مرقوس روایت 1
1
تعمئد ورن یحیا
1تارینین اوغلی عئسا مسئحئن خوش خبرئنئن باشلانماسی.
2اِشَعیا پیغمبرئن کئتابیندا یازیلیب:
«ائندی، سنئن قاباغیندا اؤز الچئمی گؤندَرئرم.
او سندن قاباق سنئن یولونی حاضیرلایاجاق.
3بئر آدام چؤلده جار چکئر:
ربّئن یولونی حاضیرلایین.
اونون یوللارینی دوز الهیئن.»
4بله ده یحیا ظوهور الهدی و چؤلده ائنسانلاری تعمئد ورئب، گوناهلارین باغیشلانماسی اوچون تؤوبه تعمئدئنی اعلان الهیئردی. 5بوتون یهودئیه وئلایتئنده یاشایانلار و اورشلئم خالقی، اونون یانینا گدئردئلر و اؤز گوناهلارینا اعتئراف الهیئب، اوردون چاییندا یحیانین الئندن تعمئد قوسلی آلیردیلار. 6یحیا دَوه توکوندن پالتار گیئردی و درئدن بلئنه قاییش باغلاییردی و چَکئرتگه و چؤل بالی ییئردی. 7او اعلان الهیئب دیئردی: «مندن سورا او کی مندن قودرتلی دئر گلئر، من اَیئلئب اونون باشماغینین باغینی دا آچماغا لایئق دیئلم. 8من سئزی سو ائنن تعمئد وردئم، آمّا او سئزی موقدّس روح ائنان تعمئد ورهجک.»
عئسانین تعمئدی
9او گونلرده، عئسا جلئل وئلایتئنئن ناصئره شهرئندن گلئب، اوردون چاییندا یحیادان تعمئد آلدی. 10عئسا سودان چیخان واخت، گؤیون آچیلدیغینی و روحون گؤیرچئن شکلئنده اونون اوستونه اندئیئنی گؤردی. 11و گؤیدن بئر سَس گلئب ددی: «سن منئم عزئز اوغلومسان، سندن چوخ راضییام.»
عئسانین ائمتاحان اولونماسی
12اله او آندا تارینین روحی عئسانی چؤله آپاردی، 13و او، قیرخ گون اوردا قالیب شیطان طرفئندن ائمتاحان اولونوردی. عئسا اوردا وحشی حیوانلار ائنان قالیردی و ملکلر ده اونا خئدمت الهیئردئلر.
عئسانین جلئلده خئدمتئنئن باشلانماسی
14یحیانین توتولماسیندان سورا، عئسا جلئل وئلایتئنه گلدی. او تارینین خوش خبرئنی اعلان الهیئب دیئردی: 15«واخت تامام اولور. تارینین پادشاهلیغی سئزه یاخینلاشیب. تؤوبه الهیئن و خوش خبره ائنانین.»
عئسانین ائلک شاگئردلری
16عئسا جلئل گؤلونون قیراغیندان کچن واخت، شمعون و قارداشی آندریاسی گؤردی کی، گؤله تور آتیردیلار، چونکی اولار بالیق توتان ائدئلر. 17اولارا ددی: «منئم دالیمجا گلئن. من سئزی ائنسان اووچوسی الهرم.» 18اولار دا او آندا تورلارینی بوراخیب، اونون دالیسیجا گتدئلر. 19عئسا اوردان بئر آز قاباقا گدئب زِبِدِی اوغوللاری یعقوب و قارداشی یوحنّانی گؤردی. اولار قاییقدا تورلارینی تعمئر الهیئردئلر. 20عئسا اله او ساعاتدا اولاری دعوت الهدی. اولار دا آتالاری زِبِدِیی ائشچئلر ائنن قاییقدا قویوب، اونون دالیسیجا گتدئلر.
