۱سمویئل 15
15
شاعول عَمالِقلیلرله ساواشیر
1سمویئل شاعولا ددی: «رب منی گؤندَردی کی، سنی اؤز خالقی ائسرایئل اوستونده پادشاه اولماق اوچون مسح ادئم. ائندی ربّئن سؤزونو اشئت. 2قوشونلار ربّی بله دیئر: ”عَمالِقلیلری جزالاندیراجاغام. یادیمدادیر کی، نجه ائسرایئللیلر مئصئردن چیخان زامان، یولدا اونلارین ضئدّئنه دوردولار. 3ائندی گت، عَمالِقلیلری قیر، هر شیلرئنی کامئل دارماداغین ات و اونلارا حِیفئن گلمهسئن. کئشئدن آرواداجاق، اوشاقدان کؤرپهیهجک، اؤکوزدن قویوناجاق، دَوهدن اِششیهجک هامیسینی قیر.“»
4شاعول خالقی چاغیردی و اونلاری طِلائمده سایدی: ائکی یوز مئن پئیادا عسگرله برابر یهودادان اون مئن نفر وار ائدی. 5شاعول عَمالِقلیلرئن شهرئنه گلئب درهده کمئن قوردو. 6او، قِنلیلره ددی: «گدئب عَمالِقلیلردن آیریلین کی، سئزی ده اونلارلا برابر قیرماییم. چونکی ائسرایئل اؤولادلاری مئصئردن چیخان زامان سئز اونلارا مهرئبانلیق اتدئنئز.» بلهجه قِنلیلر عَمالِقلیلردن آیریلدیلار.
7شاعول خَوئلادان مئصئرئن شرقی اولان شورا قدر عَمالِقلیلری قیردی. 8عَمالِق پادشاهی اَگَگی صاغ توتدو و بوتون خالقی کامئل بئر شکئلده قیلینجدان کچئرتدی. 9آمّا شاعول و خالق اَگَگه و عَمالِقلیلرئن لاپ یاخشی قویونلارینا، اؤکوزلرئنه، کؤکَلدئلمئش حیوانلارینا، قوزولارینا و یاخشی شیلرئن هامیسینا حیفی گلئب کامئل محو اتمک ائستمهدئلر. کامئل محو اولونان فایداسیز و دَیَرسئز شیلر ائدی.
10بوندان سونرا ربّئن سؤزو سمویئله نازئل اولدو: 11«شاعولو پادشاه اتدئیئمه پشمان اولدوم. چونکی او منئم دالیمجا گلمکدن دؤنوب، سؤزلرئمی یرئنه یتئرمهیئبدئر.» سمویئل قضبلَندی و بوتون گجهنی ربّه فغان اتدی. 12سحر اِرکَن دوردو کی، شاعوللا گؤروشسون. آمّا اونا بله خبر وردئلر: «شاعول کَرمِله گلدی و اؤزونه یادبود بئر سوتون قویاندان سونرا دؤنوب، ائرهلئدهکی گئلگالا اِندی.»
13سمویئل شاعولون یانینا گلدی. شاعول اونا ددی: «قوی رب سنه برکت ورسئن، من ربّئن امرئنه عمل اتدئم.» 14آمّا سمویئل ددی: «بس قولاقلاریما گلن بو قویون مَلَشمهسی و اشئتدئیئم بو اؤکوز بؤیورتوسو نهدئر؟» 15شاعول ددی: «اونلاری عَمالِقلیلردن گتئرئبلر. چونکی خالق قویون-کچئلرئن و اؤکوزلرئن لاپ یاخشیسینی ساخلادی کی، سنئن تارین ربّه قوربان اتسئنلر. لاکئن قالانلارینی کامئل یوخ اتدئک.» 16او واخت سمویئل شاعولا ددی: «دایان، قوی کِچَن گجه ربّئن منه ددئکلرئنی سنه دیئم.» شاعول ددی: «دانیش.»
