متّانین رئوایت 21
21
عئسا اورشلئمه گئرئر
1اولار اورشلئم شهرئنه یاخینلاشاندا، زیتون داغینین یانیندا اولان بیتفاجی کندئنه گلن زامان، عئسا شاگئردلرئندن ائکئسئنی گؤندرئب، 2اولارا ددی: «قاباغیزدا اولان کنده گِدئن. اورایا گئردئیئز زامان باغلانمیش اِششک ائنن بئر سیپانی تاپاجاقسیز. اولاری آچیب منئم یانیما گتئرئن. 3اگر بئری سئزه بئر سؤز دِسه، دیئن کی، ربّئن بولارا احتئیاجی وار، آنَن اولاری گؤندَرهجک.» 4بو ائش، اونون اوچون باشوردی کی، پیغمبر واسئطهسی ائنن دِیئلن سؤز یِرئنه یِتئشسئن:
5«صحیون قیزینا دیئن،
باخ، پادشاهین سنئن یانینا گلئر؛
او حلئمدئر، اِششهیه مئنمئش،
سیپایا مئنمئش.»
6شاگئردلر گدئب عئسانین اولارا ددئیی کئمی الهدئلر. 7اولار اِششک ائنن سیپانی گتئردئلر، اؤز پالتارلارینی اولارین اوستونه سردئلر، عئسا دا مئندی. 8جاماعاتین چوخلاری پالتارلارینی یولا دؤشهدئلر و اؤزگهلر ده آغاجلارین خوللارینی کسئب یولا سردئلر. 9عئسانین قاباغیندا گدن و دالیسیجا گلن جاماعات قیشقیریردیلار:
«هوسانّا، داوودون اوغلونا!
ربّئن آدیندا گلن موبارک اولسون!
لاپ اوجالاردا هوسانّا!»
10عئسانین اورشلئمه گئردئیی زامان، بوتون شهر جوشا گلئب سوروشوردولار: «بو کئمدئر؟» 11جاماعات دیئردی: «بو جلئل وئلایتئنئن ناصئره شهرئندن اولان عئسا پیغمبردئر.»
عئسا آلیش-ورئش الهینلری معبددن قووور
12عئسا معبده گئردی و آلیش-ورئش الهینلرئن هامیسینی اشئیه قوودی؛ صرّافلارین مئزلرئنی و گؤیرچئن ساتانلارین کورسولرئنی چوئردی. 13و اولارا ددی: «موقدّس یازیلاردا یازیلیب کی، ”منئم اِوئم دوعا اِوی چاغیریلاجاق، آمّا سئز اونی اوغرولار یوواسینا دؤندَرئبسئز.“»
14معبدده کورلار و توپاللار اونون یانینا گلدئلر و عئسا اولارا شفا وردی. 15آمّا معبدئن باش کاهئنلری و تؤورات موعلّئملری اونون عجایئب ائشلرئنی و معبدده «هوسانّا، داوودون اوغلونا» باغیران اوشاقلاری گؤرن واخت، حئرصلهنئب ددئلر: 16«بولارین نه ددئکلرئنی اشئدئرسن؟» عئسا ددی: «بلی، مگر هچ اوخوماییبسیز کی،
”اوشاقلارین و سود اَمَنلرئن آغزیندان
حمد تؤکدوردون؟!“»
17و اولاری قویوب شهردن اِشئیه، بیتعنیا کندئنه گتدی و گجهنی اوردا قالدی.
میوهسئز انجئر آغاجی
18سحر تِزدن عئسا شهره قاییداندا آجیقدی. 19یول قیراغیندا بئر انجئر آغاجی گؤروب اونا یاخینلاشدی، آمّا اوندا یارپاقدان باشقا هچ بئر شی تاپمادی. او زامان اونا ددی: «آرتیق بوندان سورا سندن هچ میوه چیخماسین!» و انجئر آغاجی او آندا قورودی. 20شاگئردلری بونی گؤرن واخت، تعجّوب الهیئب ددئلر: «انجئر آغاجی بئر آندا نجه قورودی؟!» 21عئسا اولارا جاواب وردی: «دوغروسونی سئزه دیئرم: اگر ائمانیز اولسا و شَک الهمئیهسئز، نه ائنکی انجئر آغاجینا اولانی الئیهبئلرسئز، اگر بو داغا دئیهسئز کی، ”قالخ، دَهَنزه آتیل،“ اولاجاق. 22اگر ائمانیز اولسا، دوعادا نه ائستیهسئز، آلاجاقسیز.»
