مرقوس روایت 3
3
علئل بئر آدامین شفاسی
1عئسا گئنه عئبادتگاها گئردی. اوردا اَلی قوروموش بئر آدام وار ائدی. 2اولار عئسانی دئقّت ائنن گؤز آلتینا آلمیشدیلار کی، شنبه گونونده او کئشئیه شفا ورسئن و بونون اوچون اونا بؤهتان وورسونلار. 3عئسا اَلی قوروموش آداما ددی: «بوردا دور.» 4و اولارا ددی: «شنبه گونونده نه الهمک جائزدئر؛ یاخشیلیق الهمک، یوخسا یامانلیق الهمک؟ جان قورتارماق، یوخسا جان آلماق؟» اولار ساکئت دورموشدولار. 5عئسا اطرافیندا اولان آداملارا قضب ائنن باخیب، اولارین اورَکلرئنئن برکلئیئندن چوخ قمگئن اولدی و او کئشئیه ددی: «الئنی اوزات.» او دا الئنی اوزاتدی و اَلی صاغالدی. 6فرئسئلر آنَن چیخیب هئرودچولار ائنان برابر عئسانی اؤلدورمک اوچون مشورت الهدئلر.
بؤیوک بئر جاماعات عئسانین دالیسیجا
7آمّا عئسا شاگئردلری ائنن دهنز طرفئنه چکئلدی و جلئل وئلایتئندن چوخ آداملار اونون دالیسیجا گتدئلر. 8و اونون بوتون الهدئکلرئنی اشئدنلر یهودئیهدن، اورشلئمدن، ائدومئیهدن، اوردون چایینین او تاییندان، صور و صیدانین اطرافلاریندا یاشایانلاردان بؤیوک بئر جاماعات اونون یانینا گلدی. 9جاماعاتین اونی سیخیشدیرماسی اوزوندن عئسا شاگئردلرئنه ددی کی، اونون اوچون بئر قاییق حاضیرلاسینلار. 10چوخ ائنسانلاری شفا وردئیی اوچون ناخوش آداملاردان چوخلاری عئسانین اوستونه آتیلیردیلار کی، اونا توخونسونلار. 11خبئث روحلار اونی گؤرنده قاباغیندا یره قاپانیردیلار و باغیریب دیئردئلر: «سن تارینین اوغلوسان.» 12آمّا عئسا اولارا قدغن الهیئردی کی، اونون کئم اولدوغونی آشکار الهمهسئنلر.
اونائکی شاگئردئن سچئلمهسی
13عئسا داغا چیخیب، اؤزی ائستهدئیی آداملاری یانینا چاغیردی و اولار اونون یانینا گتدئلر. 14او اونائکی نفر تعیئن الهدی و اولارا حواری آدی قویدی اله کی، اونونان قالسینلار و اولاری تعلئم ورمهیه گؤندَرسئن 15و قودرتلری اولسون کی، ائبلئس روحلاری آداملاردان قووسونلار. 16تعیئن الهدئیی آداملار بولار ائدئلر: شمعون کی، اونا «پطروس» آدینی وردی، 17زِبِدِی اوغلی یعقوب و قارداشی یوحنّا کی، اولارا «بواَنرجس» آدینی وردی، بواَنرجس یعنی ائلدیرم اوغوللاری، 18آندریاس، فئلئپوس، بَرتولوما، متّا، توماس، و آلفاعوس اوغلی یعقوب، تَدای، وطنپرست شمعون، 19و عئسایا خیانت الهین یهودا ائسکاریوت.
عئسا و بَعَلزِبول
20اولار اِوه گلدئلر و گئنه جاماعات ییغیلدی، اِله کی، چؤرک یمهیه بله ائمکانلاری اولمادی. 21قوحوملاری بونی اشئدن زامان اونی آپارماغا گلدئلر. چونکی دیئردئلر: «دلی اولوب.» 22اورشلئمدن گلن عالئملر دیئردئلر: «بَعَلزِبول اونون ائچئنه گئرئب و ائبلئس روحلاری بَعَلزِبولون کؤمهیی ائنن کی، ائبلئس روحلارین ریئسی دئر قووور.» 23عئسا اولاری یانینا چاغیریب مثل ائنن ددی: «شیطان، شیطانی نجه قووا بئلر؟ 24هر پادشاهلیغی کی، اؤزی اؤز ضئدئنه بؤلونسه داوام گتئره بئلمز. 25اؤزی اؤز ضئدئنه بؤلونَن، اِو ده داوام گتئرمز. 26اگر شیطان اؤزونه ضئدّ دوروب بؤلونسه، داوام گتئره بئلمز و اونون آخیری یتئشئب. 27هچ کئم گوجلی بئر آدامین اِوئنه گئرئب مالینی اوغورلایا بئلمز، مگر اوّل اونون قوللارینی باغلاسین. او زامان اونون اِوئنی اوغورلایا بئلر.
28دوغروسونی سئزه دیئرم، بوتون گوناهلار، بوتون کوفرلر ائنسان اوغوللارینا باغیشلانار؛ 29آمّا هر کئم تارینین موقدّس روحونون ضئدّئنه کوفر دِسه، هچ واخت باغیشلانمایاجاق و تقصئری ابده کئمی اوستونده قالار.» 30چونکی اولار دیئردئلر: «اوندا ائبلئس روح وار.»
عئسانین آناسی و قارداشلاری
31عئسانین آناسی و قارداشلاری گلدئلر. اولار اشئکده دوروب عئسانی چاغیرماق اوچون اونون یانینا آدام گؤندَردئلر. 32عئسانین اطرافیندا اوتوران خالق اونا ددئلر: «آنان ائنان قارداشلارین اشئکده دوروب سنی آختاریرلار.» 33عئسا اولارا جاواب ورئب ددی: «منئم آنام و قارداشلاریم کئملردئرلر؟» 34و اطرافیندا اوتورانلارا باخیب ددی: «باخین، منئم آنام و قارداشلاریم بولاردیرلار. 35هر کس تارینین ائراده سئنی یرئنه یتئرسه، منئم قارداشیم، باجیم، و آنام اودور.»
Currently Selected:
مرقوس روایت 3: CAB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
