متّانین رئوایت 25

اون باکئره قیزین مثلی

1«او زامان گؤیون پادشاهلیغی او اون باکئره قیزا بنزه‌یه‌جک کی، چیراقلارینی گؤتوروب به‌یئن پئشوازینا چیخدیلار. 2اولاردان بشی عاغیلّی، بشی عاغیلسیز ائدی. 3عاغیلسیزلار چیراقلارینی گؤتورموشدولر، آمّا یاغ گؤتورمه‌مئشدئلر. 4آمّا عاغیلّی‌لار اؤزلری ائنن قابلاریندا یاغ دا گؤتورموشدولر. 5به‌یئن یوباندیغینا گؤره، اولارین هامیسینی یوخی باسدی و یاتدیلار. 6گجه یاریسی بئر قیشقیریق دوشدی: ”باخین، بَی گلئر. اونون پئشوازینا چیخین!“ 7او واخت قیزلارین هامیسی دوروب چیراقلارینی حاضیرلادیلار. 8عاغیلسیزلار عاغیلّی‌لارا ددئلر: ”یاغیزدان بئزه ده ورئن، چونکی چیراقلاریمیز سؤنور.“ 9آمّا عاغیلّی‌لار جاواب ورئب ددئلر: ”بله اولماسین کی، یاغ نه بئزه چاتسین، نه ده سئزه. یاخشیسی بودور کی، گدئب یاغ ساتانلاردان اؤزوز اوچون آلاسیز.“ 10اولار یاغ آلماغا گدندن سورا بَی گلدی و حاضیر اولانلار اونونان توی مجلئسئنه گئردئلر و قاپی باغلاندی. 11سورا او بئری قیزلار دا گلدئلر و ددئلر: ”آغا، آغا، قاپینی بئزه آچ.“ 12آمّا او جاواب ورئب ددی: ”دوغروسونی سئزه دیئرم: سئزی تانیمیرام.“ 13اونا گؤره سئز ده اویاق اولون. چونکی ائنسان اوغلونون نه گله‌جک گونونی بئلئرسئز نه ده ساعاتینی.

امانت پولون مثلی

14گؤیون پادشاهلیغی سفره چیخماق ائسته‌یَن بئر آداما بنزه‌ر کی، قوللارینی چاغیریب مال-دؤولتئنی اولارا تاپشیردی. 15بئرئنه بش تالانت وردی، بئرئنه ائکی تالانت، بئرئنه ده بئر تالانت. هر بئرئنه اؤز قابئلئیّتئنه گؤره ورئب، سفره چیخدی. 16بِش تالانت آلان، آنن گدئب اولار ائنان تئجارت اله‌دی و بِش تالانت دا قازاندی. 17ائکی تالانت آلان دا اله بوجور ائکی تالانت قازاندی. 18آمّا بئر تالانت آلان آدام گدئب، یری قازدی و آغاسینین پولونی گئزلتدی.

19اوزون بئر زاماندان سورا بو قوللارین آغاسی قاییتدی و اولار ائنان حسابلاشماق ائسته‌دی. 20بش تالانت آلان آدام گلدی و بش تالانت دا گتئرئب ددی: ”آغا! سن منه بش تالانت وردئن، باخ، من بش تالانت دا قازاندیم.“ 21قولون آغاسی اونا ددی: ”آفرئن یاخشی و وفالی قولوم! سن خیردا ائشلرده وفالی اولدوغونا گؤره، سنی بؤیوک ائشلر اوستونه قویاجاغام. آغانین شادلیغینا شرئک اول.“ 22ائکی تالانت آلان دا گلئب ددی: ”آغا! منه ائکی تالانت وردئن. باخ، من ده ائکی تالانت قازاندیم.“ 23قولون آغاسی اونا ددی: ”آفرئن یاخشی و وفالی قولوم! سن خیردا ائشلرده وفالی اولدوغونا گؤره، سنی بؤیوک ائشلر اوستونه قویاجاغام. آغانین شادلیغینا شرئک اول.“ 24بئر تالانت آلان قول دا گلئب ددی: ”آغا! سنئن بَرک بئر آدام اولدوغونی بئلئردئم؛ اَکمه‌دئیئنی، یِردن بئچَرسن، سَپمه‌دئیئنی، یِردن ییغارسان. 25قورخدوم و گدئب سنئن تالانتینی یر آلتیندا گئزلتدئم. بویور، بو دا مالین.“ 26آمّا قولون آغاسی اونا جاواب ورئب ددی: ”ای پئس و تنبل قول! سن کی بئلئردئن، اکمه‌دئیئمی یردن بئچرم، سپمه‌دئیئمی یردن ییغارام؛ 27بس نه اوچون منئم پولومی صرّافلارا ورمه‌دئن کی، قاییتدیغیم زامان اونی منفعتی ائنن آلام؟ 28تالانتی اوندان آلین و اون تالانتی اولانا ورئن. 29چونکی هر کئمده وار دیر، اونا لاپ چوخ ورئله‌جک و او بوللوق ائچئنده اولاجاق؛ آمّا هر کئمده یوخدور، حتّا الئنده اولان دا اوندان آلیناجاق. 30او دَیَرسئز قولی چؤل قارانلیغینا آتین. اوردا آغلاشما و دئش قیجیرتماسی اولاجاق.“

