرمان فئلئسطلیلرئن اوردوگاهیندان ائرهلی چیخدی. اونون بویو آلتی قولآچ بئر قاریش #17.4 تقرئبن ۳ مترائدی. 5باشیندا بورونج دَبئلقهسی واردی، اَینئنه بش مئن شِکِل#17.5 تقرئبن ۵/۵۷ کئلو آغیرلیغیندا بورونجدن پوللو زئرِه گِیمئشدی. 6بالدیرلارینا بورونج زئرِه تاخمیشدی و کورهیئنده ده بورونج مئزراق واردی. 7نئزهسئنئن تاختاسی توخوجو دَزگاهینین تئری کئمی ائدی، اونون دمئر اوجو دا آلتی یوز شِکِل#17.7 تقرئبن ۷ کئلو آغیرلیغیندا ائدی. سئپر داشییان سئلاحداری دا اونون قاباغیندا گدئردی.
8گولیات ائسرایئل فوجلارینین موقابئلئنده دایانیب قیشقیرا-قیشقیرا ددی: «نئیه دؤیوشه چیخیب دوزولوبسونوز؟ مگر من فئلئسطلی، سئز ده شاعولون قوللاری دیئلسئنئز؟ آرانیزدان بئر کئشی سچئن، قویون یانیما گلسئن. 9اگر منئمله ووروشا بئلئب منی اؤلدورسه، اوندا بئز سئزه قول اولاریق، یوخ اگر من اونو ووروب اؤلدورسَم، اوندا سئز بئزه قول اولوب قوللوق ادهجکسئنئز.» 10فئلئسطلی گئنه ددی: «بو گون من ائسرایئل فوجلارینا میدان اوخویارام. منئم قاباغیما تکبهتک ووروشماق اوچون بئر کئشی چیخاردین!» 11شاعول و بوتون ائسرایئللیلر، فئلئسطلینئن بو سؤزلرئنی اشئدن واخت، واهئمهیه دوشوب چوخ قورخدولار.
12داوود یهودانین بیتلِحِم شهرئندن اولان یَسّه آدلی بئر اِفراتلینین اوغلو ائدی. یَسّهنئن سکّئز اوغلو وار ائدی. شاعولون دؤورونده یَسّه قوجالیب یاشلانمیشدی. 13اونون اوچ بؤیوک اوغلو شاعولون دالینجا دؤیوشه گتمئشدئلر. دؤیوشه گدن اوچ اوغلونون آدی بله ائدی: ائلک دوغولانی اِلئآب، ائکئنجئسی اَبئناداب و اوچونجوسو شَمّا. 14داوود یَسّهنئن لاپ کئچئک اوغلو ائدی. اوچ بؤیوک اوغلو شاعولون دالینجا گدئردی. 15لاکئن داوود آتاسینین سوروسونو اوتارماق اوچون شاعولون یانیندان بیتلِحِمه گدئب گلردی. 16فئلئسطلی گولیات قیرخ گون سحر-آخشام گلئب ائسرایئللیلره میدان اوخودو.
17بئر گون یَسّه، اوغلو داوودا ددی: «ائندی قارداشلارین اوچون بو بئر اِفا#17.17 تقرئبن ۲۲ لئتر قووورغا و اون کؤمبه چؤرهیی گؤتور، اوردوگاها، قارداشلارینین یانینا تَلَسئک گت. 18بو اون تئکه پنئری ده مئنباشی اوچون گؤتور، اوندان قارداشلارینین حال-احوالینی سوروش و منه اونلاردان بئر خبر گتئر.» 19داوودون قارداشلاری، شاعول، و بوتون ائسرایئللیلر اِلا درهسئنده فئلئسطلیلرله دؤیوشده ائدئلر.
