مرقوس روایت 15

پئلاطین محکمه‌سئنده

1سحر تزدن، باش کاهئنلر، آغساقّاللار، تؤورات موعلّئملری و بوتون شورا آداملاری مصلحتلشدئلر. اولار عئسانی باغلاییب آپاردیلار و والی پئلاطا تسلئم اله‌دئلر. 2پئلاط اوندان سوروشدی: «سن یهودئلرئن پادشاهی‌سان؟» عئسا اونا ددی: «سن اؤزون بِله دیئبسن.» 3باش کاهئنلر اونا چوخلی بؤهتانلار ووردولار. 4آمّا پئلاط گئنه اوندان سوروشدی: «سن هچ جاواب ورمئرسن؟ باخ گؤر نه قدر سنئن ضئدّئنه شهادت ورئرلر.» 5آمّا عئسا حله ده جاواب ورمئردی، اله کی، پئلاط تعجّوب اله‌دی.

6پئلاطین رسمی بو ائدی کی هر بایرامدا خالقین ائسته‌دئیی زئندانئنی اولار اوچون آزاد اله‌سئن. 7باراَبّا آدیندا بئری وار ائدی کی، عوصیان واختی آدام اؤلدورن عوصیانچیلار ائنان بئرلئکده زئندانا دوشموشدی. 8خالق گلئب پئلاطدان ائسته‌دئلر کی، هر زامانکی رسمی اولار اوچون یرئنه یتئرسئن. 9پئلاط اولارا جاواب ورئب ددی: «آیا ائسته‌یئرسئز کی سئزئن اوچون یهودئلرئن پادشاهینی آزاد اله‌یئم؟» 10پئلاط بئلئردی کی، باش کاهئنلر پاخیلّیقدان عئسانی اونا تسلئم اله‌یئبلر. 11آمّا باش کاهئنلر خالقی قیزیشدیردیلار کی، اونون عوضئنه باراَبّانی آزاد اله‌سئن. 12او واخت پئلاط گئنه اولاردان سوروشدی: «بس یهودئلرئن پادشاهی چاغیردیغیز آداما نه اله‌یئم؟» 13اولار گئنه چیغیردیلار: «اونی چارمیخا چک.» 14پئلاط اولارا ددی: «نئیه، نه پئسلئک اله‌یئب؟» آمّا اولار لاپ اوجادان باغیریب ددئلر: «اونی چارمیخا چک!» 15پئلاط خالقی راضی اله‌مک اوچون باراَبّانی آزاد اله‌دی و عئسایا شالّاق ووردوراندان سورا اونی چارمیخا چکئلمه‌یه وردی.

سربازلار عئسانی اَله سالیرلار

16سربازلار عئسانی سارایین ائچئنه، یعنی والئنئن سارایینا آپاردیلار و قوشونون هامیسینی بئر یره ییغدیلار. 17اونا قیرمیزی پالتار گیدئردئلر و تئکانلاردان بئر تاج هؤروب اونون باشینا قویدولار. 18و اونا تعظئم اله‌یئب، دیئردئلر: «سالام، ای یهودئلرئن پادشاهی!» 19قامیش‌ ائنان عئسانین باشینا ووروردولار، اوستونه توپوروردولر، و دئز چؤکوب اونا سجده اله‌یئردئلر. 20سربازلار عئسانی اَله سالاندان سورا قیرمیزی پالتاری اونون اَینئندن چیخاردیب اؤز پالتارینی گیدئردئلر. و اونی چارمیخا چکئلمک اوچون اشئیه چیخارتدیلار.

عئسا چارمیخا چکئلئر

21شمعون آدیندا کرِنِیلی بئر آدام شهرئن اشئیئندن گلئب اوردان کچئردی. شمعون، ائسکندر و روفوسون آتاسی‌ ائدی. سربازلار اونی مجبور اله‌دئلر کی، عئسانین چارمیخینی داشیسین. 22عئسانی جولجوتا دیئلن یره گتئردئلر، کی معناسی «کلّه یری» دئر. 23او واخت اونا مور ائنان قاریشمیش شراب وردئلر. آمّا عئسا ائچمه‌دی. 24اونی چارمیخا چکدئلر و پالتارینی آرالاریندا بؤلوشوب، کئمه نه چاتماسی اوچون پوشک آتدیلار.

