متّانین رئوایت 22
22
توی ضئیافتئنئن مثلی
1عئسا گئنه اولارا مثللر ائنن دانیشیب ددی: 2«گؤیون پادشاهلیغی بئر پادشاها بنزهر کی اوغلونا توی ضئیافتی وردی. 3او، قوللارینی گؤندَردی کی، توی ضئیافتئنه دعوت اولونانلاری چاغیرسینلار، آمّا اولار گلمک ائستمهدئلر. 4پادشاه آیری قوللاری بئر دفه ده گؤندَرئب اولارا ددی: ”دعوت اولونانلارا دیئن کی: باخین، سوفرم حاضیردیر؛ اؤکوزلر و بسلنمئش ماللار کسئلمئش، هر شی حاضیردیر. توی مجلئسئنه گلئن.“ 5آمّا اولار اعتئنا الهمهیئب اؤز یوللارینا گتدئلر؛ بئرئسی زمئسئنه، بئرئسی ده تئجارتئنه گتدی. 6قالانلاری دا اونون قوللارینی توتدولار و تحقئر الهیئب اؤلدوردولر. 7پادشاه حئرصلندی و قوشونلارینی گؤندَرئب، او قاتئللری محو الهدی، شهرلرئنی ده یاندیردی. 8او زامان قوللارینا ددی: ”توی مجلئسی حاضیردیر، آمّا چاغیریلمیش قوناقلار بونا لایئق دیئلدئرلر. 9کوچهلر باشینا گدئن و تاپدیغیز هر آدامی توی مجلئسئنه دعوت الهیئن.“ 10او نؤکرلر، یوللارا چیخدیلار، یاخشیدان پئسدن تاپدیقلاری هر کسی ییغدیلار و توی مجلئسی قوناقلار ائنان دولدی.
11پادشاه قوناقلاری گؤرمک اوچون مجلئسه گئرنده، اوردا توی پالتاری گیمهمئش بئر نفری گؤردی. 12و اونا ددی: ”دوستوم! توی پالتاری گیمهمئش بورایا نجه گئردئن؟“ آدامین دئلی توتولدی. 13او زامان پادشاه نؤکرلرئنه ددی: ”اونون ال-آیاغینی باغلایین و گؤتوروب چؤل قارانلیغینا آتین؛ او یره کی، اوردا آغلاشما و دئش قیجیرتماسی اولاجاق.“ 14چونکی دعوت اولونموشلار چوخ، آمّا سچئلمئشلر آزدیرلار.»
قیصره باج ورمک حاقّیندا
15او زامان فرئسی فئرقهسئنئن عالئملری گتدئلر و مشورت الهدئلر کی، اونی نجه اؤز سؤزلری ائنن گئره سالسینلار. 16اولار اؤز شاگئردلرئنی هئرودچولار ائنان بئر یِرده عئسانین یانینا گؤندرئب ددئلر: «اوستاد! بئز بئلئرئک کی، سن صادئق بئر آدامسان و تارینین یولونی دوزلئک ائنن اؤیَردئرسن و هچ کسدن ده قورخون یوخدور، چونکی هچ کسئن ده کئم اولدوغونا باخمیرسان. 17ائندی بئزه ده گؤرک، سنئن نظرئن نهدئر؟ روم ائمپراطورینا خراج ورمک بئزه جائزدئر یا یوخ؟» 18آمّا عئسا اولارین پئس نئیّتلرئنی باشا دوشوب ددی: «منی نه اوچون ائمتاحان الهیئرسئز، ای ائکی اوزلیلر؟ 19باج وردئیئز سئکّهنی منه گؤرسدئن.» اولار اونا بئر دئنار گتئردئلر. 20عئسا اولارا ددی: «اونون اوستونده اولان شَکئل و آد کئمئندئر؟» 21ددئلر: «ائمپراطورون.» عئسا اولارا ددی: «او زامان ائمپراطورون مالینی ائمپراطورا، تارینین مالینی دا تارییا ورئن.» 22اولار بونی اِشئدنده حیران قالدیلار و عئسانی ترک الهیئب گتدئلر.