20داوود سحر تزدن دوروب قویونلارینی چوبانا تاپشیردی و یَسّهنئن بویوردوغو کئمی ارزاقلاری گؤتوروب گتدی. او، اوردوگاها گلن زامان قوشون دؤیوش میدانینا چیخیردی و نعره چکهرک دؤیوشه دوزولوردو. 21ائسرایئللیلرله فئلئسطلیلر دؤیوشمک اوچون اوز-اوزه دایاندیلار. 22داوود گتئردئیی شیلری لوازئمات کشئکچئسئنه وردی و اؤزو جبههیه قاچدی و قارداشلارینین یانینا گلئب اونلاری سالاملادی. 23داوود اونلارلا صؤحبت اِدَرکَن، فئلئسطلیلرئن گَت شهرئندن اولان گولیات آدلی قهرمان، اؤز فوجلارینین آراسیندان ائرهلی چیخیب گئنه اوّلکی کئمی سؤزلر ددی. داوود بونلاری اشئتدی. 24بوتون ائسرایئللیلر بو آدامی گؤرنده، اونون قاباغیندان قاچدیلار و چوخ قورخدولار. 25ائسرایئللیلر ددئلر: «قاباغا چیخان بو آدامی گؤرورسونوز؟ دوغرودان دا، او، ائسرایئله میدان اوخوماغا چیخیر. کئم اونو اؤلدورسه، پادشاه اونو وار-دؤولته چاتدیراجاق، قیزینی اونا ورهجک و آتاسینین عایئلهسئنی ائسرایئلدهکی ورگئدن آزاد ادهجک.» 26داوود یانینداکی آداملارلا دانیشیب ددی: «بو فئلئسطلئنی اؤلدوروب ائسرایئلی بو خجالتدن قورتاران آداما نه ادئلهجک؟ چونکی بو ختنهسئز فئلئسطلی کئمدئر کی، وار اولان تارینین قوشونلارینا میدان اوخوسون؟» 27خالق بو سؤزه موطابئق اونا جاواب ورئب ددئلر: «اونو اؤلدورَن آداما بله ادئلهجک.»
28داوود آداملارلا دانیشارکَن، لاپ بؤیوک قارداشی اِلئآب اونون سَسئنی اشئتدی و قضبدن آلوولانیب ددی: «سن نئیه آشاغی اِنئبسن؟ چؤلدهکی بئر نچه قویونوموزو کئمه تاپشیریبسان؟ بئلئرم، سنئن تکبّوروندن و اورهیئنئن پئس نئیّتئندن خبرئم وار، چونکی بورایا دؤیوشه تاماشا اتمک اوچون گلئبسن.» 29آمّا داوود ددی: «ائندی مگر نه اتمئشم؟ یعنی دانیشا دا بئلمهرم؟» 30داوود اورادان دؤنوب آیری بئرئندن سوروشدو و خالق اونا گئنه ده اوّلکی کئمی جاواب ورئب هَمَن سؤزلری ددی.
31داوودون بو سؤزلرئنی اشئدنلر، بونو شاعولا چاتدیردیلار. شاعول اونو یانینا چاغیرتدیردی. 32داوود شاعولا ددی: «بو آدامدان اؤتری هچ کئم اورهیئنی اوزمهسئن. سنئن قولون گدئب او فئلئسطلی ائله ووروشاجاق.» 33شاعول داوودا ددی: «بو فئلئسطلی ائله ووروشماغا سنئن گوجون چاتماز، چونکی سن حله جاوانسان، او آمّا جاوانلیغیندان دؤیوشچودور.» 34داوود شاعولا ددی: «سنئن قولون آتاسینین قویونلارینی اوتاریردی. آصلان یا دا آیی گلئب سورودن بئر قوزو گؤتورَنده 35من اونون دالینجا گدئب اونا هوجوم اِدَردئم و قوزونو آغزیندان قورتاراردیم. اگر اوستومه آتیلاردی، من بوغازینین توکلرئندن توتارادیم و یره چیرپیب اؤلدورَردئم. 36بو قولون هم آصلان، هم ده آیی اؤلدوروب، بو ختنهسئز فئلئسطلی ده اونلاردان بئری کئمی اولاجاق، چونکی او، وار اولان تارینین فوجلارینا میدان اوخویوب.» 37داوود سؤزونه داوام وردی: «منی آصلان پنجهسئندن، آیی پنجهسئندن قورتاران رب بو فئلئسطلینئن ده اَلئندن قورتاراجاق.» شاعول داوودا ددی: «گت، رب سنه یار اولسون!»
38شاعول اؤز پالتارلارینی داوودا گِیئندئردی و باشینا بورونج دَبئلقه قویوب اَینئنه زئرِه گِیئندئردی. 39داوود بو زئرِهئن اوستوندن قیلینج تاخیب یِرئمهیه چالیشدی، چونکی اونا آلیشمامیشدی. سونرا داوود شاعولا ددی: «بونلارا آلیشمادیغیم اوچون یِرئیه بئلمئرم.» و اونلاری اَینئندن چیخارتدی. 40اَلئنه دَیَنهیئنی گؤتوروب، چایدان اؤزونه بش هامار داش سچدی و اونلاری اوستوندهکی چوبان تورباسینین جئبئنه قویوب اَلئنده ساپاند، فئلئسطلئیه یاخینلاشدی.
