مرقوس روایت 8
8
عئسا دؤرد مئن نفری دویورور
1او گونلرده گئنه بؤیوک بئر جاماعات ییغیلدی و یمک اوچون هچ شیلری یوخ ائدی. عئسا شاگئردلرئنی چاغیریب اولارا ددی: 2«جاماعاتا یازیغیم گلئر، چونکی اوچ گوندور یانیمدادیرلار و یمک اوچون هچ بئر شیلری یوخدور. 3اگر اولاری اِولرئنه آج یولا سالام، یولدا طاقتدن دوشرلر، چونکی بعضئلری اوزاقدان گلئبلر.» 4شاگئردلری جاواب وردئلر: «بو چؤللوکده بو قدر آدامی دویورماق اوچون کئم هاردان چؤرک تاپا بئلر؟» 5عئسا اولاردان سوروشدی: «نچه چؤرهیئز وار؟» شاگئردلر ددئلر: «یدّی چؤرک.» 6عئسا جاماعاتا امر الهدی کی، یره اوتورسونلار. سورا یدّی چؤرهیی گؤتوروب شوکور الهدی و بؤلوب شاگئردلرئنه وردی کی، جاماعات آراسیندا پایلاسینلار؛ اولار دا پایلادیلار. 7اولارین بئر نچه کئچئک بالیغی دا وار ائدی. عئسا اولاری دا برکت ورئب امر الهدی کی، جاماعات آراسیندا پایلاسینلار. 8جاماعات ییئب دویدولار و آرتیق قالان تئکهلردن یدّی دولی زنبئل ییغدیلار. 9اولارین ساییسی دؤرد مئن اولاردی. عئسا اولاری مورخّص الهدی، 10و شاگئردلری ائنن آنَن قاییغا مئندی و دالمانوتا منطقهسئه گلدی.
فرئسئلر عئسادان بئر علامت ائستهیئرلر
11فرئسئلر چیخیب اونونان بحث الهمهیه باشلادیلار و اونی ائمتاحان الهمک اوچون گؤیدن بئر علامت ائستهدئلر. 12عئسا اورَکدن درئن آه چکئب ددی: «بو نسئل نه اوچون علامت ائستهیئر؟ دوغروسونی سئزه دیئرم، بو نسئله هچ بئر علامت ورئلمهیهجک.» 13و اولاری ترک الهیئب، گئنه قاییغا مئندی و دهنزئن او تایینا کچدی.
شاگئردلرئن توبئخی
14شاگئردلر چؤرک گؤتورمهیی یاددان چیخارتدیلار و اؤزلری ائنن بئر چؤرکدن باشقا هچ بئر شیلری یوخ ائدی. 15عئسا شاگئردلرئنه تاپشیریب ددی: «اؤزوزی فرئسئلرئن و هئرودون خمئر مایاسیندان اوزاق ساخلایین.» 16شاگئردلر آرالاریندا بحث الهیئب دیئردئلر: «چؤرهیئمئز اولمادیغی اوچون بله دیئر.» 17عئسا بونی باشا دوشوب اولارا ددی: «چؤرهیئز اولمادیغی اوچون نئیه بحث الهیئرسئز؟ حله ده باشا دوشمهیئبسئز و آنلاماییبسیز؟ مگر اورهیئز داشدیر؟ 18آیا گؤزلرئز اولا-اولا گؤرمورسوز و قولاقلاریز اولا-اولا اشئتمئرسئز؟ آیا خاطیرلامیرسیز؟ 19او زامانی کی، بش چؤرهیی بشمئن نفرئن آراسیندا پایلادیم، آرتیق قالان تئکهلردن نچه سبد دولدوردوز؟» شاگئردلر جاواب وردئلر: «اونائکی سبد.» 20«یدّی چؤرهیی دؤرد مئن نفرئن آراسیندا پایلادیغیم زامان، آرتیق قالان تئکهلردن نچه زنبئل دولدوردوز؟» شاگئردلر جاواب وردئلر: «یدّی زنبئل.» 21عئسا اولارا ددی: «حله ده آنلامیرسیز؟!»
