مرقوس روایت 6
6
ناصئره خالقینین ائمانسیزلیغی
1عئسا اوردان چیخیب، اؤز وطنئنه گلدی. شاگئردلری ده اونون دالیسیجا گتدئلر. 2موقدّس شنبه گونی یتئشنده عئبادتگاهدا تعلئم ورمهیه باشلادی. اشئدنلردن چوخلاری حیرتده قالیب دیئردئلر: «بو آداما بو شیلر هاردان ورئلئب؟! بونا ورئلن بو حئکمت نهدئر؟! نجه بله مؤجوزهلر الهیئر؟! 3مگر بو آدام او نجار دیئل؟ مریم اوغلی یعقوب، یوسا، یهودا و شمعونون قارداشی؟! مگر اونون باجیلاری بوردا آرامیزدا دیئللر؟!» پس اوندان ائنجئدئلر. 4عئسا اولارا ددی: «هچ بئر پیغمبر هچ یرده حؤرمتسئز دیئل، مگر اؤز وطنئنده، قوحوملاری آراسیندا و اؤز اِوئنده.» 5او اوردا هچ بئر مؤجوزه الئیه بئلمهدی، آنجاق بئر نچه ناخوش آدامین اوستونه اَللرئنی قویوب اولارا شفا وردی. 6عئسا او آداملارین ائمانسیزلیغینا تعجّوب الهیئردی،
عئسا اونائکی شاگئردئنی گؤندَرئر
و اطرافداکی کندلری گزئب، اولاردا تعلئم ورئردی. 7عئسا اونائکی شاگئردی یانینا چاغیریب، اولاری جوت-جوت گؤندَرمهیه باشلادی. و اولارا خبئث روحلاری قووماغا قودرت وردی. 8عئسا اولارا امر الهدی کی: «یول اوچون اؤزوز ائنن اَلآغاجیندان باشقا هچ بئر شی گؤتورمهیئن؛ نه چؤرک، نه توربا، نه ده کمرلرئزده پول. 9آیاقیزا باشماق گیئن و بئر کؤینکدن آرتیق دا گیمهیئن. 10هانسی اِوه گئره سئز، او یِردن چیخاناجاق اوردا قالین. 11هاردا سئزی قبول الهمهسهلر و یا سئزه قولاق آسماسالار، اوردان چیخاندا آیاقلاریزین توزونی چیرپین کی، اولارین ضئدّئنه بئر شهادت اولسون.» 12پس اولار گدئب آداملار آراسیندا اولارین تؤوبه الهمکلرئنی اعلان الهدئلر. 13چوخ ائبلئس روحلاری آداملاردان قوودولار و چوخلی ناخوش آداملاری یاغ ائنان مسح الهیئب، اولارا شفا وردئلر.
تعمئد ورن یحیانین اؤلدورولمهسی
14هئرود پادشاه دا بو بارهده اشئتدی، چونکی عئسانین آدی مشهور اولموشدی. بعضئلر دیئردئلر: «بو آدام تعمئد ورن یحیادیر؛ او، اؤلولردن دئرئلئب. بونا گؤره ده اوندا بله مؤجوزهلی قودرت گؤرونور.» 15بعضئلری ده دیئردئلر: «او ائلیادیر.» آمّا آیری آداملار دیئردئلر: «قدئم پیغمبرلردن بئری کئمی بئر پیغمبردئر.» 16آمّا هئرود بونی اشئدن زامان ددی: «بو، باشینی کسدئردئیئم یحیادیر کی، اؤلولردن دئرئلئب.»
17چونکی هئرود اؤزی یحیانین توتولماسینا امر الهیئب، اونی زئندانا سالمیشدی. بو ائشی قارداشی فئلئپئن آروادی هئرودئیاسدان اؤتری الهمئشدی. چونکی هئرود اونونان اِولنمئشدی. 18و یحیا اونا دیئردی: «قارداشینین آروادی ائنن اِولنمک سنئن اوچون جائز دیئل.» 19هئرودئیاس یحیایا کئن باغلاییب اونی اؤلدورمک ائستهیئردی، آمّا بونی اِلئیه بئلمئردی. 20چونکی هئرود یحیادان قورخوردی و اونون صالح و موقدّس بئر آدام اولدوغونی بئلئردی و اونی قورویوردی. هئرود یحیانین سؤزونی اشئدن زامان حیران و پرئشان اولوردی، آمّا گئنه ده اونون سؤزلرئنه شادلیق ائنان قولاق آسیردی.
21موناسئب گون یتئشدی. هئرود، اؤزونون آنادان اولان گونی اوچون، اعیانلارینا، مئن باشیلارینا و جلئلئن آدلی-سانلی آداملارینا قوناقلیق ورئردی. 22هئرودئیاسین قیزی ائچهری گئرئب اوینادی و بو، هئرود و اونون قوناقلارینین خوشونا گلدی. هئرود قیزا ددی: «مندن نه ائستیهسن، سنه ورهجهیم.» 23و آند ائچئب قیزا ددی: «مندن نه ائستیهسن، سنه ورهجهیم، حتّا پادشاهلیغیمین یاریسینی دا بله.» 24قیز دا گدئب آناسیندان سوروشدی: «نه ائستهیئم؟» و آناسی اونا ددی: «تعمئد ورن یحیانین باشینی.» 25قیز او آندا تلهسئک پادشاهین یانینا گدئب، اونا ددی: «ائستهیئرم تعمئد ورن یحیانین باشینی بئر مجمه ائچئنده بو ساعات منه ورهسن.» 26پادشاه چوخ قمگئن اولدی، آمّا آند ائچدئیئنه و مجلئسده اوتورانلارا گؤره ائستمهدی کی، قیزین ائستهدئیئنی ردّ الهسئن. 27پادشاه آنَن جلّاد گؤندَرئب امر الهدی کی، یحیانین باشینی گتئرسئنلر. و جلّاد دا گدئب زئنداندا یحیانین باشینی کسدی. 28و یحیانین باشینی بئر مجمه ائچئنه قویوب گتئردی و قیزا وردی. قیز دا یحیانین باشینی آناسینا وردی. 29یحیانین شاگئردلری بونی اِشئدنده، گلئب اونون جسدئنی آلدیلار و قبئره قویدولار.