دئرئلمک حاقّیندا بئر سوآل
23همن گون صادوقی فئرقهسئنئن عالئملری عئسانین یانینا گلدئلر. صادوقئلر اؤلولرئن دئرئلمه سئنی ائنکار الهیئردئلر. اولار عئسادان سوروشدولار: 24«اوستاد! موسا دیئب: ”اگر بئر آدام اوشاغی اولمادان اؤلسه، قارداشی گرک اونون دول آروادینی آلیب اؤلن قارداشینا نسئل قویا.“ 25بئزئم آرامیزدا یِدّی قارداش وارائدی؛ بئرئنجئسی بئر آرواد آلدی و اؤلدی. اوشاغی اولمادیغینا گؤره آروادینی قارداشی اوچون قویدی. 26اله بوجور ائکئنجئسی و اوچونجوسی، حتّا یِدّئنجئسئنه قدر اِله اولدی. 27هامیسیندان سورا آرواد دا اؤلدی. 28بونا گؤره اؤلولر دئرئلَنده او آرواد اولاردان هانسینین آروادی اولاجاق؟ چونکی هامیسینین دا آروادی اولوب.»
29عئسا جاواب ورئب اولارا ددی: «سئز سهو الهیئرسئز، چونکی نه موقدّس یازیلاری بئلئرسئز، نه ده تارینین قودرتئنی. 30اونا گؤره کی، قئیامت گونونده نه اِولهنرلر، نه ده اَره گِدَرلر، بلکی گؤیدهکی ملکلر کئمی اولارلار. 31مگر اؤلولرئن دئرئلمهسی حاقّیندا تاری طرفئندن سئزه دیئلن سؤزی اوخوماییبسیز؟ 32”من ائبراهئمئن تاریسی، ائسحاقین تاریسی، و یعقوبون تاریسییام!“ تاری اؤلولرئن تاریسی یوخ، دئرئلرئن تاریسیدیر.» 33جاماعات بونی اِشئدنده اونون تعلئمئندن مات قالدیلار.
تارینین لاپ بؤیوک امری
34فرئسئلر، اِشئدنده کی عئسا نجه صادوقئلرئن آغیزلارینی باغلاییب، بئر یره ییغیلدیلار. 35اولاردان بئری کی، شرئعت عالئمی ائدی، عئسانی ائمتاحان الهمک اوچون اوندان سوروشدی: 36«اوستاد! تؤوراتین لاپ بؤیوک حؤکمی هانسیدیر؟» 37عئسا اونا ددی: «رب تارینی بوتون اورهیئندن، بوتون جانیندان، و بوتون فئکرئندن سو. 38بو، بئرئنجی و لاپ بؤیوک حؤکمدور. 39ائکئنجی حؤکمده بئرئنجی حؤکم کئمیدئر: قونشونی دا اؤزون کئمی سو. 40بوتون تؤورات و پیغمبرلرئن سؤزلری بو ائکی حؤکمون اوستونده دورور.»
مسئح کئمئن اوغلودور؟
41فرئسئلر بئر یره ییغیلاندا عئسا اولاردان سوروشدی: 42«مسئح حاقّیندا نه دوشونورسوز؟ او، کئمئن اوغلودور؟» اولار ددئلر: «داوود پادشاهین اوغلی.» 43عئسا اولارا ددی: «اگر اِلهدئر، بس نه اوچون داوود تارینین روحونون واسئطهسی ائنن، اونی رب چاغیریر و بله دیئر،
44رب منئم ربّئمه ددی:
”صاغیمدا اوتور،
او زاماناجاق کی، من دوشمنلرئنی آیاقلارینین آلتینا سالام.“
45داوود پادشاه اونی رب چاغیردیغینا گؤره، او، نه جور داوودون اوغلی اولار؟» 46هچ کئم اونا، جاوابیندا بئر سؤز دئیه بئلمهدی. و او گوندن سورا آرتیق عئسادان بئر شی سوروشماغا جورعت الهمهدئلر.
Currently Selected:
متّانین رئوایت 22: CAB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