قویونلار و کچئلر

31ائنسان اوغلی اؤز جلالی ائچئنده بوتون ملکلری ائنن بئرلئکده گلنده، شؤوکتلی تختی اوستونده اوتوراجاق. 32بوتون خالقلار اونون حوضورونا ییغیلاجاقلار. او زامان، چوبان قویونلاری کچئلردن آییردیغی کئمی، اولاری بئر‌بئرئندن آییراجاق. 33قویونلاری صاغینا و کچئلری سولونا قویاجاق. 34او زامان، پادشاه صاغینداکی‌لارا دئیه‌جک: ”ای سئز، آتامین موبارکلری، گلئن و او سلطنتی مئراث آلین کی، دونیا یاراناندان بری سئزئن اوچون حاضیرلانیب. 35چونکی آج ائدئم، منه یمک وردئز؛ سوسوز ائدئم، منه سو وردئز؛ قرئب ائدئم، منی قبول اله‌دئز. 36لوت ائدئم، منی گیئندئردئز. ناخوش ائدئم، منه باش چکدئز؛ زئنداندا ائدئم، یانیما گلدئز.“ 37او زامان صالح آداملار اونا جاواب ورئب دئیه‌جکلر: ”یارب، بئز سنی نه زامان آج گؤروب یدئرتدئک، یا دا سوسوز گؤروب سو وردئک؟ 38نه زامان سنی قرئب گؤروب قبول اله‌دئک، یا دا لوت گؤروب گیئندئردئک؟ 39نه زامان سنی ناخوش، یا دا زئنداندا گؤروب یانینا گلدئک؟“ 40پادشاه اولارا جاواب ورئب دئیه‌جک: ”دوغروسونی سئزه دیئرم: هر نه کی، منئم لاپ کئچئک قارداشلاریمین بئرئنه اله‌دئز، منه اِله‌یئبسئز. 41او زامان سولونداکی‌لارا دئیه‌جک: ”اوزاق اولون، ای ملعونلار! ائبلئسه و اونون ملکلرئنه حاضیرلانمیش ابدی اودا یوللانین. 42چونکی آج ائدئم، منه یمک ورمه‌دئز؛ سوسوز ائدئم، منه سو ورمه‌دئز. 43قرئب ائدئم، منی قبول اله‌مه‌دئز. لوت ائدئم، منی گیئندئرمه‌دئز؛ ناخوش و زئنداندا ائدئم، فئکرئمه اولمادیز.“ 44او زامان اولار دا جاواب ورئب دئیه‌جکلر: ”یارب! سنی نه واخت آج، سوسوز، قرئب، لوت، ناخوش، یا دا زئنداندا گؤردوک کی، سنه خئدمت اله‌مه‌دئک؟“ 45پادشاه دا اولارا جاواب ورئب دئیه‌جک: ”دوغروسونی سئزه دیئرم: هر نه کی، منئم بو لاپ کئچئکلرئمدن بئرئنه اله‌مه‌دئز، منه اله‌مه‌یئبسئز. 46بولار ابدی عذابا دوچار اولاجاقلار، آمّا صالحلر ابدی حیاتا مالئک اولاجاقلار.»

Currently Selected:

متّانین رئوایت 25: CAB

Highlight

Copy