مرقوس روایت 4
4
اکئنچی مثلی
1عئسا گئنه دهنزئن قیراغیندا تعلئم ورمهیه باشلادی. اونون یانینا اله چوخ آدام ییغیلدی کی، او دهنزئن قیراغیندا سو اوستونده اولان قاییغا مئنئب اوردا اوتوردی. بوتون او جاماعاتدا ساحئلده دورموشدی. 2عئسا اولارا مثللر ائنن چوخ شیلر اؤیرتدی. او اؤز تعلئمئنده اولارا بله ددی: 3«قولاق آسین. بئر اَکئنچی، توخوم سَپمهیه چؤله چیخدی. 4توخومی سَپن زامان، توخوملاردان بعضئسی، یول اوستونه دوشدی و قوشلار گلئب اولاری یِدئلر. 5توخوملارین بعضئسی داشلیغا، کی تورپاغی آز ائدی دوشدی و تِز بئتدی اونا گؤره کی تورپاغین درئنلئیی یوخ ائدی. 6آمّا گون چیخان واخت هامیسی یاندی و کؤکی اولمادیغینا گؤره قورودی. 7توخوملارین بعضئسی تئکانلار آراسینا دوشدی. تئکانلار بؤیویوب، اولاری بوغدولار و ثمره ورمهدی. 8آمّا قالان توخوملار یاخشی تورپاغا دوشدی و بؤیویوب بعضئسی بئره اوتوز، بعضئسی بئره آلتمیش، و بعضئسی ده بئره یوز ثمره وردئلر.» 9عئسا اولارا ددی: «هر کئمئن اِشئتمهیه قولاغی وار اِشئتسئن.»
10عئسا تک اولان زامان، اونائکی شاگئرد و اطرافیندا اولان آداملار بو مثل حاقّیندا اوندان سوروشدولار. 11عئسا اولارا ددی: «تارینین پادشاهلیغینین سئرّئنی بئلمک سئزه وِرئلئب،آمّا اشئکده اولانلارا هر شی مثللر ائنن اولور کی،
12گؤردوکلری حالدا، گؤرمهسئنلر،
اِشئتدئکلَری حالدا، آنلاماسینلار
اولمایا کی دؤنوب باغیشلانسینلار.»
13او زامان اولارا ددی: «بو مثلی باشا دوشمورسوز؟ بس آیری مثللری نجه باشا دوشهجکسئز؟ 14اکئنچی کلامی سپئر. 15یول قیراغینا دوشَنلر اولاردیرلار کی، تارینین کلامینی اشئدئرلر، آمّا شیطان تزلئک ائنن گلئب اولارا سَپئلن کلامی گؤتوروب آپاریر. 16داشلیغا دوشَن توخوملار او آداملاردیلار کی، تارینین کلامینی اِشئدئرلر و آنَن اونی شادلیق ائنان قبول الهیئرلر. 17آمّا اؤزلرئنده کؤکلری اولمادیغینا گؤره، آز بئر مودّت قالیرلار و او زامان کی، بو کلامدان اؤتری چتئنلئک و جور و جفا باش ورئر، آنن ائماندان دوشورلر. 18تئکانلار آراسینا دوشن توخوملار او آداملاردیلار کی، او کلامی اِشئدئرلر، 19آمّا دونیانین نئگارانلیقلاری و دونیا مالینین توولاتماسی، و آیری شیلرئن هوسلری آرایا گئرئب کلامی بوغور و اونی ثمرهسئز الهیئر. 20یاخشی تورپاغا دوشَن توخوملار اولاردیرلار کی، کلامی اشئدئب اونی قبول الهیئرلر و بئره اوتوز، بئره آلتمیش، و بئره یوز ثمره ورئرلر.»