عئسانین ائقتئداری
23عئسا معبده گئرئب اوردا تعلئم ورئردی کی، باش کاهئنلر و خالقین آغساقّاللاری اونون یانینا گلئب ددئلر: «سن بو ائشلری نه حاق ائنان الهیئرسن؟ بو قودرتی سنه کئم ورئب؟» 24عئسا اولارا جاواب وردی: «منئم ده سئزدن بئر سوآلیم وار. اگر منه جاواب وِرهسئز، او زامان من ده سئزه دئیهجهیم کی، بو ائشلری کئمئن قودرتی ائنن گؤرورم. 25یحیانین تعمئد قوسلی هاردان ائدی؟ تاری طرفئندن ائدی، یوخسا ائنساندان؟» اولار آرالاریندا مصلحتلهشئب ددئلر: «اگر ”تاریدان“ دِسَک“، او دئیهجک؛ ”نه اوچون اونا ائنانمادیز؟“ 26آمّا اگر ”ائنساندان دِسَک“، جاماعاتدان قورخوروق، چونکی هامی یحیانی بئر پیغمبر ساییر.» 27اونا گؤره ده عئسایا بله جاواب وردئلر: «بئلمئرئک.» عئسا اولارا ددی: «من ده سئزه دِمئرَم کی، بو ائشلری نه حاق ائنان گؤرورَم.
ائکی اوغول مثلی
28بونا نه دوشونورسوز؟ بئر آدامین ائکی اوغلی وار ائدی. بئرئنجئسئنئن یانینا گدئب ددی: ”اوغول، بو گون گت اوزوم باغیندا ائشله.“ 29اوغول جاواب وردی: ”گتمئرم.“ آمّا سورا، پشمان اولوب گتدی. 30آدام ائکئنجئسئنئن یانینا دا گلئب همن سؤزی ددی. اوغول جاواب وردی: ”گدهرم، آغا.“ آمّا گتمهدی. 31بو ائکی اوغولون هانسی آتاسینین ائستهدئیئنی یرئنه یتئردی؟» جاواب وردئلر: «بئرئنجئسی.» عئسا اولارا ددی: «دوغروسونی سئزه دیئرم: باج ییغانلار و فاحئشهلر تارینین پادشاهلیغینا سئزدن قاباق گئررلر. 32چونکی یحیا سئزه صالحلئک یولوندا گلدی، سئز اونا ائنانمادیز، آمّا باج ییغانلار و فاحئشهلر ائناندیلار. بونی گؤرندن سورا بله پشمان اولوب اونا ائنانمادیز.
پئس باغبانلار مثلی
33آیری بئر مثل اشئدئن: بئر مالئک وار ائدی کی، اوزوم باغی اکدی. باغین اطرافینا حاصار چکدی. اوزومی سیخماق اوچون ائچئنده بئر حوووض قازدی و بئر بورج تئکئب باغی باغبانلارا ائجارهیه وردی و اؤزگه بئر مملکته گتدی. 34محصول زامانی یتئشن واخت، باغبانلارین یانینا نؤکرلرئنی گؤندَردی کی، محصولی آلسینلار. 35آمّا باغبانلار نؤکرلری توتوب بئرئنی دؤیدولر، بئرئنی اؤلدوردولر، بئرئنی ده داشا باسدیلار. 36باغ صاحئبی بو دفه اوّلکئندن لاپ چوخ قول گؤندَردی. باغبانلار بولار ائنان دا اِله اوجور الهدئلر. 37آخیردا باغ صاحئبی اولارین یانینا اوغلونی گؤندَردی و دیئردی کی، اوغلوما حؤرمت الهرلر. 38آمّا باغبانلار، اوغولی گؤرن واخت، آرالاریندا ددئلر: ”وارئث بودور؛ گلئن اونی اؤلدورک و مئراث بئزه قالسین.“ 39باغبانلار اوغولی توتدولار و باغدان اشئیه آتیب اؤلدوردولر. 40بله ده، باغین صاحئبی گلنده بو باغبانلارا نه اِلئیهجک؟» 41اولار عئسایا ددئلر: «بو خائنلری قورخولی بئر اؤلومه محکوم اِلئیهجک، اوزوم باغینی دا اؤزگه باغبانلارا ائجارهیه ورهجک کی، محصولی اونا اؤز واختیندا ورسئنلر.»
42عئسا اولارا ددی: «مگر موقدّس یازیلاردا اوخوماییبسیز کی:
”بنّالارین ردّ الهدئکلری داش،
بئنانین اصلی داشی اولوب.
بو ربّئن ائشیدئر،
و گؤزوموزده حیرتلی گؤرونور.“
43بونا گؤره، سئزه دیئرم کی، تارینین پادشاهلیغی سئزدن آلینیب اله بئر خالقا ورئلهجک کی، ثمره سئنی یتئشدئره بئلسئن. 44بو داشین اوستونه ییخیلان هر کس پارچالاناجاق و بو داش کئمئن اوستونه دوشسه، اونی اَزهجَک.»
45باش کاهئنلر و فرئسئلر اونون مثللرئنی اشئدن واخت، باشا دوشدولر کی، بو سؤزلری اولارین بارهسئنده دیئر. 46اونی توتماغا بئر یول آختاردیلار، آمّا خالقدان قورخدولار، چونکی اولار عئسانی پیغمبر حساب الهیئردئلر.
Currently Selected:
متّانین رئوایت 21: CAB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