41فئلئسطلی ائرهلی گلئب داوودا یاخینلاشدی. سئپر داشییان نؤکری اونون قاباغیندا ائدی. 42نظر سالیب داوودو گؤرنده اونا اهانتله باخدی. چونکی داوود جاوان، آلیاناق و اوزو گؤیچک ائدی. 43فئلئسطلی داوودا ددی: «مگر من ائتَم کی، اوستومه دَیَنَکلرله گلئرسن.» فئلئسطلی اؤز آللاهلاری ائله داوودو لعنتلهدی، 44و ددی: «یانیما گل، سنئن اَتئنی گؤیدهکی قوشلارا و چؤلدهکی حیوانلارا ورهجیم.»
45او واخت داوود فئلئسطلئیه ددی: «سن منئم اوستومه قیلینج، نئزه و مئزراقلا گلئرسن، لاکئن من سنئن اوستونه سؤیدویون ائسرایئل فوجلارینین تاریسی قوشونلار ربّئن آدی ائله گلئرم. 46بو گون رب سنی منه تسلئم ادهجک و من سنی اؤلدورهجیم. باشینی بدنئندن آییراجاغام. بو گون فئلئسطلی قوشونونون لِشلرئنی گؤیدهکی قوشلارا و یردهکی حیوانلارا ورهجیم کی، بوتون دونیا بئلسئن کی، ائسرایئلده بئر تاری وار. 47بوتون بو جاماعات دا بئلهجک کی، رب قیلینج یا دا نئزه ائله خئلاص اتمَز، چونکی بو دؤیوش ربّئندئر و او سئزی بئزئم اَلئمئزه ورهجک.»
48فئلئسطلی داوودون قاباغینا چیخماق اوچون دوروب یاخینلاشاندا، داوود جَلد اونو قاباقلاییب فئلئسطلی فوجلارینا طرف قاچدی. 49داوود اَل آتیب تورباسیندان بئر داش گؤتوردو، ساپاندلا فیرلادیب فئلئسطلینئن آلنیندان ووردو. داش اونون آلنینا باتدی و او، اوزو اوسته یره ییخیلدی.
50داوود فئلئسطلئنی بئر ساپاند، بئر داشلا مغلوب اتدی و اونو ووروب اؤلدوردو. داوودون اَلئنده هچ قیلینج یوخ ائدی. 51او قاچیب بو فئلئسطلینئن اوستونده دوردو. فئلئسطلینئن قیلینجی گؤتوردو، قینیندان چکئب اونو اؤلدوردو و بو قیلینجلا اونون باشینی کَسدی. فئلئسطلیلر اؤز قهرمانلارینین اؤلدورولدویونو گؤرنده قاچدیلار. 52ائسرایئللیلرله یهودالیلار دا قالخیب نعره چکدئلر و فئلئسطلیلری گَتئن گئرئشئنه و عِقرونون دروازالارینا چاتانا قدر قوودولار. فئلئسطلیلردن اؤلَنلر شَعهرئم یولو بویو گَت#17.52 قَدئم یونان ترجومهسئنده «گَت» گلئب، لاکئن عئبرانی متن «درهنئن» دیئر. و عِقرونا قدر یره سَرئلمئشدئلر. 53ائسرایئل اؤولادلاری فئلئسطلیلری آرخادان قوواندان سونرا قاییدیب اونلارین اوردوگاهینی تالان اتدئلر. 54داوود گولیاتین باشینی گؤتوروب اورشلئمه گتئردی، لاکئن سئلاحینی اؤز چادیرینا قویدو.
55شاعول داوودون فئلئسطلینئن ضئدّئنه چیخدیغینی گؤرَن زامان، قوشون باشچیسی آبنِره ددی: «آبنِر، بو جاوان کئمئن اوغلودور؟» آبنِر ده ددی: «پادشاه صاغ اولسون، بئلمئرم.» 56پادشاه ددی: «سوروش گؤر، بو جاوان کئمئن اوغلودور.» 57داوود گولیاتی اؤلدوروب قاییداندان سونرا، آبنِر اونو گؤتوروب شاعولون حوضورونا گتئردی. فئلئسطلینئن باشی اونون اَلئنده ائدی. 58شاعول اوندان سوروشدو: «ای جاوان، کئمئن اوغلوسان؟» داوود جاواب وردی: «قولون بیتلِحِملی یَسّهنئن اوغلویام.»
Currently Selected:
۱سمویئل 17: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
