مرقوس روایت 14

عئسانین اؤلومی یاخینلاشیر

1مایاسیز چؤرک پاسخا بایرامینا و فطئر بایرامینا ائکی گون قالمیشدی. معبدئن باش کاهئنلری و تؤورات موعلّئملری عئسانی حئیله ائنن توتوب اؤلدورمک اوچون بئر یول آختاریردیلار. 2آنجاق دیئردئلر: «بو ائش بایرام گونلرئنده اولماسین، یوخسا خالق آراسیندا ائغتئشاش باش ورَر.»

3عئسا بیت‌عنیادا، جوذاملی شمعونون اِوئنده، سوفره باشیندا اوتورموشدی کی، بئر آرواد مرمر قابدا چوخ باهالی خالئص سونبول یاغی گتئردی و قابی سیندیریب، یاغی عئسانین باشینا تؤکدی. 4بعضئلری گئلیله‌نئب آرالاریندا ددئلر: «بو یاغ نه اوچون بله ائصراف اولوندی؟ 5چونکی بو یاغ اوچ یوز دئناردان چوخ ساتیلیب یوخسوللارا ورئله بئلردی.» و آروادا دیئنمه‌یه باشلادیلار. 6آمّا عئسا ددی: «اونونان ائشئز اولماسین! نه اوچون اونی ائنجئدئرسئز؟ او، منه یاخشیلیق اله‌دی. 7چونکی یوخسوللار دائم سئزئن یانیزدادیرلار و نه زامان ائستیه‌سئز، اولارا یاخشیلیق الئیه‎ بئلرسئز. آمّا من، دائم سئزئن یانیزدا دیئلم. 8آرواد الئندن گلنی اله‌دی و باسدیریلماق اوچون منئم بدنئمی قاباقجادان یاغلادی. 9دوغروسونی سئزه دیئرم: ائنجئلئن بو خوش خبری دونیانین هاراسیندا اعلان اولونسا، بو آروادین اله‌دئیی ائشده دیئلئب خاطیرلاناجاق.»

یهودانین خیانتی

10او زامان ائسکاریوتلی یهودا کی، اون‌ائکی شاگئرلردن بئری ائدی، باش کاهئنلرئن یانینا گتدی، اله کی عئسانی اولارا تسلئم اله‌سئن. 11معبدئن باش کاهئنلری بونی اِشئدنده سوئندئلر و یهودایا پول وعده‌سی وردئلر. او دا موناسئب بئر فورصت آختاریردی کی، عئسانی اولارا تسلئم اله‌سئن.

ربّئن ضئیافتی

12مایاسیز چؤرک بایرامینین اوّلئنجی گونی کی، پاسخانین قوربانلیق قوزوسی او گونده کسئلردی، شاگئردلر عئسایا ددئلر: «پاسخا یمه‌یئنی هارادا یمک ائسته‌یئرسن؟ گدئب هاردا حاضیر اله‌یک؟» 13عئسا شاگئردلرئندن ائکئسئنی گؤندَ‌رئب اولارا ددی: «شهره گدئن، سهنگ ‎ائنن سو داشییان بئر کئشی سئزه راست گله‌جک. اونون دالیسیجا گدئن. 14بو آدام هارایا گئرسه، او اِوئن صاحئبئنه دیئن: ”اوستاد سنه دیئر: قوناق اوتاغی هاردادیر کی، شاگئردلرئم‎ ائنن پاسخا شامینی اوردا یِیئم؟“ 15او سئزه بالاخانادا دؤشَنمئش و حاضیرلانمیش بؤیوک بئر اوتاق گؤرسده‌جک. اوردا پاسخا شامینی حاضیر اله‌یئن.» 16شاگئردلر چیخیب، شهره گتدئلر و هر شیی عئسانین اولارا ددئیی کئمی تاپدیلار و پاسخا شامینی حاضیرلادیلار.

17آخشام اولاندا عئسا اون‌ائکی شاگئردی‎ ائنن گلدی. 18سوفره باشینا اوتوروب یمک یئینده، عئسا اولارا ددی: «دوغروسونی سئزه دیئرم، سئزلردن بئری کی، من‎ ائنن سوفره باشیندا یمک ییئر، منی تسلئم اِلئیه‎‌جک.» 19شاگئردلر قمگئن اولدولار و بئر-بئر اوندان سوروشدولار: «حتمن کی، من دیئلم؟» 20عئسا اولارا ددی: «او آدام اون‌ائکی شاگئردلردن بئری‌دئر، او کی، اَلئنی من ائنن اوزادیب، چؤره‌یئنی کاسایا باتیریر. 21چونکی ائنسان اوغلی نجه کی، اونون باره‌سئنده یازیلیب، گدئر. آمّا وای او آدامین حالینا کی، ائنسان اوغلی اونون واسئطه‌سی ‎ائنن تسلئم اولونور. او آدام هچ آنادان اولماسایدی، اونون اوچون چوخ یاخشی اولاردی.»