25سحر چاغی ساعات دوقّوز ائدی کی عئسانی چارمیخا چکدئلر. 26اونون تقصئری باشینین اوستونده یازیلمیش ائدی: «یهودئلرئن پادشاهی.» 27اونونان ائکی اوغرونی دا چارمیخا چکدئلر، بئرئنی صاغ طرفئنده، او بئرئنی ده سول طرفئنده. 28و بوجور دا موقدّس کئتابدا یازیلدیغی سؤز یرئنه یتئشدی کی، دیئر: «او، تقصئرکارلار ائنان بئر ساییلدی.» 29اوردان کچنلر عئسانی سؤیوردولر و باشلارینی ترپه‌دئب دیئردئلر: «ای معبدی ییخیب اوچ گونده تئکن، 30اؤزونی خئلاص اله. چارمیخدان آشاغی دوش.» 31باش کاهئنلر و تؤورات موعلّئملری ده آرالاریندا اونی مسخره اله‌یئب دیئردئلر: «آیری آداملاری نئجات وردی، آمّا اؤزونی نئجات وره‌بئلمئر. 32ائسرایئلئن پادشاهی مسئح، قوی ائندی چارمیخدان دوشسون و بئز گؤروب اونا ائمان گتئرک.» عئسانین یانیندا چارمیخا چکئلنلر ده اونی سؤیوردولر.

عئسانین اؤلومی

33ناهارچاغی ساعات اون‎ ائکئدن، ناهاردان سورا ساعات اوچه قدر، بوتون اؤلکه‌یه قارانلیق دوشدی. 34ناهاردان سورا ساعات اوچ ده عئسا اوجا سَس‌ ائنن قیشقیردی: «ائلویی، ائلویی، لاما سَبَقته‌نی؟» یعنی: «تاریم، تاریم! نه اوچون منی ترک اله‌دئن؟» 35اوردا دورانلاردان بعضئسی بونی اِشئدنده ددئلر: «باخین، ائلیانی چاغیریر.» 36آرالاریندان بئری قاچیب، بئر ابری تورش شرابا باتیردی و اونی بئر قامیشین اوجونا تاخیب عئسایا ائچئرتدی و ددی: «قویون گؤرک آیا ائلیا اونی اندئرمه‌یه گلئر؟» 37آمّا عئسا اوجا سَس‌ ائنن قیشقیریب، جان وردی. 38او آندا معبدئن پرده‌سی یوخاریدان آشاغی‌یا قدر ائکئیه بؤلوندی. 39عئسانین قاباغیندا دوران روملی افسر، اونون بله قیشقیریب جان وردئیئنی گؤرنده ددی: «دوغرودان دا بو آدام، تارینین اوغلی ائدی.»

40اوردا بعضی آروادلار دا اوزاقدان باخیردیلار. اولارین آراسیندا مجدللی مریم، یوسایین و کئچئک یعقوبون آناسی مریم و سالومه ده دایانمیشدی. 41عئسا جلئل وئلایتئنده اولاندا بو آروادلار اونون دالیسیجا گدئب، اونا خئدمت اله‌یئردئلر. عئسا ائنن اورشلئمه گلمئش بئر چوخ آرواد دا اولوب-کچنلره باخیردیلار.

عئسانین تدفئنی

42آرتیق آخشام اولموشدی. حاضیرلیق گونی، یعنی موقدّس شنبه‌دن بئر گون قاباق، 43آرئماتایلی یوسئف کی یهود مجلئسئنئن حؤرمتلی عوضولرئندن بئری ائدی و تارینین پادشاهلیغینی گؤزله‌یئردی، جسارتئنی بئر یره ییغیب پئلاطین یانینا گتدی و عئسانین جسدئنی ائسته‌دی. 44پئلاط کی عئسانین بله تز اؤلدویونه ائنانمیردی، روملی افسری یانینا چاغیردی کی گؤرسون عئسا اؤلوب یا یوخ. 45و روملی افسردن احوالاتی بئلندن سورا عئسانین جسدئنی یوسئفه وردی. 46یوسئف ده کتان آلدی و عئسانین جسدئنی چارمیخدان آشاغی اندئرئب، کتان پارچایا بوکدی. اونی قایادا قازیلمیش بئر مقبره‌یه قویدی و مقبره‌نئن آغزینا بئر داش دئیئرلتدی. 47مجدللی مریم و یوسایین آناسی مریم اونون هارایا قویولدوغونی گؤردولر.

Currently Selected:

مرقوس روایت 15: CAB

Highlight

Copy