مرقوس روایت 5
5
ائبلئس روحی اولان بئر آدامین شفاسی
1اولار گؤلون او بئری تایینا، جدهرئلرئن منطقهسئنه گلدئلر. 2قاییقدان چیخان واخت، ائبلئس روحی اولان بئر آدام قبرئستاندان چیخیب عئسایا راست گلدی. 3بو آدام قبئرلر آراسیندا قالیردی و آرتیق هچ کئم اونی حتّا زنجئرلر ائنن بله باغلایا بئلمئردی. 4گرچی چوخ دفه کوندهلر و زنجئرلر ائنن باغلانمیش ائدی، آمّا کوندهلری سیندیریب، زنجئرلری ده قیرمیشدی و هچ کس اونی آرام الهمهیه قادئر دیئلدی. 5دائم، گجه-گوندوز، داغلاردا و قبئرلر آراسیندا باغیریب، داشلار ائنان اؤزونی یارالاییردی. 6بو آدام عئسانی اوزاقدان گؤرنده قاچا-قاچا گلدی و اونون قاباغیندا دئز چؤکدی، 7و اوجا سَس ائنن ددی: «ای تاعالا تارینین اوغلی عئسا، من ائنن نه ائشئن وار؟ سنی آند ورئرم تارییا، منه عذاب ورمه!» 8چونکی عئسا اونا دمئشدی: «ای خبئث روح، بو آدامدان اشئیه چیخ!» 9عئسا اوندان سوروشدی: «آدین نهدئر؟» جاواب وردی: «منئم آدیم قوشوندور. چونکی بئز چوخوق!» 10و عئسایا چوخ یالواردی کی، اولاری او وئلایتدن قووماسین. 11اوردا، داغین اتهیئنده بؤیوک بئر دونوز سوروسی یمک یِیئردئلر. 12خبئث روحلار عئسایا یالواریب ددئلر: «بئزی او دونوزلارا گؤندَر، قوی اولارین ائچئنه گئرک.» 13عئسا ائجازه وردی و ائبلئس روحلار او آدامدان اِشئیه چیخیب، دونوزلارین ائچئنه گئردئلر. دونوز سوروسی ده، داغی اوزی آشاغی قاچدیلار و گؤله آتیلیب بوغولدولار. او سورونون ساییسی ائکیمئن اولاردی.
14سورونی اوتارانلار قاچیب، بو خبری شهرده و کندلرده یایدیلار و خالق دا اولوب-کچنلری گؤرمک اوچون اورایا گلدی. 15اولار عئسانین یانینا گلدئلر و بئر قوشونا قدر ائبلئس روحی اولان آدامی آرام اوتورموش، پالتار گیئنئب، عاغیللانمیش گؤرنده قورخدولار. 16بو شیلری گؤرن آداملار، ائبلئس روحی اولان آدام و دونوزلارین باشینا گلنلری خالقا نقل الهدئلر. 17اولار دا عئسایا یالواردیلار کی، اولارین دئیاریندان چیخیب گتسئن.
18قاییغا مئنَن واخت، قابقجا ائبلئس روحی اولان آدام عئسایا یالواردی کی، او دا اونونان گتسئن. 19آمّا عئسا اونا ائجازه ورمهیئب، ددی: «اؤز اِوئنه، اؤز قوحوملارینین یانینا گت و اولارا ده کی، رب سنه نه قدر بؤیوک ائشلر گؤروب و سنه نه قدر مرحمت گؤرسهدئب.» 20او آدام اولاردان آیریلیب عئسانین اونا نه الهدئیئنی دکاپولئس منطقهسئنده اعلان الهمهیه باشلادی. و هامی تعجّوب الهیئردی.