22یمک یئینده عئسا چؤره‌یی گؤتوروب شوکور اله‌دی و پارچالاییب شاگئردلره وردی و اولارا ددی: «آلین، بو، منئم بدنئمدئر.» 23سورا بئر پئیالا گؤتوردی و شوکور اله‌یئب اولارا وردی و هامی اوندان ائچدی. 24عئسا اولارا ددی: «بو منئم قانیمدیر، تارینین تزه عهدی‎ کی منئم قانیم ‎ائنان مؤهورله‌نئر، اله او قان کی چوخ آداملار یولوندا تؤکولور. 25دوغروسونی سئزه دیئرم، آرتیق اوزومون محصولوندان‌ ائچمیه‌جه‌یم، او گونه قدر کی، تارینین پادشاهلیغیندا تزه‌سئنی ائچئم.»

26و ائلاهی بئر ماهنی اوخویاندان سورا زیتون داغینا گتدئلر.

پطروسون ائنکار اله‌مه‌سئنئن نبئلئکی

27عئسا اولارا ددی: «بو گجه هامیز مندن دؤنه‌جکسئز. چونکی یازیلیب؛

”چوبانی ووراجاغام

و قویونلار داغیلاجاق.“

28آمّا من، دئرئلندن سورا سئزدن قاباق جلئل وئلایتئنه گده‌جه‌یم.» 29آمّا پطروس اونا ددی: «هامی سندن دؤنسه ده، من سندن اصلا دؤنمه‌یه‌جه‌یم.» 30عئسا پطروسا ددی: «دوغروسونی دیئرم؛ بو گون، اله بو گجه خوروز ائکی دفه بانلامامیش، سن منی اوچ دفه ائنکار الئیه‌جکسن.» 31آمّا پطروس داها آرتیق تأکئد اله‌یئب ددی: «اگر لازیم اولسا کی سن ‎ائنن اؤلَم، سنی ائنکار اله‌مئیه‌‌جه‌یم.» شاگئردلرئن هامیسی دا اِله ددئلر.

جِتسئمانی باغیندا

32اولار جِتسئمانی آدیندا بئر یره گلدئلر. عئسا شاگئردلرئنه ددی: «سئز بوردا اوتورون اله کی، من دوعا اله‌یئم.» 33و پطروس، یعقوب، و یوحنّانی اؤزی ائنن گؤتوردی. درئن سیخینتی و ائضطئراب عئسانین جانینا دوشدی. 34اولارا ددی: «جانیم اؤلوم حدّئنده قمگئندئر. بوردا دورون و اویاق قالین.» 35و اؤزی بئر آز ائره‌لی گدئب یره دوشدی و دوعا اله‌یئردی کی، اگر مومکوندور، او ساعات اوندان کچسئن. 36و دیئردی: «آبّا - آتا، سنه هر شی مومکوندور. بو عذاب پئیالا‌سینی مندن اوزاقلاشدیر. آمّا گئنه ده منئم ائسته‌دئیئم یوخ، سنئن ائسته‌دئیئن اولسون.» 37عئسا قاییدیب شاگئردلری یوخودا تاپدی و پطروسا ددی: «شمعون یاتیبسان؟ بئر ساعات اویاق قالا بئلمه‌دئن؟ 38اویاق قالیب دوعا اله‌یئن کی، ائمتاحانا دوشمه‌یه‌سئز. روح ائسته‌یئر، آمّا جئسم ضعئفدئر.» 39و گئنه گدئب دوعا اله‌دی و همن سؤزلری ددی. 40و قاییدیب اولاری گئنه یوخولامیش تاپدی، چونکی اولارین گؤزلری آغیرلاشمیشدی و اونا نه جاواب وره‌جکلرئنی بئلمئردئلر. 41عئسا اوچونجی دفه گلئب، اولارا ددی: «سئز حله ده یاتیب ائستئراحت اله‌یئرسئز؟ آرتیق بسدئر. واخت گلدی؛ باخ، ائنسان اوغلی گوناهکارلارین الئنه تسلئم اولونور. 42دورون گدک! باخین، منی تسلئم اله‌ین گلئر!»

عئسا توتولور

43عئسا حله دانیشیردی کی، یهودا کی اون‌ائکی شاگئردلردن بئری ائدی، یانیندا قیلینجلی و اَل آغاجلی بؤیوک بئر جاماعات ائنان یتئشدی. اولار باش کاهئنلر، تؤورات موعلّئملری و آغساقّاللار طرفئندن گؤندَ‌رئلمئشدئلر. 44عئسانی تسلئم اله‌ین اولار ائنان قرارلاشیب دمئشدی: «کئمی اؤپسم، عئسا اودور. اونی توتون و احتئیاط ائنان آپارین.» 45یهودا، گلدئیی آندا عئسایا یاخینلاشیب «اوستاد» دئیه-دئیه اونی اؤپدی. 46اولار عئسانی یاخالاییب توتدولار. 47آمّا یانیندا دورانلاردان بئری قیلینجی چکدی و لاپ بؤیوک کاهئنئن قولونی ووروب قولاغینی کسدی. 48عئسا اولارا ددی: «یول کسه‌نئن اوستونه گلن کئمی، قیلینجلار و اَل آغاجلار ائنان اوستومه گلئبسئز؟ 49هر گون معبدده تعلئم ورنده یانیزدا ائدئم و منی توتمادیز. آمّا قوی موقدس یازیلار یرئنه یتئشسئن.» 50او زامان شاگئردلرئن هامیسی عئسانی قویوب قاچدیلار.