قابدا قویولان لامپا
21عئسا اولارا ددی: «آیا چیراغی یاندیریب کاسا آلتینا یا دا تخت آلتینا قویارلار؟ مگر چیراق، اونون اوچون دیئل کی، چیراقدانا قویولسون؟ 22چونکی گئزلی بئر شی یوخدور کی، آچیغا چیخماسین و اؤرتولی بئر شی یوخدور کی، آشکارا چیخماسین. 23هر کئمئن اِشئتمهیه قولاغی وار اِشئتسئن.» 24و اولارا ددی: «نه اشئتدئیئزه دئقّت الهیئن. هانسی اؤلچی ائنن اؤلچهسئز، او اؤلچی ائنن ده سئزه اؤلچولهجک و داها دا چوخ ورئلهجک. 25چونکی کئمده وار دیر، اونا لاپ چوخ ورئلهجک و آمّا کئمده یوخدور، الئنده اولان دا اوندان آلیناجاق.»
اؤز-اؤزونه بئتن توخوم
26عئسا اولارا ددی: «تارینین پادشاهلیغی تورپاغا توخوم سَپَن بئر آداما بنزهر. 27گجه-گوندوز یاتار-دورار. توخوم بئتئب بؤیویر، آمّا او، بونون نجه اولدوغونی بئلمز. 28یر اؤز-اؤزوندن ثمره ورئر: اوّل اوتی، سورا سونبولی، داها سورا دا سونبولده یتئشمئش دَنی. 29محصول یتئشدئیی واخت، آنَن اوراق سالینار، چونکی بئچئن واختی یتئشئب.»
خاردال توخومی
30و اولارا ددی: «تارینین پادشاهلیغینی نهیه بنزهدک؟ و یا اونی نه مثل ائنن سئزه آیدینلاشدیراق؟ 31تارینین پادشاهلیغی خاردال توخومونا بَنزهر کی، تورپاقدا اکئلدئیی واخت، یرده اولان توخوملارین هامیسیندان کئچئکدئر، 32آمّا اکئلندن سورا بؤیویور و بوتون بئتکئلردن داها بؤیوک اولور. اله ائری خوللار گتئرئر کی، گؤیون قوشلاری اونون کؤلگهسی آلتیندا یووا تئکئرلر.»
33عئسا کلامی بله مثللر ائنن اولارا آنلادیقلاری قدر تعلئم ورئردی. 34و مثلسئز هچ بئر شیی اولار ائنان دانیشمیردی. آمّا تک اولان زامان اؤز شاگئردلرئنه بو شیلرئن هامیسینی آچیقلاییردی.
عئسا طوفانی یاتیردیر
35او گون، آخشام اولاندا، عئسا شاگئردلرئنه ددی: «دهنزئن او تایینا کچک.» 36اولار دا جاماعاتی بوراخیب، عئسانین اوتوردوغی قاییق ائنان دهنزئن او بئری طرفئنه یولا دوشدولر. اؤزگه قاییقلار دا اولار ائنان گلئردئلر. 37بؤیوک بئر طوفان اولدی و شپهلر قاییغین ائچئنه اِنئردئلر. اله کی، قاییق سو ائنن دولوردی. 38عئسا قاییغین دال طرفئنده یاستیغین اوستونده یاتمیشدی. اولار اونی اویادیب ددئلر: «اوستاد، مگر بئزئم هلاک اولماغیمیز سنی ناراحات الهمئر؟» 39عئسا اویانیب یله آجیقلاندی و دهنزه ددی: «ساکئت اول، آرام اول!» یل دایاندی و بؤیوک بئر آراملیق دوشدی. 40عئسا اولارا ددی: «نه اوچون قورخورسوز؟ نه اوچون ائمانیز یوخدور؟» 41اولار چوخ قورخموشدولار و بئربئرلرئنه دیئردئلر: «بو کئمدئر کی، حتّا یل و دهنز ده اوندان ائطاعت الهیئرلر؟»
Currently Selected:
مرقوس روایت 4: CAB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