اؤلی بئر قیز و ناخوش بئر آرواد
21عئسا قاییق ائنان گئنه دهنزئن او بئری تایینا کچنده، یانینا بؤیوک بئر جاماعات ییغیلدی. او اؤزی دهنزئن قیراغیندا ائدی. 22یهودئلرئن عئبادتگاهینین ریئسلرئندن بئری کی آدی یایروس ائدی اونون یانینا گلدی و عئسانی گؤرن زامان قاباغیندا دئز چؤکوب، 23یالوارا-یالوارا اونا ددی: «قیزیم اؤلوم حالیندادیر. گل اَللرئنی اونون اوستونه قوی کی، صاغالیب یاشاسین.» 24عئسا اونونان گتدی
و اولارین دالیسیجا چوخ آدام گِدئردی، اله کی، اونی هر یاندان سیخیشدیردیلار. 25او جاماعاتین آراسیندا بئر آرواد وار ائدی کی، اونائکی ائل ائدی، اونون قان آخماسی کسئلمهمئشدی. 26بو آرواد بئر چوخ حکئملر الئندن عذابلار چکمئشدی و بوتون وار-یوخونی خرج الهمئشدی؛ آمّا هچ فایدا گؤرمهمئشدی. حالی داها دا پئسلَشمئشدی. 27آرواد عئسانین حاقّینداکی سؤزلری اشئدئب، جاماعاتین آراسیندان اونون دالیسیجا گلدی و اونون پالتارینا اَلئن ووردی. 28چونکی اؤز-اؤزونه دیئردی: «آنجاق پالتارینا اَلئم دَیسه بله، شفا تاپاجاغام.» 29اله او آندا، آروادین قان آخماسی کسئلدی و او بلادان قورتاردیغینی بدنئنده آنلادی. 30عئسا آنَن اؤزوندن چیخان قووّتی بئلدی و جاماعاتا دؤنوب ددی: «کئم منئم پالتاریما اَل ووردی؟» 31عئسانین شاگئردلری اونا ددئلر: «جاماعاتین سنی نجه سیخیشدیردیغینی گؤرورسن، گئنه ده، ”منه کئم اَل ووردی؟“ سوروشورسان؟» 32عئسا بونی اِلئیهنی گؤرمک اوچون اطرافا باخدی. 33آرواد، اؤزونه نه اولدوغونی بئلئب، تئترهیه-تئترهیه گلدی و اونون آیاقلارینا دوشوب، بوتون حقئقتی عئسایا ددی. 34عئسا اونا ددی: «قیزیم، ائمانین سنی شفا ورئب، صاغ-سالامات گِت و چکدئیئن عذابدان خئلاص اول.»
35عئسا حله دانیشیردی کی عئبادتگاهین ریئسی، یایروسون اِوئندن بعضئلری گلئب، ددئلر: «قیزین اؤلدی، آرتیق نه اوچون اوستادا زحمت ورئرسن؟» 36آمّا عئسا دیئلن سؤزه قولاق آسماییب عئبادتگاهین ریئسئنه ددی: «قورخما، آنجاق ائمانین اولسون.» 37و پطروس، یعقوب و یعقوبون قارداشی یوحنّادان باشقا هچ کئمه ائجازه ورمهدی کی، اولار ائنان گلسئن. 38اولار عئبادتگاهین ریئسئنئن اِوئنه گلدئلر. عئسا اوردا آغلاییب اوجا سَس ائنن شئوَن الهینلری گؤردی. 39و اِوه گئردئیی زامان اولارا ددی: «نه اوچون های سالیب آغلاشیرسیز؟ قیز اؤلمهیئب، آنجاق یاتیب.» 40اِوده اولانلار اونا گولدولر. آمّا عئسا اولارین هامیسینی اشئیه چیخاردیب، اوشاغین آتا-آناسی و اؤزی ائنن اولانلار ائنان اوشاغین یاتدیغی یره گئردی. 41و اونون اَلئندن توتوب اونا ددی: «تالئتا قوم!» ترجومهسی؛ «قیزیم، سنه دیئرم قالخ!» 42او آندا قیز یرئندن قالخیب یرئمهیه باشلادی. او قیزین اونائکی یاشی وار ائدی. اولار حیرتدن قوروموشدولار. 43عئسا اولارا امر الهدی کی، بولاردان هچ کئمه بئر سؤز بئلدئرمهسئنلر و ددی کی، قیزا یمک اوچون بئر شی ورسئنلر.
Currently Selected:
مرقوس روایت 5: CAB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
