مرقوس روایت 2
2
بئر ائفلئجئن شفاسی
1بئر نچه گوندن سورا، عئسا گئنه کفرناحوم شهرئنه گلدی و اونون اِوده اولماسینین خبری یاییلدی 2و او قدر چوخ آدام اورایا ییغیلدی کی، قاپی آغزیندا دا بله یر قالمادی و عئسا اولار ائنان تارینین کلامیندان دانیشیردی. 3بو آرادا بئر عئدّه، ائفلئج آدامی دؤرد نفرئن وسئلهسی ائنن داشیییب اونون یانینا گتئردئلر. 4آمّا جاماعاتین چوخلوغونا گؤره اونا یاخینلاشا بئلمهدئلر. اونون اوچون ده عئسانین اولدوغی اِوئن دامینی سؤکوب یاردیلار و ائفلئج آدامی یِری ائنن آشاغی اِندئردئلر. 5عئسا اولارین ائمانینی گؤرنده ائفلئجه ددی: «اوغول، گوناهلارین باغیشلاندی.» 6آمّا تؤورات موعلّئملرئندن بئر نچهسی اوردا اوتوروب اؤزلری ائنن بله فئکئرلشئردئلر: 7«بو آدام نه اوچون بله کوفر دانیشیر؟ واحئد تاریدان باشقا کئم گوناهلاری باغیشلایا بئلر؟» 8عئسا آنن روحوندا اولارین اؤز آرالاریندا نه فئکئر الهدئکلرئنی بئلئب، اولارا ددی: «نه اوچون اورَکلرئزده بله فئکئرلر الهیئرسئز؟ 9هانسینین دمهیی بو ائفلئجه داها آساندیر؟ ”سنئن گوناهلارین باغیشلاندی“ دمک؟ یوخسا ”قالخ، یِرئنی گؤتور گت“ دمک؟ 10آمّا اونا گؤره کی، بئلهسئز ائنسان اوغلونون، یِر اوزونده گوناهلاری باغیشلاماغا قودرتی وار…» او ائفلئجه ددی: 11«سنه دیئرم، قالخ، یِرئنی گؤتور و اِوه گت!» 12او آندا ائفلئج قالخیب یِرئنی گؤتوردی و هامینین گؤزی قاباغیندا چیخیب گتدی. هامی حیرتده قالیب، تارییا حمد اِلئیه-اِلئیه دیئردئلر: «بله بئر شی اصلا گؤرمهمئشدئک.»
لاوئنئن چاغیریلماسی
13عئسا گئنه دهنزئن قیراغینا گتدی. بوتون خالق اونون یانینا گلئردی و او اولارا تعلئم ورئردی. 14یولدان کچنده آلفاعوس اوغلی لاوئنی گؤردی کی، باجخانا دکهسئنده اوتورموشدی. اونا ددی: «دالیمجا گل.» لاوی ده آیاغا قالخیب اونون دالیسیجا گتدی.
15عئسا لاوئنئن اِوئنده سوفره باشیندا اوتورموشدی. بئر چوخ باج ییغانلار و گوناهکارلار دا عئسا و شاگئردلری ائنن سوفره باشیندا اوتورموشدولار، چونکی چوخ آداملار اونون دالیسیجا گدئردئلر. 16فرئسی فئرقهسئندن اولان تؤورات موعلّئملری، عئسانین گوناهکارلار و باج ییغانلار ائنان یمک یدئیئنی گؤرنده اونون شاگئردلرئنه ددئلر: «نه اوچون او، باج ییغانلار و گوناهکار آداملار ائنان ییئب-ائچئر؟» 17عئسا بو سؤزی اشئدن زامان اولارا ددی: «صاغ آداملار یوخ، ناخوش آداملار طبئبه مؤحتاجدیلار. من گلمئشم کی، صالح آداملاری یوخ، گوناهکار آداملاری چاغیرام.»
اوروج حاقّیندا
18یحیانین شاگئردلری و فرئسئلر اوروج توتموشدولار. بعضی آداملار عئسانین یانینا گلئب اونا ددئلر: «نه اوچون یحیانین و فرئسئلرئن شاگئردلری اوروج توتورلار، آمّا سنئن شاگئردلرئن اوروج توتمورلار؟» 19عئسا اولارا ددی: «مگر اولار کی تویون قوناقلاری او زاماناجاق کی بَی حله اولارین یانیندا دیر، اوروج توتسونلار؟ نه قدر کی، بَی اولار ائنان وار، اولار اوروج توتا بئلمزلر. 20اله گونلر گلهجک کی، بَی اولارین اَلئندن آلینسین. او زامان اولار، او گونلرده اوروج توتاجاقلار.
21هچ کس کؤهنه پالتارا تَزه پارچادان یاماق وورماز. یوخسا تزه یاماق کؤهنه پالتاردان قوپار و ییرتیق لاپ پئس اولار. 22هچ کس ده تزه شرابی کؤهنه تولوقلارا دولدورماز. بله الهسه تزه شراب کؤهنه تولوقلاری پارتلادار. هم شراب تؤکولوب گدر، هم ده تولوق تلف اولار. تَزه شرابی، گرک تَزه تولوقلارا دولدوراسان.»
موقدّس شنبه حاقّیندا
23بئر گون عئسا موقدّس شنبه گونونده شاگئردلری ائنن اَکئنلر آراسیندان کچئردی. کچنده شاگئردلر سونبوللری درمهیه باشلادیلار. 24فرئسئلر اونا ددئلر: «نه اوچون شاگئردلرئن او ائشی گؤرورلر کی اونون گؤرمهیی شنبه گونونده جائز دیئل؟» 25عئسا اولارا جاواب ورئب ددی: «مگر هچ اوخوماییبسیز کی، داوود پادشاه و اونونان اولانلار، مؤحتاج و آج قالان زامان نه الهدئلر؟ 26نجه داوود، باش کاهئن اَبیاتارین زامانیندا تارینین اِوئنه گئردی، تارییا تقدئم اولونموش چؤرهیی یِدی و اؤزی ائنن اولانلارا دا وِردی؟! او چؤرهیی کی، اونون یمهیی، معبد کاهئنلرئندن باشقا هچ کسه جائز دِیئل.» 27و عئسا اولارا ددی: «ائنسان موقدس شنبه گونی اوچون یوخ، موقدس شنبه گونی ائنسان اوچون اولوب. 28بونا گؤره ائنسان اوغلی شنبه گونونون ده صاحئبیدئر.»
Currently Selected:
مرقوس روایت 2: CAB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
