مرقوس روایت 11
11
مسئح اورشلئمه داخئل اولور
1اورشلئمه یاخینلاشیب زیتون داغینین یانیندا اولان بیتفاجی و بیتعنیا کندلرئنه یتئشن زامان، عئسا شاگئردلرئندن ائکئسئنی گؤندَرئب 2اولارا بله ددی: «قاباغیزدا اولان کنده گِدئن. اورایا گئردئیئز زامان باغلانمیش بئر سیپا تاپارسیز کی، ائندئیه کئمی هچ کس اونا مئنمهیئب. اونی آچیب گتئرئن. 3اگر بئری سئزدن سوروشسا، ”نه اوچون بونی الهیئرسئز؟ “ دئیرسئز: ”ربّئن بونا احتئیاجی وار و آنَن اونی بورایا گؤندرهجک.“» 4اولار گتدئلر و کوچهده قاپینین یانیندا باغلی بئر سیپا تاپیب، اونی آچدیلار. 5اوردا دورانلاردان بعضئسی ددی: «نه الهیئرسئز؟ سیپانی نه اوچون آچیرسیز؟» 6شاگئردلر عئسانین ددئیی کئمی اولارا جاواب وردئلر و آداملار اولاری بوراخدیلار. 7سیپانی عئسانین یانینا گتئرئب، اؤز پالتارلارینی سیپانین اوستونه سَردئلر و عئسا اونا مئندی. 8چوخ آداملار پالتارلارینی، بعضئلری ده زمئلردن کسدئکلری آغاج خوللارینی یولا سرئردئلر. 9قاباقدا گدنلر و آرخادان گلنلر چیغیریب دیئردئلر:
«هوسانّا!
ربّئن آدیندا گلن موبارک اولسون.
10آتامیز داوودون گلن پادشاهلیغی موبارک اولسون.
لاپ اوجالاردا، هوسانّا!»
11عئسا اورشلئمه گئرئب معبده گتدی و هر شیی گؤزدن کچئرتدی. گج اولدوغونا گؤره، او اونائکی شاگئرد ائنن بیتعنیا کندئنه گتدی.
عئسا معبدده
12او گونون صاباحی بیتعنیادان چیخدیقلاری زامان، عئسا آجیقدی. 13اوزاقدا یارپاقلی بئر انجئر آغاجی گؤردی. آغاج اوستونده بئر شی تاپماق اومئدی ائنن اونا یاخینلاشدی، آمّا یانینا گلن واخت، یارپاقدان باشقا اوندا بئر شی تاپمادی، چونکی انجئر فصلی دیئلدی. 14عئسا اونا ددی: «آرتیق سندن هچ کئم اصلا میوه یمهسئن.» و شاگئردلری بو سؤزی اشئتدئلر.
15اورشلئمه گلدئلر. عئسا معبده گئردی و اوردا آلیش-ورئش الهینلری اشئیه قوودی. صرّافلارین مئزلرئنی و گؤیرچئن ساتانلارین کورسولرئنی چوئردی. 16و هچ کسی قویمادی کی، معبدئن حیطئندن بئر شی کچئرتسئن. 17و اولارا تعلئم ورئب ددی:
«مگر یازیلماییب کی، ”منئم اِوئم بوتون مئلّتلر اوچون دوعا اِوی چاغیریلاجاق؟!“
آمّا سئز، اونی اوغرولار یوواسینا دؤندَرئبسئز.»
18باش کاهئنلر و تؤورات موعلّئملری بونی اشئتدئلر و عئسانی هلاک الهمک اوچون بئر یول تاپماغا باشلادیلار. چونکی اوندان قورخوردولار. اونا گؤره کی، بوتون خالق اونون تعلئملرئندن حیران قالمیشدی. 19آخشام اولاندا اولار شهردن اشئیه چیخدیلار.
انجئر آغاجینین قوروماسی
20او گونون صاباحی انجئر آغاجینین یانیندان کچنده، اونی کؤکوندن قوروموش گؤردولر. 21پطروس عئسایا خاطیرلادیب ددی: «اوستاد باخ، لعنت الهدئیئن انجئر آغاجی قورویوب!» 22عئسا جاواب ورئب اولارا ددی: «تارییا ائمانیز اولسون! 23دوغروسونی سئزه دیئرم، هرکس بو داغا دسه: ”قالخ، دهنزه آتیل!“ و اورهیئنده شک الهمهیئب ددئیئنئن اولاجاغینا ائنانسا، ددئیی کئمی اولاجاق. 24بونون اوچون سئزه دیئرم، دوعا الهدئیئز و ائستهدئیئز هر شیئن اِله ائندئدن آلدیغیزا ائنانین و سئزئن اوچون اولاجاق.
25دوعایا دوردوغوز زامان، هر بئر آدامین ضئدّئنه اورهیئزده نه ساخلاییبسیز، باغیشلایین کی، گؤیلرده اولان آتاز دا سئزئن تقصئرلرئزی باغیشلاسین. 26اگر باغیشلامایاسیز، گؤیلرده اولان آتاز دا سئزئن تقصئرلرئزی باغیشلامایاجاق.»
عئسانین قودرتی حاقّیندا سوآل
27اولار گئنه اورشلئمه گلدئلر. عئسا معبدئن حیطئنده گزنده، معبدئن باش کاهئنلری، تؤورات موعلّئملری و آغساقّاللار عئسانین یانینا گلدئلر 28و اونا ددئلر: «سن بو ائشلری نه حاق ائنان الهیئرسن؟ بولاری الهمک اوچون بو قودرتی سنه کئم ورئب؟» 29عئسا اولارا ددی: «منئم ده سئزدن بئر سوآلیم وار. منه جاواب ورئن، او واخت من ده سئزه دئیهرم کی، بو ائشلری کئمئن قودرتی ائنن گؤرورم. 30یحیانین تعمئد قوسلی تاری طرفئندن ائدی، یوخسا ائنساندان؟ جاواب ورئن.» 31اولار آرالاریندا مصلحتلهشئب ددئلر: «اگر ”تاریدان“ دِسَک، او دئیهجک؛ ”نه اوچون اونا ائنانمادیز؟“ 32آمّا اگر”ائنساندان“ دِسَک…» اولار خالقدان قورخدولار، چونکی هامی یحیانی حقئقی بئر پیغمبر بئلئردی. 33و عئسایا جاواب ورئب ددئلر: «بئلمئرئک.» عئسا اولارا ددی: «من ده سئزه دِمئرَم کی، بو ائشلری نه حاق ائنان گؤرورَم.»
Currently Selected:
مرقوس روایت 11: CAB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
