متّانین رئوایت 23
23
وای حالیزا!
1بوندان سورا عئسا جاماعاتا و اؤز شاگئردلرئنه ددی: 2«تؤورات موعلّئملری و فرئسئلر موسانین کورسوسونده اوتورورلار. 3بونا گؤره ده، سئزه امر الهدئیی هر شیی گرک یرئنه یتئرهسئز. آمّا اولارین الهدئکلر الهمهیئن، چونکی تعلئم وردئکلرئنه عمل الهمئرلر. 4اولار آغیر یوکلر باغلاییب خالقین بوینونا قویورلار، آمّا ائستهمئرلر کی اولاری داشیماق اوچون، اؤزلرئنئن بارماقلارینین بئرئنی ده بله تَرپتسئنلر. 5عمل الهدئکلرئنئن هامیسینی، اونون اوچون الهیئرلر کی، خالقا نومایئش ورسئنلر. دوعا بازوبندلرئنی اِنلی و پالتارلارینین ساجاقلارینی اوزون الهیئرلر. 6قوناقلیقلاردا یوخاری باشی، عئبادتگاهلاردا دا باش کورسولری توتماغی سِوئرلر. 7میدانلاردا سالام آلماغی و خالقین اولاری اوستاد چاغیرماسینی سِوئرلر. 8آمّا سئز اوستاد چاغیریلمامالیسیز، چونکی سئز هامیز قارداشسیز و آنجاق بئر موعلّئمئز وار. 9یر اوزونده هچ کسی ده آتا چاغیرمایین، چونکی بئر آتاز وار، او دا گؤیدهدئر. 10هچ کس ده سئزی موعلّئم چاغیرماسین، چونکی بئر موعلّئمئز وار، او دا مسئحدئر. 11آرازدا بؤیوک اولان، او بئرئلرئن نؤکری اولاجاق. 12چونکی هر کس اؤزونی اوجالدا آلچالاجاق، هر کس ده کی اؤزونی آلچالدا اوجالاجاق.»
13«وای حالیزا، ای تؤورات موعلّئملری و فرئسئلر، ای ائکیاوزلیلر! سئز گؤیون پادشاهلیغینین قاپیسینی ائنسانلارین اوزونه باغلاییرسیز. نه اؤزوز گئرئرسئز، نه ده گئرمک ائستهینلری قویورسوز.
14«وای حالیزا، ای تؤورات موعلّئملری و فرئسئلر، ای ائکیاوزلیلر! چونکی سئز بئر یاندان دول آروادلارین اِوئنی اودورسوز و او بئری یاندان اؤزلرئزی گؤرسدمک اوچون اوزون اوزون دوعالار الهیئرسئز. بونون اوچون ده، سئزئن جزاز لاپ چوخ آغیر اولاجاق.
15«وای حالیزا، ای تؤورات موعلّئملری و فرئسئلر، ای ائکیاوزلیلر! چونکی سئز بئر نفری ائمانا گتئرمک اوچون دهنزی و قورولوغی دولانیرسیز و گتئرندن سورا، اونی ائکی قات اؤزوزدن آرتیق جهنّم اؤولادی الهیئرسئز.
16«وای حالیزا، ای کور بلدچئلر کی دیئرسئز: ”کئم معبده آند ائچسه، اله موهوم بئر شی دیئل، آمّا کئم معبدئن قیزیلینا آند ائچسه، گرک اؤز آندینی یرئنه یتئره.“ 17ای آخماقلار، ای کورلار! هانسی چوخ بؤیوکدور؟ قیزیل، یوخسا قیزیلی موقدّس الهین معبد؟ 18سئز دیئرسئز: ”کئم قوربانگاها آند ائچسه، اله موهوم بئر شی دیئل، آمّا کئم قوربانگاهین اوستوندهکی قوربانا آند ائچسه، گرک اؤز آندینی یرئنه یتئره.“ 19سئز، ای کورلار! هانسی چوخ بؤیوکدور؟ قوربانلیق، یوخسا قوربانی موقدّس الهین قوربانگاه؟ 20بله ده، قوربانگاها آند ائچن، اونا و اونون اوستونده اولان بوتون شیلره آند ائچئر. 21معبده آند ائچن، اونا و اوندا ساکئن اولانا آند ائچئر. 22گؤیه آند ائچن تارینین تختئنه و اونون اوستونده اوتورانا آند ائچئر.
