مرقوس روایت 10
10
1عئسا اوردان چیخیب یهودئیه بؤلگهسئنه، اوردون چایینین او تایینا گلدی. جاماعات گئنه اونون یانینا ییغیلدی و او، نجه کی، عادتی ائدی، گئنه اولارا تعلئم وردی.
بوشانماق حاقّیندا
2فرئسئلر عئسایا یاخینلاشیب، اونی ائمتاحان الهمک اوچون سوروشدولار: «آیا کئشئیه جائزدئر کی، آروادینی بوشاسین؟» 3عئسا جاواب ورئب اولارا ددی: «موسا سئزه نه امر الهیئب؟» 4ددئلر: «کئشئیه ائجازه ورئب کی، بوشانما کاغیذی یازیب آروادینی بوشاسین.» 5عئسا اولارا ددی: «داش اورَکلی اولدوغوز اوچون موسا بله بئر امری سئزه یازدی. 6آمّا خئلقتئن باشلانیشیندان تاری اولاری کئشی و آرواد یاراتدی. 7بونا گؤره ده کئشی اؤز آتا-آناسیندان آیریلاجاق، اؤز آروادینا یاپیشاجاق 8و اولار بئر بدن اولاجاقلار، اله کی، اولار آرتیق ائکی یوخ، بئر بدندئرلر. 9اونون اوچون تارینین بئرلشدئردئیئنی ائنسان آییرماسین.»
10اِوده گئنه شاگئردلر بو بارهده اوندان سوآل سوروشدولار. 11عئسا اولارا ددی: «هر کس آروادینی بوشاییب آیری آرواد ائنان اِولَنسه، آروادینین حاقّیندا زئنا الهیئر. 12آرواد دا اگر اَرئندن بوشانیب آیری کئشی ائنن اِولَنسه، زئنا الهیئر.»
کئچئک اوشاقلار و عئسا
13کئچئک اوشاقلاری عئسانین یانینا گتئردئلر کی، اولارا اَل قویوب برکت ورسئن. آمّا شاگئردلر اولارا آجیقلاندیلار. 14عئسا بونی گؤرنده قضبلهنئب، اولارا ددی: «قویون اوشاقلار منئم یانیما گلسئنلر! اولارا مانع اولمایین. چونکی تارینین پادشاهلیغی اله بوجور آداملاریندیر. 15دوغروسونی سئزه دیئرم؛ کئم تارینین پادشاهلیغینی، بئر اوشاق کئمی قبول الهمهسه، اورایا گئرمهیهجک.» 16و اوشاقلاری قوجاغینا آلیب، اللرئنی اولارین اوستونه قویدی و اولارا برکت وردی.
وارلی جاوان
17یولا چیخاندا بئری قاچا-قاچا عئسانین یانینا گلدی و اونون قاباغیندا دئز چؤکوب سوروشدی: «ای یاخشی اوستاد! گرک نه الهیم کی، ابدی حیاتی مئراث آلام؟» 18عئسا اونا ددی: «نه اوچون منی یاخشی چاغیریرسان؟ تاریدان باشقا هچ کس یاخشی دِیئل. 19تارینین حؤکملرئنی بئلئرسَن؛ آدام اؤلدورمه، زئنا الهمه، اوغورلوق الهمه، یالاندان شهادت ورمه، هچ کسی آلداتما، آتا و آنانا حؤرمت اله.» 20او آدام عئسایا ددی: «اوستاد، بولارین هامیسینا جاوانلیغیمدان عمل الهمئشم.» 21عئسا اونا باخیب اونی سِودی و اونا ددی: «حَله بئر شِیئن اَسکئکدئر؛ هر نهیئن واردیر، سات، یوخسوللارا پایلا کی، گؤیده خزئنَن اولاجاق. سورا منئم دالیمجا گل.» 22آمّا او آدام بو سؤزی اشئدن واخت پرئشان اولدی و قمگئن گتدی، چونکی چوخ وارلی ائدی.
23عئسا اطرافینا باخیب شاگئردلرئنه ددی: «نه قدر چتئندئر کی وارلی اولانلار تارینین پادشاهلیغینا گئرهلر!» 24شاگئردلر اونون سؤزوندن حیران قالدیلار. آمّا عئسا اولارا گئنه جاواب ورئب ددی: «اوشاقلار، تارینین پادشاهلیغینا گئرمک نه قدر چتئندئر! 25چونکی دَوهنئن ائینه دِشئیئندن کچمهسی، وارلی آدامین تارینین پادشاهلیغینا گئرمهسئندن چوخ آساندیر.» 26اولار داها چوخ تعجّوب الهدئلر و اونا ددئلر: «بس کئم نئجات تاپا بئلر؟» 27عئسا اولارا باخیب ددی: «ائنسانلار اوچون بو قیریمومکوندور، آمّا تاری اوچون یوخ. تاری اوچون هر شی مومکوندور.»