17سمویئل ددی: «سن اؤز گؤزونده کئچئک اولدوغون حالدا، مگر ائسرایئل قبئلهلرئنئن باشچیسی اولمادین؟ مگر رب سنی ائسرایئل اوستونه پادشاه مسح اتمهدی؟ 18رب سنی وظئفه اوچون گؤندَرئب ددی: ”گت و گوناهکارلاری، بو عَمالِقلیلری کامئل محو ات. اونلاری قیریب قورتارانا قدر اونلارلا ووروش.“ 19بس نه اوچون ربّئن سؤزوندن ائطاعت اتمهدئن، تالانا گئرئشدئن و ربّئن گؤزونده پئس ساییلان ائشی گؤردون؟» 20شاعول سمویئله ددی: «من ربّئن سؤزوندن ائطاعت اتدئم و ربّئن منی گؤندَردئیی وظئفهیه گتدئم. عَمالِق پادشاهی اَگَگی بورایا گتئرمئشم، عَمالِقلیلری ده کامئل محو اتمئشم. 21لاکئن خالق تالان مالیندان قویون-کچئلری و اؤکوزلری، محو ادئلمهیه وقف اولونانلاردان لاپ یاخشیسینی گؤتوردو کی، گئلگالدا سنئن تارین ربّه قوربان اتسئن.» 22سمویئل ددی: «ربّئن نهدَن خوشو گلر، سؤزونون ائطاعت اولماسیندان یا یاندیرما قوربانی و آیری قوربانلاردان؟ باخ ائطاعت اتمک قورباندان، قولاق آسماق قوچلارین پئیئندن داها یاخشیدیر. 23چونکی عاصئلئک فالچیلیغا برابر گوناهدیر، عئنادکارلیق دا بوتپَرَستلئک تقصئرئنه برابردئر. ائندی کی، سن ربّئن سؤزونو ردّ ادئبسن، او دا سنی پادشاهلیقدان ردّ ادئب.»
24او واخت شاعول سمویئله ددی: «گوناه اتمئشم. دوغرودان دا ربّئن امرئنی و سنئن سؤزلرئنی پوزموشام، چونکی خالقدان قورخوب اونلارین سؤزونه قولاق آسمیشام. 25خاهئش ادئرم، گوناهیمی باغیشلا و ائندی منئمله برابر گری قاییت کی، ربّه پرستئش ادئم.» 26سمویئل شاعولا ددی: «من سنئنله گری قاییتمایاجاغام، چونکی سن ربّئن سؤزونو ردّ ادئبسن. اونا گؤره رب ده سنی ائسرایئل اوستونده پادشاه اولماقدان ردّ ادئب.»
27سمویئل گری قاییتماق اوچون دؤنَن زامان، شاعول اونون جوبّهسئنئن اَتهیئندن یاپیشاندا اَتَک ییرتیلدی. 28سمویئل اونا ددی: «بو گون رب ده سندن ائسرایئل پادشاهلیغینی بو جور ییرتیب و سندن یاخشی اولان قونشونا ورئب. 29ائسرایئلئن عئزّتی اولان یالان دِمَز و فئکرئنی دَیئشمَز. چونکی او، ائنسان دیئل کی، فئکرئنی دَیئشسئن.» 30شاعول ددی: «گوناها باتدیم. خاهئش ادئرم، ائندی خالقیمین آغساقّاللاری و ائسرایئل موقابئلئنده منه حؤرمت ات و منئمله بئرلئکده گری قاییت کی، تارین ربّه پرستئش اِدئم.» 31سمویئل شاعولون دالیسیجا گری قاییتدی و شاعول ربّه پرستئش اتدی.
32سونرا سمویئل ددی: «عَمالِق پادشاهی اَگَگی بورایا، منئم یانیما گتئرئن.» اَگَگ اونون یانینا بشّاش گلدی. اَگَگ اؤز-اؤزونه دیئردی: «یقئن کی، اؤلومون آجیلیغی کچئب گدئب.» 33سمویئل ددی: «سنئن قیلینجین آروادلاری نجه اؤولادسیز قویوب، سنئن آنان دا آروادلار آراسیندا بلهجه اؤولادسیز قالاجاق.» سمویئل گئلگالدا، ربّئن حوضوروندا اَگَگی دوغرادی.
34سونرا سمویئل رامایا گتدی، آمّا شاعول گئبعاداکی اِوئنه قالخدی. 35سمویئل اؤلَنه قدر داها شاعولو گؤرمهدی، چونکی شاعول اوچون ماتم توتموشدو. رب شاعولو ائسرایئلئن پادشاهی اتدئیئنه پشمان اولموشدو.
Currently Selected:
۱سمویئل 15: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