عئسا بشمئن نفری دویورور
30حوارئلر عئسانین یانینا ییغیلیب، الهدئکلری و اؤیرتدئکلری هر شیی اونا نقل الهدئلر. 31عئسا اولارا ددی: «گلئن من ائنن ساکئت بئر یره گدک، و بئر آز دئنجهلئن.» چونکی گلئب-گدن او قدر چوخ ائدی کی، یمک یمهیه بله مجاللاری یوخ ائدی. 32اولار تک-باشلارینا قاییق ائنان ساکئت بئر یره گتدئلر. 33اولارین گتدئکلرئنی گؤرن جاماعات اولاری تانیدیلار و بوتون شهرلردن پئیادا اورایا قاچیب، اولاردان قاباق اورایا چاتدیلار و اولارین یانینا گلدئلر. 34عئسا قاییقدان اِنَنده بؤیوک بئر جاماعاتی گؤردی و اولارا یازیغی گلدی. چونکی چوبانسیز قویونلار کئمی ائدئلر. عئسا اولارا چوخ شیلری تعلئم ورمهیه باشلادی. 35گون باتان چاغی، شاگئردلر عئسانین یانینا گلئب ددئلر: «بورا چؤللوکدور، واخت دا آرتیق گِجدئر؛ 36خالقی مورخّص اله کی، اطرافدا اولان کندلر و اکئنلره گدئب، اؤزلری اوچون یمک آلسینلار.» 37آمّا عئسا اولارا جاواب ورئب ددی: «سئز اولارا یِمک ورئن.» شاگئردلر اونا ددئلر: «آیا ائستهیئرسن گدئب ائکییوز دئنارلیق چؤرک آلیب، یمک اوچون اولارا ورک؟!» 38عئسا اولارا ددی: «گدئن گؤرون نچه چؤرهیئز وار؟» اولار گدئب باخدیلار و اونا ددئلر: «بش چؤرک، ائکی بالیق.» 39عئسا اولارین هامیسینا ددی کی، دسته-دسته یاشیل اوتلار اوستونده اوتورسونلار. 40اولار دسته-دسته، یوز-یوز، الّی-الّی، اوتوردولار. 41عئسا بِش چؤرک ائنن، ائکی بالیغی گؤتوردی، گؤیه باخیب برکت وردی. سورا چؤرکلری بؤلوب شاگئردلرئنه وردی کی، جاماعاتین قاباغینا قویسونلار؛ ائکی بالیغی دا اولارین هامیسینین آراسیندا پایلادی. 42هامی یِیئب دویدی. 43شاگئردلر چؤرک و بالیقدان آرتیق قالان تئکهلردن اونائکی سبد دولدوردولار. 44او چؤرکلردن یئین آداملارین ساییسی بشمئن کئشی اولاردی.
عئسا سو اوستونده یرئیئر
45عئسا آنَن شاگئردلرئنه امر الهدی کی، قاییغا مئنئب، اؤزوندن قاباق گؤلون او تایینا بِیتصِیدایا گتسئنلر کی، جاماعاتی مورخّص الهسئن. 46خالقی یولا سالاندان سورا دوعا الهمک اوچون داغا چیخدی.
47آخشام اولاندا قاییق دهنزئن اورتاسیندا ائدی و عئسا، تک-باشینا، قورولوقدا ائدی. 48عئسا شاگئردلرئن زحمت ائنن کورک ووردوغلارینی گؤردی، چونکی کولک اولارین اوزونه ائدی. گجه ساعات اوچه یاخین عئسا دهنزئن اوستونده یرئیه-یرئیه اولارین یانینا گلدی و یانلاریندان کچمک ائستهدی. 49آمّا شاگئردلر اونون سو اوستونده یرئمهسئنی گؤرنده، اونی بئر روح گومان الهیئب باغیردیلار. 50چونکی اولارین هامیسی اونی گؤروب، قورخویا دوشموشدولر. عئسا آنَن اولار ائنان دانیشیب، ددی: «اورهیئز اوزولمهسئن، منم. قورخمایین.» 51و قاییغا، اولارین یانینا چیخدی. و یل یاتدی. اولار ائچلرئنده چوخ تعجّوب الهدئلر، 52چونکی چؤرکلرئن مؤجوزهسئنی آنلامامیشدیلار. اولارین ذهئنلری کور اولموشدی.
جِنئسارتده کی ناخوشلارین شفاسی
53اولار گؤلون او تایینا کچئب، جِنئسارِت دئیارینا گلدئلر و اوردا لنگر سالدیلار. 54قاییقدان چیخاندا خالق آنَن اونی تانیدی. 55اونون هاردا اولدوغونی اشئدنلر او منطقهلرئن بوتون یرلرئندن قاچیب، ناخوشلاری یورغان-دؤشکلری ائنن داشیدیلار و اونون یانینا گتئرمهیه باشلادیلار. 56عئسا هر یره کی، گئرئردی؛ شهرلره، قصبهلره، کندلره، ناخوشلاری میدانلارا قویوردولار. و پالتارینین اَتهیئنه اَل سورتمک اوچون بله اونا یالواریردیلار و اونا اَل سورتَنلرئن هامیسی صاغالیردی.
Currently Selected:
مرقوس روایت 6: CAB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
