مرقوس روایت 9
9
1عئسا اولارا ددی: «دوغروسونی سئزه دیئرم، بوردا دورانلار آراسیندا بعضئسی وار کی، تارینین پادشاهلیغینین قودرت ائنن گلمهسئنی گؤرمهیئنجه اؤلومی دادمایاجاقلار.»
عئسانین گؤرونوشی دیئشئلئر
2آلتی گوندن سورا عئسا، پطروسی، یعقوبی و یوحنّانی اؤزی ائنن گؤتوردی و تکباشینا اولاری اوجا بئر داغین اوستونه آپاردی و اولارین گؤزلری قاباغیندا گؤرونوشی دیئشئلدی. 3پالتارلاری پارلاق اولوب اِله آغاردی کی، یر اوزونده هچ یون آغاردان اونی یویوب بله آغاردا بئلمز. 4شاگئردلره ائلیا ائنن موسا دا گؤروندی. اولار عئسا ائنن صؤحبت الهیئردئلر. 5پطروس عئسایا ددی: «اوستاد، بوردا اولماغیمیز نه یاخشی اولدی! قوی بوردا اوچ چادیر قوراق؛ بئری سنه، بئری موسا پیغمبره، بئری ده ائلیا پیغمبر اوچون.» 6اولار او قدر قورخموشدولار کی، پطروس بئلمئردی نه دسئن. 7بو آرادا بئر بولود گلئب اولارا کؤلگه سالدی. و بولوددان بئر سس گلدی: «بودور منئم عزئز اوغلوم، اونون سؤزونه قولاق آسین.» 8شاگئردلر بئردن اطرافلارینا باخدیلار، آمّا یانلاریندا عئسادان باشقا هچ کئمی گؤرمهدئلر.
9داغدان اِنَن واخت عئسا شاگئردلرئنه امر الهیئب ددی کی، او زاماناجاق کی ائنسان اوغلی اؤلولردن دئرئلمهیئب، گؤردوکلری بارهده هچ کئمه بئر شی دمهسئنلر. 10اولار دا عئسانین بو سؤزونی یادلاریندا ساخلاییب اؤلولردن دئرئلمهیئن نه اولدوغی بارهده آرالاریندا بحث الهیئردئلر. 11اولار اوندان سوروشدولار: «نه اوچون تؤورات موعلّئملری دیئرلر کی، اوّلجه ائلیا گلمهلیدئر؟» 12عئسا اولارا ددی: «دوغرودان دا ائلیا اوّلجه گلئب، هر شیی قایدایا سالاجاق. ائنسان اوغلی حاقّیندا نه یازیلیب؟ بو کی، او گرک عذاب چکئب تحقئر اولونسون. 13سئزه دیئرم کی، ائلیا حقئقتن گلدی و ائستهدئکلری هر شیی اونا الهدئلر، نجه کی، اونون بارهسئنده یازیلیب.»
عئسا ائبلئس روحا توتولموش بئر اوغلانا شفا ورئر
14شاگئردلرئنئن یانینا قاییتدیقلاری زامان، اولارین اطرافیندا بؤیوک بئر جاماعات گؤردولر و تؤورات موعلّئملری شاگئردلر ائنن بحث الهیئردئلر. 15جاماعات اونی گؤردویی زامان چوخ حیرت الهدئلر و اونون طرفئنه قاچیب، اونا سالام وردئلر. 16عئسا اولاردان سوروشدی: «نه بارده اولار ائنان بحث الهیئرسئز؟» 17جاماعات آراسیندان بئر کئشی جاواب وردی: «اوستاد، اوغلومی سنئن یانینا گتئرمئشم. ائچئنده دئلسئز بئر روح وار. 18اوشاغی هاردا توتسا، اونی یره چیرپیر. اوشاغین آغزی کؤپوکلهنئر، دئشلرئنی قیجیردیر و قورویوب قالیر. شاگئردلرئندن ائستهدئم کی، بو روحی اوندان اشئیه قووسونلار، آمّا اِلئیه بئلمهدئلر.» 19عئسا جاواب ورئب ددی: «ای ائمانسیز نسئل! نه واختاجاق گرک سئز ائنن اولوب، سئزه دؤزَم؟! اونی منئم یانیما گتئرئن.» 20اولار اوشاغی عئسانین یانینا گتئردئلر. روح اونی گؤرَر-گؤرمز، اوشاغی شئدّت ائنن اسدئرئب، یره چیرپدی. اوشاق یره ییخیلیب آغیزی کؤپوکلندی و دئیئرلهنئردی. 21عئسا اوشاغین آتاسیندان سوروشدی: «نه واختدان بری اونون باشینا بو ائش گلئب؟» اوشاغین آتاسی ددی: «اوشاقلیغیندان. 22روح اوشاغی هلاک الهمک اوچون اونی اودا-سویا سالیر. اگر بئر شی الئیهبئلرسن، بئزه یازیغین گلسئن و بئزه کؤمک اله.» 23عئسا اونا ددی: «بئر شی الئیه بئلَرسن؟ ائمان گتئرن آداما هر شی مومکوندور.» 24اوشاغین آتاسی او آندا باغیریب ددی: «ائمان گتئرئرم، منئم ائمانسیزلیغیما کؤمک اله.» 25عئسا خالقین اونون یانینا قاچا-قاچا گلمهسئنی گؤرنده او خبئث روحا آجیقلانیب ددی: «ای کار و دئلسئز روح، سنه امر الهیئرم اوندان اشئیه چیخ و بئر داها اونا داخئل اولما.» 26روح باغیردی و چوخ عذاب ورئب، اوندان اشئیه چیخدی و اوشاق اؤلی کئمی یرده قالدی، اله کی، چوخ آدام ددی: «او اؤلدی.» 27آمّا عئسا اوشاغین الئندن توتوب اونی قالخیزدی و اوشاق آیاغا دوروب دایاندی. 28عئسا اِوه گئرندن سورا شاگئردلری اوندان سوروشدولار: «نه اوچون بئز اونی چیخاردا بئلمهدئک؟» 29عئسا اولارا ددی: «بو جئنس دوعادان باشقا هچ بئر یولدان چیخماز.»