دلی بئر کئشئنئن شفاسی
21اولار کفرناحوما گلدئلر. یهودئلرئن موقدّس شنبه گونی یتئشنده، عئسا یهودئلرئن عئبادتگاهینا گئرئب تعلئم ورمهیه باشلادی. 22خالق اونون تعلئمئندن مات قالمیشدی، چونکی اولارا تؤورات موعلّئملری کئمی یوخ، قودرت ائنن تعلئم ورئردی. 23عئبادتگاه دا بئر کئشی وار ائدی کی خبئث بئر روح اونی اسئر الهمئشدی. او آدام باغیرا-باغیرا ددی: 24«ای ناصئرهلی عئسا، بئز ائنن نه ائشئن وار؟ بئزی هلاک الهمک اوچون گلئبسن؟ سنئن کئم اولدوغونی بئلئرَم؛ سن تارینین موقدّسیسن!» 25آمّا عئسا اونا آجیقلانیب ددی: «ساکئت اول، بو آدامدان چیخ!» 26او واخت خبئث روح، آدامی شئدّت ائنن اَسدئردی و اوجا سَس ائنن چیغیریب اوندان اشئیه چیخدی. 27هامی تعجّوبدن مات قالمیشدی و بئربئرلرئندن سوروشوردولار: «بو نهدئر؟! قودرتلی تزه بئر تعلئم! خبئث روحلارا بله امر الهیئرلر، و اولار اوندان ائطاعت الهیئرلر.» 28و چوخ چکمهدی کی، عئسانین شؤهرتی جلئل وئلایتئنئن بوتون یرلرئنده یاییلدی.
عئسا چوخ آداملاری شفا ورئر
29عئسا عئبادتگاهدان چیخیب، یعقوب و یوحنّا ائنن، شمعون و آندریاسین اِوئنه گتدی. 30شمعونون قایناناسی قیزدیرما ائچئنده دؤشکده ائدی. اونون حالیندان آنَن عئسانی خبردار الهدئلر. 31عئسا آروادین باشی اوستونه گتدی و اونون الئندن توتوب آیاغا قالخیزدی. آروادین قیزدیرماسی کسئلدی و اولارا خئدمت الهمهیه باشلادی.
32آخشام، گون باتان واخت، بوتون ناخوشلار و ائبلئس روحلارا توتولموش ائنسانلاری اونون یانینا گتئردئلر. 33شهرئن بوتون خالقی قاپییا ییغیلمیشدی. 34عئسا جوربهجور ناخوشلوقلارا دوچار اولموش بئر چوخ ائنسانی شفا وردی و بئر چوخ ائبلئس روحلاری قوودی. آمّا ائبلئس روحلارین دانیشماغینا ائجازه ورمهدی، چونکی اونی تانیییردیلار.
عئسانین خلوته دوعاسی
35سحر، گون چیخمامیش عئسا قالخدی و اِودن چیخیب ساکئت بئر یره گتدی و اوردا دوعا الهیئردی. 36شمعون و اونونان اولانلار، اونی آختارماغا چیخدیلار. 37اولار اونی تاپیب ددئلر: «هامی سنی آختاریر.» 38عئسا اولارا ددی: «گلئن آیری یرلره، بو یاخین کندلره ده گدک، اله کی اورالاردا دا تعلئم ورئم. چونکی من بونون اوچون گلمئشم.» 39پس جلئل وئلایتئنئن بوتون یرلرئنده گزئردی و اولارین عئبادتگاهلاریندا تعلئم ورئب، ائبلئس روحلاری قوووردی.
جوذاملی بئر آدامین شفاسی
40جوذاملی بئر آدام عئسانین یانینا گلدی و اونون قاباغیندا دئز چؤکوب یالوارا-یالوارا ددی: «اگر ائستیهسن، منی شفا ورهبئلرسن.» 41عئسانین او آداما اورهیی یاندی، اَلئنی اوزاتدی و اونون اوستونه قویوب ددی: «ائستهیئرم، شفا تاپ.» 42او آندا جوذام بو آدامی ترک الهدی و او، بو مرضدن شفا تاپدی. 43عئسا اونا جئدّی تاپشیریب، آنَن اونی مورخّص الهدی و اونا ددی: 44«باخ! هچ کئمه بئر سؤز دمه، گت اؤزونی معبدئن کاهئنئنه گؤرسد و شفا تاپدیغین اوچون موسا پیغمبرئن امر الهدئکلرئنی تقدئم اِله کی، اولارا شهادت اولسون.» 45آمّا او آدام چیخیب، چوخ شیلر جار چکدی و اولوب-کچنلری هر یرده یایدی. اله کی، عئسا آرتیق هچ بئر شهره آشکارا گئره بئلمهیئب، شهردن اشئکده، چؤلده قالیردی. آنجاق خالق هر طرفدن اونون یانینا گلئردئلر.
Currently Selected:
مرقوس روایت 1: CAB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