51بئر جاوان کی لوت بدنئنی کتان پارچایا بوروموشدی، عئسانین دالیسیجا گدئردی. اولار اونی دا توتدولار. 52آمّا او، کتان پارچانی بوراخیب، لوت قاچدی.

عئسا یهود شوراسینین حوضوروندا موحاکئمه اولور

53عئسانی لاپ بؤیوک کاهئنئن یانینا آپاردیلار. بوتون باش کاهئنلر، آغساقّاللار، و تؤورات موعلّئملری اورایا ییغیلدیلار. 54پطروس لاپ بؤیوک کاهئنئن حیطئنئن ائچه‌رئسئنه قدر اوزاقدان عئسانین دالیسیجا گتدی و اوردا موحافئظلر ائنن اود یانیندا اوتوروب اؤزونی قیزیشدیریردی. 55بو واخت، باش کاهئنلر و بوتون شورا عئسانی اؤلدورمک اوچون اونون ضئدّئنه شهادت آختاریردیلار، آمّا تاپمیردیلار. 56گرچی بئر چوخلاری اونون ضئدّئنه یالاندان شهادت ورئردئلر، آمّا بو شهادتلر بئر‌بئری ائنن راست گلمئردی. 57بعضئلری قالخیب عئسانین ضئدّئنه یالاندان شهادت ورئب دیئردئلر: 58«بئز اشئتدئک کی، دیئردی: ”ال‌‌ ائنن تئکئلمئش بو معبدی ییخیب، ال‌‌ ائنن تئکئلمه‌مئش آیری بئرئنی اوچ گونده بئنا اله‌رم.“» 59آمّا اولارین شهادتلری بئربئری ائنن راست گلمئردی. 60لاپ بؤیوک کاهئن اورتادا آیاغا قالخیب، عئسادان سوروشدی: «هچ جاواب ورمئرسن؟ بولارین سنئن ضئدّئنه وردئکلری شهادت نه‌دئر؟» 61آمّا عئسا سوکوت اله‌یئب، اونون سوآلینا جاواب ورمه‌دی. باش کاهئن گئنه اوندان سوروشوب ددی: «آیا سن وعده ‎ورئلن مسئح‎ موتبارک تارینین اوغلوسان؟» 62عئسا ددی: «منم، و سئز ائنسان اوغلونی گؤره‌جکسئز کی، تارینین قودرتئنئن صاغیندا اوتوروب، بولودلار آراسیندا گلئر.» 63لاپ بؤیوک کاهئن اؤز پالتارینی جیریب ددی: «آرتیق شاهئدلره نه احتئیاجیمیز وار؟ 64اونون کوفر ددئیئنی اشئتدئز. سئز نه دیئرسئز؟» اولارین هامیسی عئسانی اؤلومه محکوم اله‌دئلر. 65و بعضئلری اونون اوستونه توپورمه‌یه باشلادیلار. عئسانین گؤزلرئنی باغلاییب اونا یوموروق وورا-وورا اوندان سوروشوردولار: «نبئلئک اله!» موحافئظلر ده اونی توتوب ووردولار.

پطروسون ائنکاری

66پطروس آشاغیدا، حیطده اولاندا، باش کاهئنئن کنئزلرئندن بئری گلدی 67و پطروسی اود یانیندا قیزیشان حالدا گؤرنده، اونا دئقّت ائنن باخیب ددی: «سن ده ناصئره‌لی عئسا ائنن ائدئن.» 68آمّا پطروس ائنکار اله‌یئب ددی: «سنئن نه ددئیئنی بئلمئرم و باشا دوشمورم.» و دروازایا ساری گتدی. 69کنئز قیز اونی گئنه گؤروب، اوردا دورانلارا ددی: «بو آدام، اولاردان بئری‌دئر.» 70آمّا پطروس گئنه ده ائنکار اله‌دی. بئر آز سورا اوردا دورانلار پطروسا ددئلر: «جلئل‌لی اولدوغون اوچون دوغرودان دا سن ده اولاردانسان.» 71آمّا پطروس لعنت الئیه-الئیه، آند ائچمه‌یه باشلادی: «ددئیئز او آدامی تانیمیرام.» 72و او آندا خوروز ائکئنجی دفه بانلادی. پطروس عئسانین اونا ددئیی سؤزی یادینا گتئردی کی دمئشدی، «خوروز ائکی دفه بانلامامیش، سن اوچ دفه منی ائنکار الئیه‌جکسن.» و هؤنکور-هؤنکور آغلاماغا باشلادی.

Currently Selected:

مرقوس روایت 14: CAB

Highlight

Copy