متّانین رئوایت 24
24
آخیر گونلرئن علامتی
1عئسا معبددن چیخیب گدنده، شاگئردلری اونا یاخینلاشدیلار و ائستهدئلر کی، معبدئن بئنالارینی اونا گؤرسدسئنلر. 2عئسا اولارا ددی: «آیا بوتون بو شیلری گؤرورسوز؟ دوغروسونی سئزه دیئرم: بوردا داش- داش اوسته قالمایاجاق، هر شی ییخیلاجاق.»
3عئسا زیتون داغیندا اوتورموشدی کی، شاگئردلر تکلئکده اونون یانینا گلئب ددئلر: «بئزه ده گؤرک، بو ددئکلرئن نه زامان اولاجاق؟ سنئن گلمهیئنئن و بو دؤورون باشا چاتماسینین علامتی نهدئر؟» 4عئسا جاواب ورئب اولارا ددی: «آییق اولون کی، هچ کس سئزی یولدان چیخارتماسین. 5چونکی بئر چوخلاری منئم آدیمدا گلئب دئیهجکلر، ”مسئح منم“ و چوخ آداملاری یولدان چیخارداجاقلار. 6و جنگلردن اشئدهجکسئز و جنگلرئن خبری قولاغیزا یتئشهجک. او زامان اورهیئز اوزولمهسئن، چونکی بوتون بولار گرک یرئنه یتئشه، آمّا آخیر زامان حله یتئشمهیئب. 7مئلّت مئلّتئن، مملکت مملکتئن ضئدّئنه قالخاجاق. موختلئف یرلرده قیتلیقلار و زلزلهلر اولاجاق. 8بوتون بولار دوغوم سانجیلارینین باشلانماسیدیر.
9او زامان سئزه اذئیّت ورئب، سئزی اؤلدورهجکلر و منئم آدیما گؤره، بوتون خالقلار سئزدن نئفرت الئیهجکلر. 10او واخت بئر چوخلاری ائماندان دوشهجکلر، بئربئرلرئنی تسلئم الهیئب بئربئرلرئندن نئفرت الئیهجکلر. 11بئر چوخ یالان اولان پیغمبرلر ظوهور الهیئب، چوخ آداملاری آزدیراجاقلار. 12پئس ائشلرئن آرتدیغیندان چوخ آداملارین سِوگئسی سویویاجاق. 13آمّا آخیرا قدر صبر الهین نئجات تاپاجاق. 14گؤیون پادشاهلیغی حاقّیندا اولان بو خوش خبر بوتون دونیایا اعلان اولوناجاق کی، مئلّتلرئن هامیسینا شهادت اولسون. و آخیر او واخت گلهجک.
15نه واخت کی گؤردوز، دانیال پیغمبرئن واسئطهسی ائنن دیئلمئش او خارابالیق گتئرن ائیرنج شی موقدّس یرده دورور -اوخویان دئقت الهسئن- 16یهودئیه وئلایتئنده اولان داغلارا قاچسین. 17دامدا اولان اِوئندن بئر شی گؤتورمهیه اِنمهسئن. 18اِلهبوجور اکئن یرئنده اولان آدام دا عاباسینی گؤتورمک اوچون اِوه دؤنمهسئن. 19او گونلرده بویلی اولانلارین و اوشاق اَمئزدئرن آروادلارین، وای حالینا! 20دوعا الهیئن کی، قاچماغیز قیشدا، یا دا شنبه گونونده اولماسین. 21چونکی او زامان اله بؤیوک موصئبت اولاجاق کی، دونیانین باشلانیشیندان ائندئیه کئمی بله بئر شی نه اولوب، نه ده اولاجاق. 22اگر او گونلر قیسالماسایدی، هچ بئر ائنسان نئجات تاپا بئلمزدی. آمّا سچئلمئش اولانلارین خاطئرئنه گؤره، او گونلر قیسالدیلاجاق.
23اگر او زامان بئر کس سئزه دسه: ”باخ، مسئح بوردادیر“، یا دا ”مسئح اوردادیر“، اونا ائنانمایین. 24چونکی یالان اولان مسئحلر و یالان اولان پیغمبرلر ظوهور الهیئب بؤیوک علامتلر و مؤجوزهلر گؤرسدهجکلر کی، مومکون اولسا، سچئلمئش اولانلاری دا یولدان چیخارتسینلار. 25باخین، من سئزه قاباقدان خبر وردئم. 26بله ده، اگر سئزه ”باخ، او چؤلدهدئر“ دسهلر ده، چیخمایین؛ ”باخ، او ائچهری اوتاقلاردادیر“ دسهلر ده، ائنانمایین. 27چونکی ائلدیریم نجه شرقدن چیخیب قربه کئمی گؤرونور، ائنسان اوغلونون گلمهسی ده اله اولاجاق. 28لِش هاردا اولسا، لشخورلار دا اورایا ییغیلارلار.