23آمّا وای سئزئن حالیزا، ای تؤورات موعلّئملری و فرئسئلر، ای ائکیاوزلیلر! چونکی سئز تؤوراتین اوندا-بئر ورمک حؤکمئنی، حتّا نانَع، شویود و زئره اوچون یرئنه یتئرئسئز آمّا تؤوراتین موهوم حؤکملرئنده کی، عدالت، رحمت، و ائماندیر اهمال الهیئرسئز. گرک بولاری الئیهسئز، اولاری دا یِرئنه یتئرمک ده اهمال الهمئیهسئز، 24ای کور بلدچئلر! مئلچهیی سوزورسوز، آمّا دَوهنی اودورسوز.
25«وای سئزه، ای تؤورات موعلّئملری و فرئسئلر، ای ائکیاوزلیلر! چونکی سئز پئیالا و بوشقابین چؤلونی تمئزلهیئرسئز، آمّا اؤز ائچئز طاماح و پئسلئک ائنن دولودور. 26سن، ای کور فرئسی، اوّل پئیالا و بوشقابین ائچئنی تمئزله کی، چؤلی ده تمئز اولسون.
27«وای سئزئن حالیزا، ای تؤورات موعلّئملری و فرئسئلر، ای ائکیاوزلیلر! چونکی سئز آغاردیلمیش قبئرلره بَنزهیئرسئز: چؤلی گؤزل گؤرونور، آمّا ائچی اؤلی سوموکلری و هر جور نجئسلئک ائنن دولودور. 28اله بوجور سئز ده ائنسانلارا ظاهئرده صالح گؤرونورسوز، آمّا باطئنئز ائکیاوزلیلئک و پئسلئک ائنن دولودور.
29وای سئزئن حالیزا، ای تؤورات موعلّئملری و فرئسئلر، ای ائکیاوزلیلر! چونکی سئز نبیلره مقبرهلر تئکئرسئز و صالحلرئن مقبرهلرئنی بزهیئرسئز. 30دیئرسئز کی: ”بئز اگر آتالاریمیزین یاشادیقلاری گونلرده اولسایدیق، پیغمبرلرئن قانینی تؤکمکده اولار ائنان اَل اولمازدیق.“ 31اِله بله ده سئز اؤز ضئدئزه شهادت ورئرسئز کی، پیغمبرلری اؤلدورنلرئن اؤولادلاریسیز. 32ائندی کی بلهدئر، او ائشی کی آتالاریز باشلاییب سئز قورتارین! 33ای ائلانلار، ای افعئلر نسئلی! جهنّم جزاسیندان نجه قاچاجاقسیز؟ 34باخین، بونون اوچون سئزه پیغمبرلر، معرئفت آداملاری و تؤورات موعلّئملری گؤندَرئرم: سئز اولاردان بعضئلرئنی اؤلدورهجکسئز و چارمیخا چکهجکسئز. بعضئلرئنی ده عئبادتگاهلاریزدا دؤیوب شهردن شهره قوواجاقسیز. 35اله کی هر صالح آدامین یِر اوزونده تؤکولموش قانی، سئزئن اوستوزه گلسئن؛ صالح هابئلئن قانیندان توتموش، بِرکئیا اوغلی زکرئیّانین قانینا قدر کی، اونی معبد ائنن قوربانگاهین آراسیندا اؤلدوردولر. 36دوغروسونی سئزه دیئرم: بوتون بو شیلر بو نسلئن اوستونه گلهجک.
37ای اورشلئم، ای اورشلئم، ای پیغمبرلری اؤلدورن شهر، ای سنئن یانینا گؤندَرئلنلَری داشا باسان! من نچه دفه ائستهدئم، تویوق اؤز جوجهلرئنی قانادلارینین آلتینا ییغان کئمی، سنئن اؤولادلارینی بئر یِره ییغیم. آمّا سن ائستمهدئن! 38باخ، سئزئن اِوئز سئزه وئران بوراخیلیر. 39چونکی سئزه دیئرم کی، آرتیق منی گؤرمهیهجکسئز او زاماناجاق کی، دئیهسئز: ”ربّئن آدیندا گلن، موبارک اولسون“.
Currently Selected:
متّانین رئوایت 23: CAB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
