۱سالنامهلر 19
19
عَمّونلولار و اَراملیلار اوستونه ظفر
(۲سال. ۱۰:۱-۱۹)
1بئر مودّتدن سونرا عَمّون اؤولادلارینین پادشاهی ناخاش اؤلدو و یرئنه اوغلو پادشاه اولدو. 2داوود ددی: «ناخاشین اوغلو خانونا یاخشیلیق ادهجیم، چونکی آتاسی منه یاخشیلیق اتدی.» داوود قاصئدلر گؤندَردی کی، آتاسینا گؤره خانونا باشصاغلیغی ورسئنلر. لاکئن داوودون آداملاری عَمّون اؤولادلارینین اؤلکهسئنه، اونون یانینا باش صاغلیغی ورمک اوچون گلنده 3عَمّونلولارین باشچیلاری خانونا ددئلر: «سن اله بئلئرسن کی، داوود بو باشصاغلیغی ورن آداملاری سنئن آتانا حؤرمتی اولدوغو اوچون گؤندَرئب؟ اونون آداملاری مگر گلمهیئبلر کی، بو تورپاغی آختاریب، جاسوسلوق ادئب ییخسینلار؟» 4خانون داوودون آداملارینی توتوب، ساقّاللارینی قیرخدیردی و پالتارلارینی اوتوراجاق یرئنه قدر آشاغیدان کَسدئردی و اونلاری گری گؤندَردی. 5بو آداملار بارهده داوودا خبر چاتدی. داوود اونلارین پئشوازینا قاصئدلر گؤندَردی، چونکی بو آداملار چوخ اوتاندیریلمیشدیلار. پادشاه ددی: «ساقّالینیز چیخانا قدر اَرئحادا قالین، سونرا قاییدین.»
6خانون و عَمّونلولار داوودون یانیندا نئفرت قازاندیقلارینی گؤرنده، اَرامنَخهرهیئمدن#19.6 یعنی «بِینولنَهرِین»، اَراممَعهکادان، و صوبادان مئن تالانت#19.6 تقرئبن ۵/۳۴ تون گوموش گؤندَردئلر کی، اؤزلرئنه اوجرتله دؤیوش عارابالاری و آتلیلار توتسونلار. 7بلهجه اؤزلری اوچون اوتوز ائکی مئن دؤیوش عاراباسی، مَعَکا پادشاهینی و اونون قوشونلارینی اوجرتله توتدولار، اونلار دا گلئب مِدِبانین قاباغیندا اوردوگاه قوردولار. عَمّونلولار دا اؤز شهرلرئندن ییغیلیب دؤیوشه گلدئلر. 8داوود بونو اشئدنده، یوآبلا بوتون جنگاور قوشونونو گؤندَردی. 9عَمّونلولار چیخیب شهرئن گئرئشئنده دؤیوش اوچون دوزولدولر، گلن پادشاهلار دا آیریجا چؤلده ائدئلر.
10یوآب او زامان کی، دوشمنلرئن اونون ضئدّئنه قاباقدان و آرخادان دوزولدوکلرئنی گؤردو، بوتون ائسرایئلئن سچمه دؤیوشچولرئندن بعضئلرئنی آییریب اَراملیلارین ضئدّئنه دوزدو. 11لاکئن خالقین قالان حئصّهسئنه قارداشی اَبشهیی باشچی قویدو و اونلار عَمّونلولارین موقابئلئنده دوزولدولر. 12یوآب ددی: «اگر اَراملیلار مندن گوجلو اولسالار، سن منه کؤمک اِدَرسن، آمّا اگر عَمّونلولار سندن گوجلو اولسالار، من سنه کؤمک ادهرم. 13گوجلو اول. گل خالقیمیز آدینا و تاریمیزین شهرلری آدینا ائگئدلئک گؤرسهدَک. قوی رب گؤزونده خوش اولانی اتسئن.» 14یوآب و یانینداکی قوشون ووروشماق اوچون اَراملیلارا یاخینلاشدیلار. اَراملیلار یوآبین قاباغیندان قاچدیلار. 15عَمّونلولار اَراملیلارین قاچدیغینی گؤرنده، اونلار دا یوآبین قارداشی اَبشهیئن قاباغیندان قاچیب شهره گئردئلر. سونرا یوآب اورشلئمه گلدی.
16اَراملیلار ائسرایئللیلرئن قاباغیندا مغلوب اولدوقلارینی گؤرنده قاصئدلر گؤندَرئب، فَرات چایینین او تایینداکی اَراملیلاری دؤیوشه چیخارتدیلار. اونلارین باشچیسی هَدَد عِزِرئن قوشون باشچیسی شوفَک ائدی. 17بو خبر داوودا چاتاندا، او، بوتون ائسرایئللیلری ییغیب اوردون چایینی کچدی و اَراملیلارین قاباغینا گلئب قوشونونو اونلارین ضئدّئنه دوزدو. داوود اؤز قوشونونو اَراملیلارین قاباغینا چیخارتدی و اَراملیلار اونونلا ووروشدولار. 18اَراملیلار ائسرایئللیلرئن قاباغیندان قاچدیلار. داوود اَراملیلاردان یدّی مئن عارابا دؤیوشچوسونو و قیرخ مئن پئیادانی قیردی، قوشون باشچیسی شوفَکی ده اؤلدوردو. 19هَدَد عِزِرئن آداملاری ائسرایئللیلرئن قاباغیندا مغلوب اولدوقلارینی گؤرنده، داوودلا صولح باغلادیلار و اونا تابع اولدولار. اَراملیلار بئر داها عَمّونلولارا کؤمک اتمک ائستمهدئلر.
Currently Selected:
۱سالنامهلر 19: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
