مرقوس روایت 7
7
ائنسانی نجئس الهین نهدئر؟
1فرئسی فئرقهسئنئن عالئملری و اورشلئمدن گلن بعضی تؤورات موعلّئملری عئسانین یانینا ییغیلدیلار. 2و اونون شاگئردلرئندن بعضئلرئنی گؤردولر کی، نجئس اَللر ائنن، یعنی یویولمامیش اَللر ائنن چؤرک ییئرلر. 3چونکی فرئسئلر و بوتون یهودئلر آغساقّاللاریندان قالمیش رسمه گؤره، اَللرئنی یاخشی یومایینجا یمک یمزلر. 4بازاردان گلن واخت دا قوسل الهمهیئنجه یمک یمزلر. اله بله کاسالارین، چاینئکلرئن و مئس قابلارین یویولماسی کئمی آیری چوخ رسملری ده رئعایت الهیئرلر. 5فرئسئلر و عالئملر عئسادان سوروشدولار: «نه اوچون سنئن شاگئردلرئن آغساقّاللاریمیزین رسملرئنی رئعایت الهمهیئب، نجئس اَللر ائنن چؤرک ییئرلر؟» 6عئسا اولارا ددی: «اِشَعیا پیغمبر نه یاخشی سئز ائکیاوزلی آداملار بارهسئنده نبئلئک الهیئب! نجه کی، یازیلیب؛
”بو خالق دوداقلاری ائنن منه حؤرمت الهیئر،
آمّا اورَکلری مندن اوزاقدیر.
7بوش یره منه عئبادت الهیئرلر،
ائنسان حؤکملرئنی، احکام آدیندا تعلئم ورئرلر.“
8سئز تارینین حؤکملرئنی بوراخیب، ائنسانلارین رسملرئنی رئعایت الهیئرسئز.»
9و اولارا ددی: «سئز، اؤز حدئثلرئزی رئعایت الهمک اوچون، تارینین حؤکمونی نه گؤزل آتیرسیز. 10چونکی موسا ددی: ”آتا و آنانا حؤرمت اله،“ و ”آتاسینا یا دا آناسینا یامان دئین آدام گرک اؤلدورولسون.“ 11آمّا سئز دیئرسئز: ”اگر بئر آدام آتا-آناسینا دسه؛ مندن گؤزلهدئیئز کؤمک وقفدئر، یعنی، هدئیّه آدیندا تارییا تقدئم اولوب.“ ّ 12آرتیق آتا-آناسینا کؤمک الهمک اوچون اونا ائجازه ورمئرسئز. 13بله ده نسئلدن نسئله کچمئش رسملرئز ائنن، سئز تارینین سؤزونی باطئل الهیئب، بونا اوخشار چوخ شیلر الهیئرسئز.»
14عئسا جاماعاتی گئنه یانینا چاغیریب ددی: «هامیز منه قولاق آسین و آنلایین. 15هچ بئر شی یوخدور کی، اشئکدن ائنسانین ائچئنه گئرئب اونی نجئس الهسئن. ائنسانی نجئس الهین اونون ائچئندن چیخان شیلردئر. 16هر کئمئن اِشئتمهیه قولاغی وار اِشئتسئن.»
17و جاماعاتی ترک الهیئب، اِوه گئرنده شاگئردلری اوندان بو مثلئن معناسینی سوروشدولار. 18عئسا اولارا ددی: «مگر سئز ده باشا دوشمهیئبسئز؟! مگر آنلامیرسیز کی، هچ شی اشئکدن ائنسانین ائچئنه گئرئب اونی نجئس الئیهبئلمز؟ 19چونکی اورهیئنه یوخ، قارنینا گدئر و دفع اولونور.» عئسا بو سؤز ائنن بوتون یمکلری تمئز سایدی. 20و سؤزونه بله داوام وردی: «ائنسانی نجئس الهین، ائنسانین ائچئندن چیخاندیر. 21چونکی ائچهرئدن، ائنسانین اورهیئندندئر کی، پئس فئکئرلر، عئفّتسئزلئک، اوغورلوق، جئنایت، زئناکارلیق، 22طاماحکارلیق، پئسلئک، حئیله، شهوت، پئسگؤز، کوفر، قورور و سفهلئک اشئیه چیخیر؛ 23بوتون بو شیلر ائنسانین ائچئندن چیخیب، اونی نجئس الهیئر.»
بئر آروادین ائمانی
24عئسا اوردان چیخیب صور و صئدون منطقهلرئنه گتدی. او بئر اِوه گئردی و هچ کسئن بئلمهسئنی ائستمهدی آمّا گئزلی قالا بئلمهدی. 25بئر آرواد کی، کئچئک یاشلی قیزی خبئث روحا اسئر ائدی، عئسانین حاقّیندا اولان خبرلری اشئدئب گلدی و اونون آیاقلارینا دوشدی. 26بو آرواد یهودی دیئلدی، سورئیهنئن فئنئقی خالقیندان ائدی. آرواد گلئب عئسایا یالواردی کی، او ائبلئس روحی قیزیندان اشئیه قووسون. 27عئسا اونا ددی: «قوی اوّل اوشاقلار دویسونلار. چونکی اوشاقلارین چؤرهیئنی آلیب، ائتلره آتماق دوز دیئل.» 28آرواد عئسایا جاواب ورئب ددی: «بلی، یارب! آمّا ائتلر ده سوفره یانیندا، اوشاقلارین خیردا تئکهلرئندن یئیرلر.» 29عئسا آروادا ددی: «بو سؤزی ددئیئن اوچون گت، او ائبلئس روح قیزینی بوراخیب.» 30آرواد اِوئنه گدئب، ائبلئس روحی قیزیندان چیخمیش و قیزینی یِری ائچئنده یاتمیش تاپدی.
عئسا کار و لال بئر آدامی شفا ورئر
31عئسا گئنه صور منطقهسئی ترک الهیئب، صیدا یولوندان دکاپولئس دئیارئنئن اورتاسینا، جلئل گؤلونه گلدی. 32کار و لال بئر آدامی اونون یانینا گتئردئلر و اونا یالواردیلار کی، اَلئنی اونون اوستونه قویسون. 33عئسا او کئشئنی خالقین یانیندان آییریب، بئر یانا چکدی و بارماقلارینی اونون قولاقلارینا قویدی و توپوروب اونون دئلئنه سورتدی. 34و گؤیه باخیب آه چکدی و اونا ددی: «اِفّاتا، یعنی آچیل.» 35او آدامین قولاقلاری آچیلدی و فورَن دئلئنئن دویونی آچیلیب، دوزگون دانیشماغا باشلادی. 36عئسا اولارا تاپشیردی کی، هچ کئمه بو بارهده بئر شی دمهسئنلر. آمّا نه قدر جئدّی تاپشیریردی، او قدر ده چوخ یاییردیلار. 37و لاپ چوخ حیرتلهنئب دیئردئلر: «هر شیی یاخشی الهیئر؛ هم کارلاری اشئتدئرئر، هم ده دئلسئزلری دانیشدیریر.»
Currently Selected:
مرقوس روایت 7: CAB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