30اوردان چیخیب جلئل وئلایتئندن کچدئلر. عئسا هچ کسئن بئلمهسئنی ائستهمئردی. 31چونکی شاگئردلرئنه تعلئم ورئب، اولارا ددی: «ائنسان اوغلی ائنسانلارین الئنه تسلئم اولوناجاق و اولار اونی اؤلدورهجکلر و اؤلدورولمهسئندن اوچ گون سورا دئرئلهجک.» 32آمّا شاگئردلر بو سؤزی آنلامادیلار و اوندان سوروشماغا دا قورخدولار.
هامیدان لاپ بؤیوک کئمدئر؟
33اولار کفرناحوم شهرئنه گلدئلر. اِوه گئرندن سورا عئسا اولاردان سوروشدی: «یولدا نه بارهده بحث الهیئردئز؟» 34شاگئردلرئن هچ بئرئندن سس چیخمادی، چونکی یولدا بو بارهده بحث الهیئردئلر کی اولاردان هانسی لاپ بؤیوکدور. 35عئسا اوتوردی و او اونائکی شاگئردی یانینا چاغیریب اولارا ددی: «بئرئنجی اولماق ائستهین هر کس، گرک هامیدان آخیر اولسون و هامییا خئدمت الهسئن.» 36سورا کؤرپه بئر اوشاغی آلیب، اورتادا دوردوردی و اونی قوجاقلاییب، اولارا ددی: 37«هر کئم بله بئر اوشاغی منئم آدیمدا قبول الهسه، منی قبول الهمئش و هر کئم منی قبول الهسه، منی یوخ، بلکی منی گؤندَرهنی قبول الهمئش اولور.»
بئز ائنن ضئدّ اولمایان، بئز ائنن دئر
38یوحنّا ددی: «اوستاد، بئرئنی گؤردوک کی، سنئن آدیندا ائبلئس روحلاری آداملاردان قوووردی و بئز اَللشدئک کی اونا مانع اولاق چونکی بئز ائنن دِیئلدی.» 39آمّا عئسا اونا ددی: «اونون قاباغینی آلمایین. هچ کئم یوخدور کی، منئم آدیمدا مؤجوزه الهیئب، اوندان سورا دا منی یامانلاسین. 40چونکی بئز ائنن ضئدّ اولمایان، بئز ائنن دئر. 41مسئحئنکی اولدوغوز اوچون کئم سئزه منئم آدیمین خاطئری اوچون بئر بارداق سو ائچئرتسه، دوغروسونی سئزه دیئرم، اصلا اَجرسئز قالمایاجاق.
وسوسه و گوناه
42کئم منه ائنانان بو کئچئکلردن بئرئنی گوناها سالا، اونون اوچون لاپ یاخشی او اولاردی کی، بوینونا ائری بئر دَیئرمان داشی آسیلیب، دَهَنزه آتیلسین. 43اگر اَلئن سنی پئس یولا چکئر، اونی کس. سنئن اوچون علئل حیاتا گئرمک، ائکی ال ائنن جهنّمه، او سؤنمهین اودا دوشمکدن داها یاخشیدیر. 44اورایا کی، اولارین قوردی اؤلمز، اودی دا سؤنمز. 45اگر آیاغین سنی پئس یولا چکئر، اونی کس. سنئن اوچون تک آیاقلی حیاتا گئرمک، ائکی آیاقلی جهنّمه دوشمکدن داها یاخشیدیر. 46اورایا کی، اولارین قوردی اؤلمز، اودی دا سؤنمز. 47اگر گؤزون سنی پئس یولا چکئر، اونی چیخارت. سنئن اوچون تک گؤزلی تارینین پادشاهلیغینا گئرمک، ائکی گؤزلی جهنّمه دوشمکدن داها یاخشیدیر. 48اورایا کی،
”اولارین قوردی اؤلمز،
اودی دا سؤنمز.“
49چونکی هرکس اود ائنان دوزلاناجاق. 50دوز یاخشی شیدئر؛ آمّا اگر دوز دادینی اَلدن وِرسه، اونی نه جور گئنه شور الهمک اولار؟ ائچئزده دوز اولسون و آرازدا صولح و سالاماتلیق.»
Currently Selected:
مرقوس روایت 9: CAB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