28پطروس اونا ددی: «بئز هر شیی آتیب، سنئن دالینجا گلمئشئک.» 29عئسا ددی: «دوغروسونی سئزه دیئرم، اله بئر آدام یوخدور کی، منئم اوچون و ائنجئلئن خاطئری اوچون اِوئنی، قارداشلارینی، باجیلارینی، آناسینی، آتاسینی، اوشاقلارینی، یا دا زمئلرئنی آتمیش اولسون 30و ائندی، بو زاماندا، اذئیّتلر ائنن یوز قات اِولر، قارداشلار، باجیلار، آنالار و آتالار، اوشاقلار و زمئلر، اَله گتئرمهیئب، گله جک عصرده ده، ابدی حیاتی آلماسین. 31آمّا چوخ بئرئنجیلر آخیرکی و چوخ آخیرکیلار بئرئنجی اولاجاقلار.»
عئسا اؤلوب دئرئلهجهیئنی خبر ورئر
32اولار اورشلئمه گدن یولدا ائرهلی گدئردئلر و عئسا اولارین قاباغیندا گدئردی. شاگئردلر حیران قالمیشدیلار و اونون دالیسیندان گدنلره قورخی دوشموشدی. عئسا گئنه او اونائکی شاگئردئنی قیراغا آپاریب باشینا نه گلهجهیی بارهده دانیشماغا باشلادی: 33«باخین، بئز اورشلئمه گدئرئک و ائنسان اوغلی باش کاهئنلر و تؤورات موعلّئملری الئنه ورئلهجک. اولار اونی اؤلومه محکوم الهیئب قیرییهودئلرئن اَلئنه تسلئم الئیهجکلر. 34اولار اونی مسخره الهیئب، اوزونه توپورهجکلر و اونا شالّاق ووروب اؤلدورهجکلر. و او، اوچ گون سورا دئرئلهجک.»
یعقوب و یوحنانین ائستهیی
35زِبِدِی اوغوللاری یعقوب و یوحنّا عئسایا یاخینلاشیب، اونا ددئلر: «اوستاد، ائستهیئرئک سندن خاهئش الهدئیئمئزی، بئزئم اوچون الئیهسن.» 36عئسا اولارا ددی: « نه ائستهیئرسئز کی سئزئن اوچون الهیئم؟» 37اولار عئسایا ددئلر: «ائجازه ور سنئن جلالیندا بئرئمئز صاغیندا، بئرئمئز ده سولوندا اوتوراق.» 38عئسا اولارا ددی: «نه ائستهدئیئزی بئلمئرسئز. مگر ائچهجهیئم پئیالادن ائچهبئلرسئز؟ و یا منئم تعمئد آلدیغیم تعمئدده آیا سئز ده تعمئد آلا بئلرسئز؟» 39ددئلر: «الئیه بئلرئک.» عئسا اولارا ددی: «ائچهجهیئم پئیالادن ائچهجکسئز و آلدیغیم تعمئدده سئز ده تعمئد آلاجاقسیز، 40آمّا صاغیمدا یا دا سولومدا اوتورماغا ائجازه ورمک منئم الئمده دیئل. بو یرلر موعیّن آداملار اوچون حاضیرلانیب.»
41اون شاگئرد، بونی اشئدن واخت، یعقوب و یوحنّایا حئرصلندئلر. 42عئسا اولاری یانینا چاغیریب ددی: «بئلئرسئز کی، قیرییهودئلر آراسیندا حاکئم ساییلانلار، اولارا آغالیق الهیئرلر و اولارین ریئسلری اولارا حاکئمئیّت سورورلر. 43آمّا سئزئن آرازدا بله اولمامالیدیر. آرازدا بؤیوک اولماق ائستهین، گرک او بئرئلرئنه خئدمت الهسئن 44و آرازدا بئرئنجی اولماق ائستهین، گرک هامینین قولی اولسون. 45چونکی حتّا ائنسان اوغلی دا، اونا خئدمت اولونماق اوچون گلمهدی. او گلدی کی، خئدمت الهسئن و جانینی چوخ آداملارین یولوندا فدا الهسئن.»
کور بارتئماوسون شفاسی
46اولار اَرئحایا گلدئلر. عئسا ائنن شاگئردلری و بؤیوک بئر جاماعات اَرئحادان چیخاندا، تئماوس اوغلی بارتئماوس آدیندا کور بئر یولچی یولون قیراغیندا اوتورموشدی. 47بارتئماوس اونون ناصئرهلی عئسا اولدوغونی اشئدن واخت قیشقیریب ددی: «داوود اوغلی عئسا، منه رحمئن گلسئن.» 48چوخ آداملار اونا آجیقلاندیلار و ساکئت اولماغینی ائستهدئلر. آمّا او، لاپ برک قیشقیریردی: «داوود اوغلی، منه رحمئن گلسئن.» 49عئسا دایانیب ددی: «اونی چاغیرین.» اولار کور آدامی چاغیریب ددئلر: «اوزولمه قالخ، سنی چاغیریر.» 50بارتئماوس عاباسینی اوستوندن آتدی و یردن سیچراییب عئسانین یانینا گلدی. 51عئسا اوندان سوروشدی: «نه ائستهیئرسن کی، سنه الهیئم؟» کور آدام اونا ددی: «اوستاد، گؤزلرئم گئنه گؤرسون.» 52عئسا اونا ددی: «گت، ائمانین سنی شفا وردی.» او آندا آدامین گؤزلری آچیلدی و یولا دوشوب عئسانین دالیسیجا گتدی.
Currently Selected:
مرقوس روایت 10: CAB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