29فورن او گونلرئن موصئبتئندن سورا،
گون قارالاجاق،
آی ائشیغینی ورمهیهجک،
اولدوزلار گؤیدن دوشهجکلر،
گؤیلرئن قودرتلری تئترهیهجک.
30او زامان ائنسان اوغلونون علامتی گؤیده گؤرونهجک و یِر اوزونون بوتون خالقلاری شئون الئیهجکلر و ائنسان اوغلونی گؤرهجکلر کی گؤیون بولودلاری اوستونده قودرت و بؤیوک بئر جلال ائنان گلئر. 31او، ملکلرئنی اوجا سسلی شیپور ائنان گؤندرهجک، ملکلر ده اونون سچدئکلرئنی دونیانین دؤرد یانیندان، گؤیون بئر اوجوندان او بئری اوجونا قدر ییغاجاقلار.
32ائندی، انجئر آغاجیندان اؤیرهنئن. خوللاری تزهلهنئب یارپاق آچاندا بئلئرسئز کی، یای آرتیق یاخیندیر. 33سئز ده بوتون بو شیلری گؤرنده بئلئن کی، ائنسان اوغلی یاخیندیر، قاپیدادیر. 34دوغروسونی سئزه دیئرم؛ بو شیلرئن هامیسی یِرئنه یتئشمهیئنجه بو نسئل آرادان گتمهیهجک. 35گؤی و یِر آرادان گِدهجک، آمّا منئم سؤزلرئم آرادان گتمهیهجک.
عئسا مسئحئن ظوهوری
36آمّا هچ کس او گون و او ساعاتی بئلمئر، نه گؤیون ملکلری، نه ده اوغول. آتادان باشقا هچ کئم بئلمئر. 37نوحون زامانیندا نجه ائدی، ائنسان اوغلونون گلمهسی گونلرئنده ده اِله اولاجاق. 38طوفاندان قاباقکی گونلرده، نوح گمئیه گئرن گونه کئمی، ائنسانلار ییئردئلر، ائچئردئلر، آرواد آلیردیلار، اَرَه گِدئردئلر 39و باشلارینا نه گلهجهیی بئلمئردئلر، اله کی طوفان گلئب اولارین هامیسینی اؤزی ائنن آپاردی، ائنسان اوغلونون ظوهور اِلهدئیی ده، بله اولاجاق. 40او گون زمئده اولان ائکی نفردن بئری گؤتورولهجک، بئرئسی قالاجاق. 41اَل دَیئرمانی چَکن ائکی آرواددان؛ بئری گؤتورولهجک، بئرئسی قالاجاق. 42اونا گؤره ده، اویاق قالین؛ چونکی ربّئن هانسی گون گلهجهیئنی بئلمئرسئز. 43آمّا بونی بئلئن کی، اگر اِو صاحئبی اوغرونون هانسی ساعاتدا گلهجهیئنی بئلسَیدی، اویاق قالیب اِوئنی اوغورلاماغا قویمازدی. 44سئز ده گرک حاضیر اولاسیز، چونکی ائنسان اوغلی سئزئن گومان الهمهدئيئز ساعاتدا گلهجک.
45«کئمدئر او وفالی و عاغیلّی قول کی، اربابی اونی اؤز اِوئنئن اهلی اوستونه ائختئیار صاحئبی قویور، اوندان اؤتری کی، اولارا اؤز واختی-واختیندا یِمکلرئنی ورسئن؟ 46بختور او نؤکر کی، اربابی، گلدئیی زامان، اونی ائشی باشیندا گؤره. 47دوغروسونی سئزه دیئرم کی؛ اربابی بوتون وار-یوخونی اونا تاپشیراجاق. 48آمّا اگر نؤکر شرور اولوب اورهیئنده دِسه کی، ”اربابیم گلمکده یوبانیب،“ 49و یولداشلارینی دؤیوب عیّاشلار ائنان ییئب ائچمهیه باشلاسا. 50او نؤکرئن اربابی، اونون گؤزلمهدئیی بئر گونده و بئلمهدئیی بئر ساعاتدا گلهجک 51و اونی ائکی شقّه الهیئب، ائکی اوزلی لر ائنن بئر یِره آتاجاق؛ اورایا کی اوردا آغلاشما و دئش قیجیرتماسی اولاجاق.»
Currently Selected:
متّانین رئوایت 24: CAB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