بیت صیدا دا کور آدامین شفاسی
22اولار بیتصیدایا گلدئلر. کور بئر آدامی عئسانین یانینا گتئرئب، اونا یالواردیلار کی، اونا ال قویسون. 23عئسا کورون الئندن توتوب اونی کنددن اشئیه چیخارتدی و گؤزلرئنه توپوروب اَللرئنی اونون اوستونه قویدی و اوندان سوروشدی: «بئر شی گؤرورسن؟» 24کور آدام یوخاری باخیب ددی: «آداملاری گؤرورم، اولاری آغاجلار کئمی گؤرورم کی، یرئیئرلر.» 25او واخت عئسا اَللرئنی گئنه کورون گؤزلری اوستونه قویدی. کور آدام دئقّت ائنن باخیب صاغالدی و بوتون شیلری یاخشی گؤردی. 26عئسا اونی اِوئنه گؤندَرئب ددی: «کنده قاییتما.»
پطروسون اعتئرافی عئسا حاقّیندا
27عئسا شاگئردلری ائنن فئلئپی قیصرئیّهسئنئن کندلری طرفئنه یولا دوشدی. یولدا شاگئردلرئندن سوروشوب اولارا ددی: «خالق منئم کئم اولدوغومی دیئر؟» 28شاگئردلر جاواب وردئلر: «بعضئلری دیئرلر تعمئد ورن یحیا، بعضئلری ده دیئرلر ائلیا پیغمبر. بعضئلری ده دیئرلر کی، پیغمبرلردن بئری.» 29عئسا اولارین اؤزوندن سوروشدی: «سئز منئم کئم اولدوغومی دیئرسئز؟» پطروس اونا جاواب ورئب ددی: «سن مسئحسن.» 30عئسا اولارا چوخ جئدّی قدغن الهدی کی، اونون بارهسئنده هچ کئمه بئر شی دمهسئنلر.
عئسا اؤلوب دئرئلمهسی حاقّیندا نبئلئک الهیئر
31و اولارا تعلئم ورمهیه باشلادی کی، گرک ائنسان اوغلی چوخ عذابلار چکسئن و آغساقّاللار و معبدئن باش کاهئنلری و تؤورات موعلّئملری طرفئندن ردّ اولونوب اؤلدورولسون و اوچ گوندن سورا دا دئرئلسئن. 32عئسا بو سؤزی اولارا آچیقجا ددی. پطروس اونی بئر یانا چکئب دانلاماغا باشلادی. 33آمّا عئسا دؤنوب شاگئردلرئنه باخدی و پطروسا آجیقلانیب ددی: «مندن اوزاق اول شیطان! چونکی سنئن فئکئرلرئن تارینین فئکئرلری دیئل، ائنسانین فئکئرلریدئر.»
34عئسا جاماعاتی شاگئردلری ائنن یانینا چاغیریب ددی: «هر کئم ائستهسه منئم دالیمجا گله، گرک اؤزونی ائنکار اِلئیه و چارمیخینی گؤتوروب، منئم دالیمجا گله. 35چونکی هر کئم جانینی قورتارماق ائستهسه، اونی اَلدَن ورهجک؛ آمّا هر کئم منئم اوچون و ائنجئلدن اؤتری اؤز جانیندان کِچسه، اونی قورتاراجاق. 36چونکی آدام اوچون نه فایداسی وار کی، بوتون دونیانی اَله گتئره، آمّا اؤز جانینی اَلدَن وره؟ 37ائنسان اؤز جانی عوضئنه نه ورهبئلر؟ 38بونا گؤره کئم بو زئناکار و گوناهکار نسلئن ائچئنده، مندن و منئم سؤزلرئمدن اوتانسا، ائنسان اوغلی دا آتاسینین جلالیندا موقدّس ملکلر ائنن گلن زامان او آدامدان اوتاناجاق.»
Currently Selected:
مرقوس روایت 8: CAB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
